Dil izhori
Alloh taologa beadad shukrlar bo‘lsinki, yurtimiz mustaqilligining 33 yilligini katta xursandchilik bilan kutib oldik. Bugun har bir go‘shada bayram shukuhi hukmron. Bu ayyom o‘zini shu Vatan farzandi deb bilgan har bir inson uchun qadrli, aziz va mo‘tabar. Chunki u bizga o‘zligimiz, insoniy haq-huquq va qadr-qimmatimizni baxsh etdi.
Eng ulug‘, eng aziz bayram arafasida Prezidentimiz farmonlariga muvofiq turli soha vakillari faxriy unvon, orden va medallar bilan taqdirlandi. Shunday fidoyi yurtdoshlarimiz qatorida uch nafar imom-xatib “Imom Buxoriy” ordeni bilan mukofotlangani barcha diniy soha vakillarini benihoya xursand qildi. Aytish joizki, yaqin o‘tmishda imom-xatiblarga bu darajada ehtirom ko‘rsatilmagan. Ushbu quvonchli voqea yangi O‘zbekistonda islom dini va soha xodimlariga qaratilayotgan e’tiborning yana bir yorqin ifodasi bo‘ldi.
Imom-xatiblar yuksak mukofotlarni 30 avgust kuni Ko‘ksaroy qarorgohida davlatimiz rahbaridan qabul qilib oldi. Quyida ularning dil so‘zlari bilan tanishasiz.
Ma’rifiy sohada ilmiy asos yaratilmoqda
— Bugun men juda ham shodman. Mana shunday ulug‘ mukofotni shaxsan davlatimiz rahbarining o‘zidan qabul qilib olish menga yuksak sharaf bo‘lish bilan birga, katta mas’uliyat ham yukladi. Mamlakatimizda Prezidentimiz rahbarligida barcha sohalarda inson qadri va uning sha’nini yuksaltirish borasida olib borilayotgan izchil islohotlarning samaralarini birma-bir sanab adog‘iga yetish mushkul.
O‘zbekiston zamini islom ilm-fani va madaniyatining qadimiy beshiklaridan biri hisoblanadi. Xalqimizning boy tarixiy, ilmiy, ma’naviy merosini har tomonlama o‘rganish, jahon hamjamiyatiga keng tanitish, eng muhimi, islom dinining asl insonparvarlik mohiyatini chuqur ochib berish maqsadida yurtimizda Imom Buxoriy, Imom Termiziy, Imom Moturidiy, Imom Nasafiy kabi buyuk allomalarimizning bebaho ilmiy maktabini o‘rganish va tadqiq etish uchun ilmiy-tadqiqot markazlari faoliyati keng yo‘lga qo‘yildi.
Dinimizni ilmiy jihatdan o‘rganishni rivojlantirish maqsadida O‘zbekiston xalqaro islom akademiyasi, Buxoroda Mir Arab oliy madrasasi, Samarqandda Hadis ilmi maktabi va Surxondaryoda Imom Termiziy nomidagi islom instituti hamda shu nomdagi madrasaga asos solindi. Samarqandda Imom Buxoriy, Surxondaryoda Imom Termiziy, Toshkentda Imom Moturidiy xalqaro ilmiy-tadqiqot markazlari tashkil etildi. Ularda talabalar va yosh tadqiqotchilar buyuk ajdodlarimizning boy merosini o‘rganish va tadqiq etish barobarida zamonaviy ilmlarni ham o‘zlashtirib, yetuk olim bo‘lib kamol topadi. Shular qatorida turli hududlarda hadis, kalom, tasavvuf, fiqhni o‘rganishga ixtisoslashgan ilmiy maktablar, xususan, bizning viloyatimizda ham tasavvuf ilmi maktabi faoliyati yo‘lga qo‘yilgani diniy-ma’rifiy sohada yangi davr boshlaganidan darak beradi.
Quvonarlisi, mamlakatimiz rahbarining tashabbusi bilan Buxoro Ark qo‘rg‘oni yaqinida Mir Arab oliy madrasasining yangi binosi barpo etildi va foydalanishga topshirildi. 200 o‘ringa mo‘ljallangan oliy madrasada Qur’oni karim, hadis, fiqh va tasavvuf ilmlari, xorijiy tillar puxta o‘rgatiladi. Bugungi kunda 100 nafardan ortiq talaba zamonaviy jihozlangan o‘quv xonalari, kutubxona, faollar zali, talabalar yotoqxonasi va sport zalida malakali ustozlardan ta’lim olmoqda.
2021–2024 yillarda viloyatimizdagi 15 ta masjidning yangitdan qurib foydalanishga topshirilgani, 42 ta masjidda esa yirik ta’mirlash ishlari olib borilgani mamlakatimizda muborak dinimizga qaratilayotgan alohida e’tiborning isbotidir.
Mustaqillik bayrami arafasida shunday ulug‘ e’tirofga sazovor bo‘lish, menga cheksiz g‘urur bag‘ishladi. Kelajak avlodni yangi O‘zbekistonning chinakam bunyodkori qilib tarbiyalash, xalqimizning madaniy-ma’rifiy, diniy-axloqiy dunyoqarashini boyitish yo‘lidagi faoliyatimda bu mukofot menga qanot bag‘ishlaydi, deya ishonch bilan ayta olaman.
Jobir domla ELOV,
O‘zbekiston musulmonlari idorasining
Buxoro viloyatidagi vakili,
Buxoro viloyati bosh imom-xatibi,
Mir Arab oliy madrasasi rektori
* * *
Ajdodlarimizning o‘lmas merosi chuqur o‘rganilmoqda
— Bugun juda baxtiyorman. Eng ulug‘, eng aziz bayram — mustaqilligimizning 33 yilligi arafasida davlatimizning eng yuksak mukofotlaridan biri “Imom Buxoriy” ordeni bilan taqdirlanganimdan quvonchim cheksiz, so‘z bilan ta’riflashga ojizman. Prezidentimiz tashabbusi bilan ta’sis etilgan ordenga birinchilardan bo‘lib loyiq ko‘rilganimdan, yuksak mukofotni davlat rahbarining o‘z qo‘lidan olganimdan boshim ko‘kka yetdi.
Turli sohalarda erishilayotgan barcha yutuqlar vatanimizda hukm surayotgan tinchlik va osoyishtalik, odilona siyosat natijasidir. Islom dini ilmlari rivojiga beqiyos hissa qo‘shgan buyuk vatandoshlarimizning ulkan ilmiy merosini yanada chuqur o‘rganish, tabarruk ziyoratgoh va qadamjolar, ko‘hna masjid va madrasalarni obod qilish borasida keng ko‘lamli ishlar amalga oshirilmoqda. Viloyatimizda o‘nlab yangi masjidlar qurildi, mavjudlarida qayta qurish va ta’mirlash ishlari olib borilyapti. Misol uchun, bir vaqtlar yo‘q bo‘lib ketish arafasida turgan Abul Muin Nasafiy ziyoratgohini bugun butun dunyo sayyohlari katta zavq va hayrat bilan tomosha qilmoqda.
Mazkur majmuada Abul Muin Nasafiy ilmiy merosiga bag‘ishlab o‘tkazilgan xalqaro ilmiy-amaliy konferensiyalarda Turkiya, Misr, Fransiya, Rossiya, Bangladesh, Qozog‘iston, Tojikiston, Qirg‘iziston kabi davlatlardan yuzlab olim va kalomshunos mutaxassislar ishtirok etib, yurtimizda e’tiqod erkinligini ta’minlashga qaratilayotgan e’tiborni yuksak baholadi. Shuningdek, Kasbi tumanidagi Sulton Mir Haydar, Kitob tumanidagi Xo‘ja Ilm Koni va Mavlono Darvesh Muhammad Vaxshuvoriy, Qamashi tumanidagi Langar ota majmualarini rekonstruksiya va restavratsiya qilish ishlari amalga oshirildi.
Mustaqillikning dastlabki yillarida muborak haj amalini ado etishga muyassar bo‘lgan vatandoshlarimiz soni barmoq bilan sanoqli bo‘lgan. Bugungi kunda vijdon erkinligi va diniy-ma’rifiy muhit barqarorligini ta’minlashga qaratilayotgan alohida e’tibor tufayli ularning soni 15 mingdan oshdi. Joriy yilda faqat Qashqadaryo viloyatining o‘zidan 801 nafar fuqaro haj amallarini bajarib keldi.
Haj mavsumida Prezidentimiz hojilar holidan xabar olib, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari bilan telefon orqali muloqot qilgani nafaqat haj ziyoratiga borganlarni, ularning oila a’zolarini, barcha mo‘min-musulmonlarimizni behad quvontirdi.
Bunday g‘amxo‘rlikdan ruhlangan hojilarimiz, viloyatimizdagi barcha jome masjidlar imom-xatiblari va ularning noiblari “Yangi O‘zbekiston fidoyisi bo‘lib, ma’naviyat targ‘ibotchisiga aylanamiz” shiori ostida xayrli amallarni bajarishmoqda.
Rahmatullo USMONOV,
O‘zbekiston musulmonlari idorasining
Qashqadaryo viloyatidagi vakili,
viloyat bosh imom-xatibi
* * *
Yuksak ma’naviy-axloqiy jamiyat barpo etish yo‘lida
Ko‘ksaroy qarorgohida mamlakatimizda ko‘zga ko‘ringan ilm-fan, ta’lim, sog‘liqni saqlash, adabiyot, madaniyat vakillari qatorida davlat mukofoti bilan taqdirlanganim menga cheksiz faxru iftixor bag‘ishladi.
Yaratganga behad shukrlar bo‘lsinki, yurtimizda Istiqlol bayrog‘i ostida xalqimizning yurt ravnaqi yo‘lidagi azaliy istaklarini ro‘yobga chiqa boshladi. Bu, albatta, o‘z-o‘zidan bo‘lib qolmaydi. Davlatimiz rahbari boshchiligida jamiyat hayotining barcha jabhalarida olib borilayotgan islohotlarning tub mohiyati, eng avvalo, inson manfaatiga qaratilgan bo‘lib, ularning negizida farovon turmush, ilm-fan ravnaqi, yuksak ma’naviy-axloqiy, ilmiy-ijodiy salohiyatni yanada yuksaltirish va rivojlantirish yotadi.
Bugun shu maqsadda diniy-ma’rifiy sohada amalga oshirilayotgan ulkan islohotlar, erishilayotgan yutuqlar maqtovga loyiq. Jumladan, Prezidentimiz tashabbusi bilan Imom Buxoriy me’moriy majmuasi yuksak darajada va mahobatli shaklda bunyod etilmoqdaki, u bir necha asrlar davomida yurtimiz va dunyo mo‘min-musulmonlari uchun ruhiy-ma’naviy oziqa oladigan muhtasham dargohga aylanadi. Shuningdek, kelajak avlod uchun bir necha yuz yillar ziyo sochadigan, yoshlarga ilm-ma’rifat nurini taratadigan osori-atiqa bo‘ladi.
Davlatimiz yetakchisi rahbarligida bunyod etilayotgan va Uchinchi Renessans poydevori, deya ta’riflanayotgan Islom sivilizatsiyasi markazi ham buyuk allomalarimizning jahon tamadduniga qo‘shgan hissalarini dunyo hamjamiyatiga namoyon etadigan, islom ma’rifatini keng tarqatadigan va yoshlarni ulug‘ allomalarga munosib avlod qilib tarbiyalaydigan ma’rifat koshonasi bo‘lib asrlar osha xizmat qildi, insha Alloh.
Mana shu o‘zgarishlar ko‘z o‘ngimda ro‘y berayotgani va o‘zim ham unda ishtirok etib, ulkan savobli ishlarga sababchi bo‘layotganimdan faxrga to‘laman. Bundan o‘ttiz yil oldin Farg‘ona viloyatining Quvasoy shahrida yangi qurilgan jome masjidining imom-xatibi sifatida o‘z faoliyatimni boshlaganman. Istiqlolning ilk davrlarida viloyatimizda bor yo‘g‘i 4 masjid bor edi. Ulardagi shart-sharoitlar haqida so‘z yuritishning hojati ham yo‘q. Bugun viloyatimizda 200 dan ortiq masjid faoliyat yurityapti. Ularning barchasi zamon talabiga mos tarzda ta’mirlangan, binolari yangidan bunyod etilib, namozxonlar uchun barcha sharoitlar hozirlangan.
Yana bir ta’kidlash joiz bo‘lgan voqea imom-xatib va diniy soha xodimlarining jamiyatdagi o‘rni mustahkamlandi. Oldinlari faqat to‘y-ma’rakalardagina ko‘rinish beradigan imomlarimiz bugun yurtimizda olib borilayotgan islohotlarda, uni xalqqa yetakazishda astoydil fidoyilik ko‘rsatmoqda. Ayniqsa, yoshlarimizni yot g‘oyalar ta’siridan asrab-avaylash, hanafiy mazhabiga xos diniy tushunchalarni targ‘ib qilish, dindoshlarimiz to‘g‘ri yo‘lda yurishi uchun olib borilgan ma’naviy-ma’rifiy ishlarda bevosita ishtirok etayotganimdan behad xursandman.
Kamtarona mehnatim yuksak qadrlanishidan, “Imom Buxoriy” ordeni bilan taqdirlanganimdan behad minnatdorman. Aslida bu mukofot nafaqat mening, balki butun Farg‘ona viloyatida faoliyat ko‘rsatayotgan barcha imom-xatib va noiblarning ulkan mehnati natijasi, deb hisoblayman.
Biz, din peshvolari bunday e’tibor va ehtirom oldida qarzdorlikni mudom his etamiz. Bunga javoban yurtimiz tinchligi va aholi farovonligi yo‘lida yanada kuch-g‘ayrat va fidokorlik bilan xizmat qilamiz. Shuningdek, davlatimiz rahbari tomonidan olib borilayotgan islohotlar bardavom bo‘lishini doimo Rabbimizdan so‘raymiz. Zero, Alloh taolo Qur’oni karimda: “Menga duo qiling va sizga ijobat qilurman...”, deb marhamat qilgan.
Alisher NAIMOV,
Farg‘ona viloyati bosh imom-xatibi o‘rinbosari,
Quvasoy shahar bosh imom-xatibi
Xorazm viloyati bosh imom-xatibi, “Imom Buxoriy” ordeni sohibi Xayrulloh domla Abdullayev bilan suhbat
– Assalomu alaykum muhtaram qozi domla. Avvalo, viloyat vakilligining ko‘rkam yangi binosi muborak bo‘lsin. Juda go‘zal, fayzli maskanga ega bo‘libsizlar...
– Va alaykum assalom va rohmatulloh. Rahmat, alhamdulillah. Darhaqiqat, bu yil vakillik faoliyatidagi eng quvonarli yangiliklardan biri zamon talablari asosida barpo etilgan yangi ma’muriy binoga ko‘chib o‘tganimiz bo‘ldi. Albatta, bu yutuqlar zamirida muhtaram Yurtboshimizning diniy sohaga qaratayotgan alohida e’tibori turibdi.
Endi viloyatdagi barcha imom-xatib va imom-noiblar bir joyga jamlana oladi. Yig‘ilishlar, o‘quv-seminarlar, ma’naviy-ma’rifiy tadbirlar, davra suhbatlari va boshqa yirik tadbirlarni bevosita vakillikning o‘zida o‘tkazish imkoniyatiga egamiz. Shuningdek, yangi binoda kichik majlislar zali, axborot-media faoliyati va tasvirga olish uchun maxsus xonalar ham tashkil etildi.
Faoliyatimizdagi yana bir quvonchli voqea – 2025 yilda O‘zbekiston musulmonlari idorasi nashrlari bo‘lgan «Hidoyat», «Mo‘minalar» jurnallari va «Islom nuri» gazetasi obunasini uyushqoqlik bilan tashkil etganimiz uchun vakilligimiz damas avtomobili bilan taqdirlangani bo‘ldi. Bu e’tibor va rag‘bat jamoamiz uchun yanada katta mas’uliyat yukladi.
– Siz ilk bor Xorazm viloyati vakili sifatida faoliyat boshlagan davrda holat qanday edi, bugun-chi?..
- Bundan rosa 11 yil oldin – 2015 yilning may oyida O‘zbekiston musulmonlari idorasining Xorazm viloyati vakili, viloyat bosh imom-xatibi sifatida faoliyat boshlaganman. O‘sha davrda vakillik o‘z binosiga ega emasdi. Faoliyatni atroflicha tahlil qilib, sohadagi mavjud holat, muammo va ehtiyojlardan kelib chiqqan holda tizimli yondashuvni talab etadigan ustuvor vazifalarni belgilab olgandik.
O‘tgan yillar davomida aniq maqsad va rejalar asosida izchil, bosqichma-bosqich ishlar amalga oshirildi. Eng muhimi, bu jarayonda faqat mavjud muammolarni bartaraf etish bilan cheklanib qolmasdan, vakillik faoliyatini zamonaviy talablar asosida qayta tashkil etish, uning boshqaruv va nazorat mexanizmlarini takomillashtirishga ustuvor ahamiyat qaratildi.
Bugungi kunda vakillikda 19 nafar malakali, o‘z ishining bilimdoni bo‘lgan xodim faoliyat yuritmoqda. Masjidlar bilan ishlash, haj va umra, axborot-media, ayol-qizlar, huquqshunoslik, kadrlar masalalari, moliya-xo‘jalik kabi muhim yo‘nalishlar bo‘yicha bo‘limlar tashkil etildi. Vakilligimiz zamonaviy moddiy-texnik bazaga ega bo‘lib, raqamli texnologiyalar va ilg‘or ish uslublaridan samarali foydalanib kelmoqda.
Muftiy hazratlarining bevosita boshchiliklarida masjidlarda faoliyat yuritayotgan imom-xatiblar va imom-noiblari muntazam oylik ish haqi bilan ta’minlandi. Bu esa ularning ijtimoiy barqarorligini mustahkamlash, o‘z xizmat vazifalarini sidqidildan, xotirjam, mas’uliyat bilan ado etishlari uchun muhim omil bo‘lmoqda.
Viloyatga ajratiladigan haj kvotalari ham yildan-yilga oshib bormoqda.
– Viloyatda ayni paytda qancha masjid bor? Masjidlar va ularda faoliyat olib borayotgan imom-domlalarning zamon bilan hamnafas bo‘lishi borasida ham to‘xtalsangiz...
– Masjidlar borasida katta o‘zgarishlar bor. Hozir viloyatimizda 98 ta jome masjid faoliyat yuritmoqda. O‘tgan yillar davomida 27 ta masjid zamon talablariga mos ravishda qayta bunyod etildi, 10 dan ortiq masjidda keng ko‘lamli ta’mirlash ishlari qilindi. 35 dan ortiq tahoratxona to‘liq qayta qurilib, zamonaviy talablar asosida foydalanishga topshirildi.
Imom-xatiblar uchun o‘quv-seminarlar, malaka oshirish mashg‘ulotlari, Qur’on va tajvid bo‘yicha amaliy darslar tashkil etilmoqda. Jumladan, 2026 yilda Xorazm viloyatida imom-xatib va imom noiblar uchun qiroat darslari o‘tkazildi.
Imom-domlalarimiz faoliyati faqat masjid va diniy marosimlarni o‘tkazish bilan cheklanib qolmay, ular mahalla, ta’lim muassasalari, mehnat jamoalari, yoshlar, xotin-qizlar, mehnat migrantlari va boshqa ijtimoiy qatlamlar bilan yaqin hamkorlikda ish olib bormoqda.
Imom-xatiblar uchun muntazam ravishda malaka oshirish kurslari, o‘quv-seminarlar va amaliy mashg‘ulotlar tashkil etish yo‘lga qo‘yildi. Aholi bilan ochiq muloqotlar, ma’naviy-ma’rifiy uchrashuvlar va manzilli targ‘ibot ishlarining ko‘lami ham sezilarli darajada kengaydi. “Jaholatga qarshi ma’rifat” g‘oyasini keng targ‘ib etish, yot g‘oyalarga qarshi ma’rifiy immunitetni kuchaytirish, huquqbuzarlik, jinoyatchilikning oldini olish, atrof-muhitni asrashga qaratilgan keng ko‘lamli targ‘ibot-tashviqot tadbirlari yiliga 17 mingdan ortiqni tashkil etmoqda.
Aholi murojaatlari bilan ishlash, ehtiyojmand oilalar holidan xabar olish, xayru ehson va saxovat tadbirlarini tashkil etish, yoshlarni qo‘llab-quvvatlash, oilalarda tinchlik va totuvlikni mustahkamlash borasida ham salmoqli ishlar amalga oshirilmoqda.
– Vakillikning boshqa tashkilotlar bilan hamkorligi, imom-xatiblar va otinoyilarning diniy ma’lumotini oshirib borish yo‘lida qilinayotgan amaliy ishlarning samaralari haqida ham aytib o‘tsangiz...
– Viloyat hokimligi va tegishli davlat tashkilotlari, mahalliy idoralar, ta’lim muassasalari, mahalla faollari hamda jamoat tashkilotlari bilan o‘zaro hamkorlik asosida ish olib boramiz. Bu hamkorlikdan ko‘zlangan asosiy maqsad yurtimizdagi tinchlik- osoyishtalikni asrash, jamiyatda o‘zaro hurmat va bag‘rikenglik muhitini mustahkamlash, aholi, ayniqsa, yoshlarni sog‘lom e’tiqod va milliy-ma’naviy qadriyatlar ruhida tarbiyalashga hissa qo‘shishdir.
Vakillik tizimida 175 nafar imom-xatib va imom-noib bor. Ularning malakasini oshirib borish maqsadida malaka oshirish kurslari bilan ham hamkorligimiz bor. Oxirgi bir yilda 29 nafar imom-xatib, 22 nafar imom-noib Diniy-ma’rifiy sohada malaka oshirish va qayta tayyorlash instituti hamda Imom Buxoriy nomidagi Toshkent islom institutida malaka oshirib keldi.
Qiyos uchun, 2015 yilda viloyatdagi imom-xatiblarning 11 nafari oliy ma’lumotga ega edi. Hozirgacha 55 nafar imom-xatib diniy oliy ma’lumotli bo‘ldi. 8 nafar imom-xatib va 1 nafar imom-noib magistrlik darajasini oldi, 3 nafar imom-xatib esa doktorantura bosqichida tahsil olmoqda. 20 nafar imom-xatib Imom Buxoriy nomidagi Toshkent islom institutida modul tizimi asosida o‘qiyapti. Yaqin istiqbolda imom-xatiblarimizni 100 foiz oliy diniy ma’lumotli qilish niyatidamiz. Shu bilan birgada 8 nafar imom-xatib tomonidan 12 ta diniy ma’rifiy kitoblar nashr etildi.
Otinoyilar faoliyatini yagona tizim asosida tashkil etishga ham alohida e’tibor qaratilmoqda. Viloyatda faoliyat yuritayotgan 281 nafar otinoyining malakasini muntazam oshirish, ish samaradorligini o‘rganish bo‘yicha tizimli ishlar yo‘lga qo‘yilgan. Otinoyilar mahallalarda xotin-qizlar bilan manzilli ishlash, ularning diniy savodxonligini oshirish, murojaatlarini o‘rganish, oilaviy muhitni sog‘lomlashtirish va ma’naviy-ma’rifiy muhitni mustahkamlashda faol ishtirok etmoqda.
– Aholining diniy savodxonligini oshirishga xizmat qilayotgan Qur’oni karim va tajvidni o‘rgatish o‘quv kursi faoliyati haqida ham to‘xtalsangiz?
– “Imom Faxriddin ar-Roziy” o‘rta-maxsus islom ta’lim muassasasida Qur’oni karim va tajvidni o‘rgatish o‘quv kursi faoliyati yo‘lga qo‘yilgan. Tinglovchilarni ro‘yxatga olish kitoblari raqamlanib, muhrlangan hamda ularni elektron shaklda yuritish tashkil etilgan. O‘quv kursini muvaffaqiyatli tamomlagan tinglovchilarga sertifikatlar taqdim etiladi.
Bugungi kunga qadar kurslarga 10 mingdan ziyod tinglovchi ro‘yxatdan o‘tgan bo‘lib, ularning 4 mingdan ortig‘i o‘quv kurslarini muvaffaqiyatli tamomlagan. O‘zbekiston musulmonlari idorasining tegishli topshirig‘iga asosan, 2025 yildan boshlab Qur’oni karim va tajvidni o‘rgatish kurslarida o‘qish istagini bildirgan 60 yosh va undan yuqori bo‘lgan fuqarolarni navbatsiz, alohida kvota asosida qabul qilish yo‘lga qo‘yildi. Shuningdek, 2026 yil yoz oylarida maktab va oliy ta’lim muassasalarida dars beruvchi pedagoglarning mehnat ta’tili vaqtlari hisobga olinib, 15 ta kvota tashkil etildi. Bu ishlar Qur’oni karimni o‘rganish istagida bo‘lganlar uchun yanada qulay imkoniyatdir.
– “Vaqf” xayriya jamoat fondi viloyat filiali tomonidan ijtimoiy ko‘mak, masjid-madrasalarni qo‘llab-quvvatlash bo‘yicha qanday xayrli ishlar amalga oshirilmoqda?
– Shu yilning boshidan buyon filial tomonidan ijtimoiy himoyaga muhtoj va ehtiyojmand 2 869 ta oilaga jami 5 milliard 49 million 104 ming so‘m miqdorida moddiy yordam ko‘rsatildi. E’tiborli jihati, 2025 yil Ramazon oyida boquvchisini yo‘qotgan oilalarga 3 ta uy-joy qurib berilgan bo‘lsa, ayni paytda yana 9 ta uy qurib bitkazilib, ularning hujjatlarini rasmiylashtirish ishlari amalga oshirilmoqda. Bu ezgu ishlar xalqimizga xos mehr-oqibat va saxovatning yana bir amaliy ifodasidir.
Fondning xayrli ishlari ta’lim sohasini ham qamrab olgan. Xususan, “Imom Faxriddin ar-Roziy” o‘rta maxsus islom ta’lim muassasasida tahsil olayotgan, kontrakt to‘lovini amalga oshirishda qiynalayotgan 8 nafar talabaga jami 76 million so‘m miqdorida kontrakt to‘lovlari to‘lab berildi. Ta’lim muassasasining tashqi qiyofasi va obodligiga ham e’tibor qaratilib, madrasa tashqi devorlarini pardozlash va ta’mirlash ishlariga 14 million 904 ming so‘m yo‘naltirildi.
Shuningdek, homiylarni jalb etgan holda, o‘tgan o‘quv yilida talabalarning kontrakt to‘lovlari uchun 100 million so‘m mablag‘ ajratib berilgan bo‘lsa, yangi o‘quv yili boshlanishi munosabati bilan yana 60 million so‘m miqdorida kontrakt to‘lovlariga ko‘mak ko‘rsatildi.
Masjidlarni zarur jihozlar bilan ta’minlash borasida ham bir qator xayrli ishlar amalga oshirilmoqda. Jumladan, 4 ta masjid uchun jami 67 million 51 ming so‘mlik ovoz kuchaytirgich jihozlari olib berildi.
Kelgusida ham “Vaqf” xayriya jamoat fondi Xorazm viloyati filiali tomonidan ehtiyojmand oilalarni qo‘llab-quvvatlash, yoshlarning ta’lim olishiga ko‘maklashish, masjid va madrasalarni obod qilish kabi xayrli tashabbuslar davom ettiriladi.
Umuman olganda, vakilligimiz va tizim xodimlari o‘z faoliyatiga bir martalik tadbir deb emas, balki zimmasidagi mas’uliyat, uzluksiz jarayon sifatida yondashmoqda.
– Mazmunli va foydali suhbatingiz uchun tashakkur.
O‘MI Matbuot va media bo‘limi xodimi Abdulatif ABDULLAYEV suhbatlashdi.