Сайт тест ҳолатида ишламоқда!
22 Ноябр, 2026   |   12 Жумадул сони, 1448

Тошкент шаҳри
Бомдод
05:56
Қуёш
07:14
Пешин
12:14
Аср
15:17
Шом
17:02
Хуфтон
18:18
Bismillah
22 Ноябр, 2026, 12 Жумадул сони, 1448

ЭЪТИБОР, ЭҲТИРОМ ВА ЭЪЗОЗ

06.09.2024   12296   10 min.
ЭЪТИБОР, ЭҲТИРОМ ВА ЭЪЗОЗ

Дил изҳори

Аллоҳ таолога беадад шукрлар бўлсинки, юртимиз мустақиллигининг 33 йиллигини катта хурсандчилик билан кутиб олдик. Бугун ҳар бир гўшада байрам шукуҳи ҳукмрон. Бу айём ўзини шу Ватан фарзанди деб билган ҳар бир инсон учун қадрли, азиз ва мўътабар. Чунки у бизга ўзлигимиз, инсоний ҳақ-ҳуқуқ ва қадр-қимматимизни бахш этди.

Энг улуғ, энг азиз байрам арафасида Президентимиз фармонларига мувофиқ турли соҳа вакиллари фахрий унвон, орден ва медаллар билан тақдирланди. Шундай фидойи юртдошларимиз қаторида уч нафар имом-хатиб “Имом Бухорий” ордени билан мукофотлангани барча диний соҳа вакилларини бениҳоя хурсанд қилди. Айтиш жоизки, яқин ўтмишда имом-хатибларга бу даражада эҳтиром кўрсатилмаган.  Ушбу қувончли воқеа янги Ўзбекистонда ислом дини ва соҳа ходимларига қаратилаётган эътиборнинг яна бир ёрқин ифодаси бўлди.

Имом-хатиблар юксак мукофотларни 30 август куни Кўксарой қароргоҳида давлатимиз раҳбаридан қабул қилиб олди. Қуйида уларнинг дил сўзлари билан танишасиз.

Маърифий соҳада илмий асос яратилмоқда

— Бугун мен жуда ҳам шодман. Мана шундай улуғ мукофотни шахсан давлатимиз раҳбарининг ўзидан қабул қилиб олиш менга юксак шараф бўлиш билан бирга, катта масъулият ҳам юклади. Мамлакатимизда Президентимиз  раҳбарлигида барча соҳаларда инсон қадри ва унинг шаънини юксалтириш борасида олиб борилаётган изчил ислоҳотларнинг самараларини бирма-бир санаб адоғига етиш мушкул.

Ўзбекистон замини ислом илм-фани ва маданиятининг қадимий бешикларидан бири ҳисобланади. Халқимизнинг бой тарихий, илмий, маънавий меросини ҳар томонлама ўрганиш, жаҳон ҳамжамиятига кенг танитиш, энг муҳими, ислом динининг асл инсонпарварлик моҳиятини чуқур очиб бериш мақсадида юртимизда Имом Бухорий, Имом Термизий, Имом Мотуридий, Имом Насафий каби буюк алломаларимизнинг бебаҳо илмий мактабини ўрганиш ва тадқиқ этиш учун илмий-тадқиқот марказлари фаолияти кенг йўлга қўйилди.

Динимизни илмий жиҳатдан ўрганишни ривожлантириш мақсадида Ўзбекистон халқаро ислом академияси, Бухорода Мир Араб олий мадрасаси, Самарқандда Ҳадис илми мактаби ва Сурхондарёда Имом Термизий номидаги ислом институти ҳамда шу номдаги мадрасага асос солинди. Самарқандда Имом Бухорий, Сурхондарёда Имом Термизий, Тошкентда Имом Мотуридий халқаро илмий-тадқиқот марказлари ташкил этилди. Уларда талабалар ва ёш тадқиқотчилар буюк аждодларимизнинг бой меросини ўрганиш ва тадқиқ этиш баробарида замонавий илмларни ҳам ўзлаштириб, етук олим бўлиб камол топади. Шулар қаторида турли ҳудудларда ҳадис, калом, тасаввуф, фиқҳни ўрганишга ихтисослашган илмий мактаблар, хусусан, бизнинг вилоятимизда ҳам тасаввуф илми мактаби фаолияти йўлга қўйилгани диний-маърифий соҳада янги давр бошлаганидан дарак беради.

Қувонарлиси, мамлакатимиз раҳбарининг ташаббуси билан Бухоро Арк қўрғони яқинида Мир Араб олий мадрасасининг янги биноси барпо этилди ва фойдаланишга топширилди. 200 ўринга мўлжалланган олий мадрасада Қуръони карим, ҳадис, фиқҳ ва тасаввуф илмлари, хорижий тиллар пухта ўргатилади. Бугунги кунда 100 нафардан ортиқ талаба замонавий жиҳозланган ўқув хоналари, кутубхона, фаоллар зали, талабалар ётоқхонаси ва спорт залида малакали устозлардан таълим олмоқда.

2021–2024 йилларда вилоятимиздаги 15 та масжиднинг янгитдан қуриб фойдаланишга топширилгани, 42 та масжидда эса йирик таъмирлаш ишлари олиб борилгани мамлакатимизда муборак динимизга қаратилаётган алоҳида эътиборнинг исботидир.

Мустақиллик байрами арафасида шундай улуғ эътирофга сазовор бўлиш, менга чексиз ғурур бағишлади. Келажак авлодни янги Ўзбекистоннинг чинакам бунёдкори қилиб тарбиялаш, халқимизнинг маданий-маърифий, диний-ахлоқий дунёқарашини бойитиш йўлидаги фаолиятимда бу мукофот менга қанот бағишлайди, дея ишонч билан айта оламан.

Жобир домла ЭЛОВ,

Ўзбекистон мусулмонлари идорасининг

Бухоро вилоятидаги вакили,

Бухоро вилояти бош имом-хатиби,

Мир Араб олий мадрасаси ректори

* * *

Аждодларимизнинг ўлмас мероси чуқур ўрганилмоқда

— Бугун жуда бахтиёрман. Энг улуғ, энг азиз байрам — мустақиллигимизнинг 33 йиллиги арафасида давлатимизнинг энг юксак мукофотларидан бири “Имом Бухорий” ордени билан тақдирланганимдан қувончим чексиз, сўз билан таърифлашга ожизман. Президентимиз ташаббуси билан таъсис этилган орденга биринчилардан бўлиб лойиқ кўрилганимдан, юксак мукофотни давлат раҳбарининг ўз қўлидан олганимдан бошим кўкка етди.  

Турли соҳаларда эришилаётган барча ютуқлар ватанимизда ҳукм сураётган тинчлик ва осойишталик, одилона сиёсат натижасидир. Ислом дини илмлари ривожига беқиёс ҳисса қўшган буюк ватандошларимизнинг улкан илмий меросини янада чуқур ўрганиш, табаррук зиёратгоҳ ва қадамжолар, кўҳна масжид ва мадрасаларни обод қилиш борасида кенг кўламли ишлар амалга оширилмоқда. Вилоятимизда ўнлаб янги масжидлар қурилди, мавжудларида қайта қуриш ва таъмирлаш ишлари олиб бориляпти. Мисол учун, бир вақтлар йўқ бўлиб кетиш арафасида турган Абул Муин Насафий зиёратгоҳини бугун бутун дунё сайёҳлари  катта завқ ва ҳайрат билан томоша қилмоқда.

Мазкур мажмуада Абул Муин Насафий илмий меросига бағишлаб ўтказилган халқаро илмий-амалий конференцияларда Туркия, Миср, Франция, Россия, Бангладеш, Қозоғистон, Тожикистон, Қирғизистон каби давлатлардан юзлаб олим ва каломшунос мутахассислар иштирок этиб, юртимизда эътиқод эркинлигини таъминлашга қаратилаётган эътиборни юксак баҳолади. Шунингдек, Касби туманидаги Султон Мир Ҳайдар, Китоб туманидаги Хўжа Илм Кони ва Мавлоно Дарвеш Муҳаммад Вахшуворий, Қамаши туманидаги Лангар ота мажмуаларини реконструкция ва реставрация қилиш ишлари амалга оширилди.

Мустақилликнинг дастлабки йилларида муборак ҳаж амалини адо этишга муяссар бўлган ватандошларимиз сони бармоқ билан саноқли бўлган. Бугунги кунда виждон эркинлиги ва диний-маърифий муҳит барқарорлигини таъминлашга қаратилаётган алоҳида эътибор туфайли уларнинг сони 15 мингдан ошди. Жорий йилда фақат Қашқадарё вилоятининг ўзидан 801 нафар фуқаро ҳаж амалларини бажариб келди.

Ҳаж мавсумида Президентимиз ҳожилар ҳолидан хабар олиб, Ўзбекистон мусулмонлари идораси раиси, муфтий Шайх Нуриддин Холиқназар ҳазратлари билан телефон орқали мулоқот қилгани нафақат ҳаж зиёратига борганларни, уларнинг оила аъзоларини, барча мўмин-мусулмонларимизни беҳад қувонтирди.

Бундай ғамхўрликдан руҳланган ҳожиларимиз, вилоятимиздаги барча жоме масжидлар имом-хатиблари ва уларнинг ноиблари “Янги Ўзбекистон фидойиси бўлиб, маънавият тарғиботчисига айланамиз” шиори остида хайрли амалларни бажаришмоқда.

Раҳматулло УСМОНОВ,

Ўзбекистон мусулмонлари идорасининг

Қашқадарё вилоятидаги вакили,

вилоят бош имом-хатиби

* * *

Юксак маънавий-ахлоқий жамият барпо этиш йўлида

Кўксарой қароргоҳида мамлакатимизда кўзга кўринган илм-фан, таълим, соғлиқни сақлаш, адабиёт, маданият вакиллари қаторида давлат мукофоти билан тақдирланганим менга чексиз фахру ифтихор бағишлади.

Яратганга беҳад шукрлар бўлсинки, юртимизда Истиқлол байроғи остида халқимизнинг юрт равнақи йўлидаги азалий истакларини рўёбга чиқа бошлади. Бу, албатта, ўз-ўзидан бўлиб қолмайди. Давлатимиз раҳбари бошчилигида жамият ҳаётининг барча жабҳаларида олиб борилаётган ислоҳотларнинг туб моҳияти, энг аввало, инсон манфаатига қаратилган бўлиб, уларнинг негизида фаровон турмуш, илм-фан равнақи, юксак маънавий-ахлоқий, илмий-ижодий салоҳиятни янада юксалтириш ва ривожлантириш ётади.

Бугун шу мақсадда диний-маърифий соҳада амалга оширилаётган улкан ислоҳотлар, эришилаётган ютуқлар мақтовга лойиқ. Жумладан, Президентимиз ташаббуси билан Имом Бухорий меъморий мажмуаси юксак даражада ва  маҳобатли шаклда бунёд этилмоқдаки, у бир неча асрлар давомида юртимиз ва дунё мўмин-мусулмонлари учун руҳий-маънавий озиқа оладиган муҳташам даргоҳга айланади. Шунингдек, келажак авлод учун бир неча юз йиллар зиё сочадиган, ёшларга илм-маърифат нурини таратадиган осори-атиқа бўлади.

Давлатимиз етакчиси раҳбарлигида бунёд этилаётган ва Учинчи Ренессанс пойдевори, дея таърифланаётган Ислом цивилизацияси маркази ҳам буюк алломаларимизнинг жаҳон тамаддунига қўшган ҳиссаларини дунё ҳамжамиятига намоён этадиган, ислом маърифатини кенг тарқатадиган ва ёшларни улуғ алломаларга муносиб авлод қилиб тарбиялайдиган маърифат кошонаси бўлиб асрлар оша хизмат қилди, инша Аллоҳ.

Мана шу ўзгаришлар кўз ўнгимда рўй бераётгани ва ўзим ҳам унда иштирок этиб, улкан савобли ишларга сабабчи бўлаётганимдан фахрга тўламан. Бундан ўттиз йил олдин Фарғона вилоятининг Қувасой шаҳрида янги қурилган жоме масжидининг имом-хатиби сифатида ўз фаолиятимни бошлаганман. Истиқлолнинг илк даврларида вилоятимизда бор йўғи 4 масжид бор эди. Улардаги шарт-шароитлар ҳақида сўз юритишнинг ҳожати ҳам йўқ. Бугун вилоятимизда 200 дан ортиқ масжид фаолият юритяпти. Уларнинг барчаси замон талабига мос тарзда таъмирланган, бинолари янгидан бунёд этилиб, намозхонлар учун барча шароитлар ҳозирланган.

Яна бир таъкидлаш жоиз бўлган воқеа имом-хатиб ва диний соҳа ходимларининг жамиятдаги ўрни мустаҳкамланди. Олдинлари  фақат тўй-маъракалардагина кўриниш берадиган имомларимиз бугун юртимизда олиб борилаётган ислоҳотларда, уни халққа етаказишда астойдил фидойилик кўрсатмоқда. Айниқса, ёшларимизни ёт ғоялар таъсиридан асраб-авайлаш, ҳанафий мазҳабига хос диний тушунчаларни тарғиб қилиш, диндошларимиз тўғри йўлда юриши учун олиб борилган маънавий-маърифий ишларда бевосита иштирок этаётганимдан беҳад хурсандман. 

Камтарона меҳнатим юксак қадрланишидан, “Имом Бухорий” ордени билан тақдирланганимдан беҳад миннатдорман. Аслида бу мукофот нафақат менинг, балки бутун Фарғона вилоятида фаолият кўрсатаётган барча имом-хатиб ва ноибларнинг улкан меҳнати натижаси, деб ҳисоблайман.

Биз, дин пешволари бундай эътибор ва эҳтиром олдида қарздорликни мудом ҳис этамиз. Бунга жавобан юртимиз тинчлиги ва аҳоли фаровонлиги йўлида янада куч-ғайрат ва фидокорлик билан хизмат қиламиз. Шунингдек, давлатимиз раҳбари томонидан олиб борилаётган ислоҳотлар бардавом бўлишини доимо Раббимиздан сўраймиз. Зеро, Аллоҳ таоло Қуръони каримда: “Менга дуо қилинг ва сизга ижобат қилурман...”, деб марҳамат қилган.

Алишер НАИМОВ,

Фарғона вилояти бош имом-хатиби ўринбосари,

Қувасой шаҳар бош имом-хатиби

Бошқа мақолалар
Мақолалар

“Эътибор ва рағбатлар янада масъулият билан ишлашга ундамоқда”

24.09.2026   84658   10 min.
“Эътибор ва рағбатлар янада масъулият билан ишлашга ундамоқда”

Хоразм вилояти бош имом-хатиби, “Имом Бухорий” ордени соҳиби Хайруллоҳ домла Абдуллаев билан суҳбат

– Ассалому алайкум муҳтарам қози домла. Аввало, вилоят вакиллигининг кўркам янги биноси муборак бўлсин. Жуда гўзал, файзли масканга эга бўлибсизлар...

– Ва алайкум ассалом ва роҳматуллоҳ. Раҳмат, алҳамдулиллаҳ. Дарҳақиқат, бу йил вакиллик фаолиятидаги энг қувонарли янгиликлардан бири замон талаблари асосида барпо этилган янги маъмурий бинога кўчиб ўтганимиз бўлди. Албатта, бу ютуқлар замирида муҳтарам Юртбошимизнинг диний соҳага қаратаётган алоҳида эътибори турибди.

Энди вилоятдаги барча имом-хатиб ва имом-ноиблар бир жойга жамлана олади. Йиғилишлар, ўқув-семинарлар, маънавий-маърифий тадбирлар, давра суҳбатлари ва бошқа йирик тадбирларни бевосита вакилликнинг ўзида ўтказиш имкониятига эгамиз. Шунингдек, янги бинода кичик мажлислар зали, ахборот-медиа фаолияти ва тасвирга олиш учун махсус хоналар ҳам ташкил этилди.

Фаолиятимиздаги яна бир қувончли воқеа – 2025 йилда Ўзбекистон мусулмонлари идораси нашрлари бўлган «Ҳидоят», «Мўминалар» журналлари ва «Ислом нури» газетаси обунасини уюшқоқлик билан ташкил этганимиз учун вакиллигимиз дамас автомобили билан тақдирлангани бўлди. Бу эътибор ва рағбат жамоамиз учун янада катта масъулият юклади.

– Сиз илк бор Хоразм вилояти вакили сифатида фаолият бошлаган даврда ҳолат қандай эди, бугун-чи?..

- Бундан роса 11 йил олдин – 2015 йилнинг май ойида Ўзбекистон мусулмонлари идорасининг Хоразм вилояти вакили, вилоят бош имом-хатиби сифатида фаолият бошлаганман. Ўша даврда вакиллик ўз биносига эга эмасди. Фаолиятни атрофлича таҳлил қилиб, соҳадаги мавжуд ҳолат, муаммо ва эҳтиёжлардан келиб чиққан ҳолда тизимли ёндашувни талаб этадиган устувор вазифаларни белгилаб олгандик.

Ўтган йиллар давомида аниқ мақсад ва режалар асосида изчил, босқичма-босқич ишлар амалга оширилди. Энг муҳими, бу жараёнда фақат мавжуд муаммоларни бартараф этиш билан чекланиб қолмасдан, вакиллик фаолиятини замонавий талаблар асосида қайта ташкил этиш, унинг бошқарув ва назорат механизмларини такомиллаштиришга устувор аҳамият қаратилди.

Бугунги кунда вакилликда 19 нафар малакали, ўз ишининг билимдони бўлган ходим фаолият юритмоқда. Масжидлар билан ишлаш, ҳаж ва умра, ахборот-медиа, аёл-қизлар, ҳуқуқшунослик, кадрлар масалалари, молия-хўжалик каби муҳим йўналишлар бўйича бўлимлар ташкил этилди. Вакиллигимиз замонавий моддий-техник базага эга бўлиб, рақамли технологиялар ва илғор иш услубларидан самарали фойдаланиб келмоқда.

Муфтий ҳазратларининг бевосита бошчиликларида масжидларда фаолият юритаётган имом-хатиблар ва имом-ноиблари мунтазам ойлик иш ҳақи билан таъминланди. Бу эса уларнинг ижтимоий барқарорлигини мустаҳкамлаш, ўз хизмат вазифаларини сидқидилдан, хотиржам, масъулият билан адо этишлари учун муҳим омил бўлмоқда.

Вилоятга ажратиладиган ҳаж квоталари ҳам йилдан-йилга ошиб бормоқда.

– Вилоятда айни пайтда қанча масжид бор? Масжидлар ва уларда фаолият олиб бораётган имом-домлаларнинг замон билан ҳамнафас бўлиши борасида ҳам тўхталсангиз...

– Масжидлар борасида катта ўзгаришлар бор. Ҳозир вилоятимизда 98 та жоме масжид фаолият юритмоқда. Ўтган йиллар давомида 27 та масжид замон талабларига мос равишда қайта бунёд этилди, 10 дан ортиқ масжидда кенг кўламли таъмирлаш ишлари қилинди. 35 дан ортиқ таҳоратхона тўлиқ қайта қурилиб, замонавий талаблар асосида фойдаланишга топширилди.

Имом-хатиблар учун ўқув-семинарлар, малака ошириш машғулотлари, Қуръон ва тажвид бўйича амалий дарслар ташкил этилмоқда. Жумладан, 2026 йилда Хоразм вилоятида имом-хатиб ва имом ноиблар учун қироат дарслари ўтказилди.

Имом-домлаларимиз фаолияти фақат масжид ва диний маросимларни ўтказиш билан чекланиб қолмай, улар маҳалла, таълим муассасалари, меҳнат жамоалари, ёшлар, хотин-қизлар, меҳнат мигрантлари ва бошқа ижтимоий қатламлар билан яқин ҳамкорликда иш олиб бормоқда.

Имом-хатиблар учун мунтазам равишда малака ошириш курслари, ўқув-семинарлар ва амалий машғулотлар ташкил этиш йўлга қўйилди. Аҳоли билан очиқ мулоқотлар, маънавий-маърифий учрашувлар ва манзилли тарғибот ишларининг кўлами ҳам сезиларли даражада кенгайди. “Жаҳолатга қарши маърифат” ғоясини кенг тарғиб этиш, ёт ғояларга қарши маърифий иммунитетни кучайтириш, ҳуқуқбузарлик, жиноятчиликнинг олдини олиш, атроф-муҳитни асрашга қаратилган кенг кўламли тарғибот-ташвиқот тадбирлари йилига 17 мингдан ортиқни ташкил этмоқда.

Аҳоли мурожаатлари билан ишлаш, эҳтиёжманд оилалар ҳолидан хабар олиш, хайру эҳсон ва саховат тадбирларини ташкил этиш, ёшларни қўллаб-қувватлаш, оилаларда тинчлик ва тотувликни мустаҳкамлаш борасида ҳам салмоқли ишлар амалга оширилмоқда.

– Вакилликнинг бошқа ташкилотлар билан ҳамкорлиги, имом-хатиблар ва отинойиларнинг диний маълумотини ошириб бориш йўлида қилинаётган амалий ишларнинг самаралари ҳақида ҳам айтиб ўтсангиз...

– Вилоят ҳокимлиги ва тегишли давлат ташкилотлари, маҳаллий идоралар, таълим муассасалари, маҳалла фаоллари ҳамда жамоат ташкилотлари билан ўзаро ҳамкорлик асосида иш олиб борамиз. Бу ҳамкорликдан кўзланган асосий мақсад юртимиздаги тинчлик- осойишталикни асраш, жамиятда ўзаро ҳурмат ва бағрикенглик муҳитини мустаҳкамлаш, аҳоли, айниқса, ёшларни соғлом эътиқод ва миллий-маънавий қадриятлар руҳида тарбиялашга ҳисса қўшишдир.

Вакиллик тизимида 175 нафар имом-хатиб ва имом-ноиб бор. Уларнинг малакасини ошириб бориш мақсадида малака ошириш курслари билан ҳам ҳамкорлигимиз бор. Охирги бир йилда 29 нафар имом-хатиб, 22 нафар имом-ноиб Диний-маърифий соҳада малака ошириш ва қайта тайёрлаш институти ҳамда Имом Бухорий номидаги Тошкент ислом институтида малака ошириб келди.

Қиёс учун, 2015 йилда вилоятдаги имом-хатибларнинг 11 нафари олий маълумотга эга эди. Ҳозиргача 55 нафар имом-хатиб диний олий маълумотли бўлди. 8 нафар имом-хатиб ва 1 нафар имом-ноиб магистрлик даражасини олди, 3 нафар имом-хатиб эса докторантура босқичида таҳсил олмоқда. 20 нафар имом-хатиб Имом Бухорий номидаги Тошкент ислом институтида модул тизими асосида ўқияпти. Яқин истиқболда имом-хатибларимизни 100 фоиз олий диний маълумотли қилиш ниятидамиз. Шу билан биргада 8 нафар имом-хатиб томонидан 12 та диний маърифий китоблар нашр этилди.

Отинойилар фаолиятини ягона тизим асосида ташкил этишга ҳам алоҳида эътибор қаратилмоқда. Вилоятда фаолият юритаётган 281 нафар отинойининг малакасини мунтазам ошириш, иш самарадорлигини ўрганиш бўйича тизимли ишлар йўлга қўйилган. Отинойилар маҳаллаларда хотин-қизлар билан манзилли ишлаш, уларнинг диний саводхонлигини ошириш, мурожаатларини ўрганиш, оилавий муҳитни соғломлаштириш ва маънавий-маърифий муҳитни мустаҳкамлашда фаол иштирок этмоқда.

– Аҳолининг диний саводхонлигини оширишга хизмат қилаётган Қуръони карим ва тажвидни ўргатиш ўқув курси фаолияти ҳақида ҳам тўхталсангиз?

– “Имом Фахриддин ар-Розий” ўрта-махсус ислом таълим муассасасида Қуръони карим ва тажвидни ўргатиш ўқув курси фаолияти йўлга қўйилган. Тингловчиларни рўйхатга олиш китоблари рақамланиб, муҳрланган ҳамда уларни электрон шаклда юритиш ташкил этилган. Ўқув курсини муваффақиятли тамомлаган тингловчиларга сертификатлар тақдим этилади.

Бугунги кунга қадар курсларга 10 мингдан зиёд тингловчи рўйхатдан ўтган бўлиб, уларнинг 4 мингдан ортиғи ўқув курсларини муваффақиятли тамомлаган. Ўзбекистон мусулмонлари идорасининг тегишли топшириғига асосан, 2025 йилдан бошлаб Қуръони карим ва тажвидни ўргатиш курсларида ўқиш истагини билдирган 60 ёш ва ундан юқори бўлган фуқароларни навбатсиз, алоҳида квота асосида қабул қилиш йўлга қўйилди. Шунингдек, 2026 йил ёз ойларида мактаб ва олий таълим муассасаларида дарс берувчи педагогларнинг меҳнат таътили вақтлари ҳисобга олиниб, 15 та квота ташкил этилди. Бу ишлар Қуръони каримни ўрганиш истагида бўлганлар учун янада қулай имкониятдир.

– “Вақф” хайрия жамоат фонди вилоят филиали томонидан ижтимоий кўмак, масжид-мадрасаларни қўллаб-қувватлаш бўйича қандай хайрли ишлар амалга оширилмоқда?

– Шу йилнинг бошидан буён филиал томонидан ижтимоий ҳимояга муҳтож ва эҳтиёжманд 2 869 та оилага жами 5 миллиард 49 миллион 104 минг сўм миқдорида моддий ёрдам кўрсатилди. Эътиборли жиҳати, 2025 йил Рамазон ойида боқувчисини йўқотган оилаларга 3 та уй-жой қуриб берилган бўлса, айни пайтда яна 9 та уй қуриб битказилиб, уларнинг ҳужжатларини расмийлаштириш ишлари амалга оширилмоқда. Бу эзгу ишлар халқимизга хос меҳр-оқибат ва саховатнинг яна бир амалий ифодасидир.

Фонднинг хайрли ишлари таълим соҳасини ҳам қамраб олган. Хусусан, “Имом Фахриддин ар-Розий” ўрта махсус ислом таълим муассасасида таҳсил олаётган, контракт тўловини амалга оширишда қийналаётган 8 нафар талабага жами 76 миллион сўм миқдорида контракт тўловлари тўлаб берилди. Таълим муассасасининг ташқи қиёфаси ва ободлигига ҳам эътибор қаратилиб, мадраса ташқи деворларини пардозлаш ва таъмирлаш ишларига 14 миллион 904 минг сўм йўналтирилди.

Шунингдек, ҳомийларни жалб этган ҳолда, ўтган ўқув йилида талабаларнинг контракт тўловлари учун 100 миллион сўм маблағ ажратиб берилган бўлса, янги ўқув йили бошланиши муносабати билан яна 60 миллион сўм миқдорида контракт тўловларига кўмак кўрсатилди.

Масжидларни зарур жиҳозлар билан таъминлаш борасида ҳам бир қатор хайрли ишлар амалга оширилмоқда. Жумладан, 4 та масжид учун жами 67 миллион 51 минг сўмлик овоз кучайтиргич жиҳозлари олиб берилди.

Келгусида ҳам “Вақф” хайрия жамоат фонди Хоразм вилояти филиали томонидан эҳтиёжманд оилаларни қўллаб-қувватлаш, ёшларнинг таълим олишига кўмаклашиш, масжид ва мадрасаларни обод қилиш каби хайрли ташаббуслар давом эттирилади.

Умуман олганда, вакиллигимиз ва тизим ходимлари ўз фаолиятига бир марталик тадбир деб эмас, балки зиммасидаги масъулият, узлуксиз жараён сифатида ёндашмоқда.

– Мазмунли ва фойдали суҳбатингиз учун ташаккур.

ЎМИ Матбуот ва медиа бўлими ходими Абдулатиф АБДУЛЛАЕВ суҳбатлашди.

Ўзбекистон янгиликлари