Бир қизалоқ тақинчоқ дўконига кириб сотувчига қараб чиройли зирак кўрсатишини сўради. Сотувчи қизалоққа ҳайратланганча қараб тураверди. Шунда қизалоқ бир зиракни кўрсатиб: “Мана буни чиройли қилиб ўраб бероласизми?!”, деди. Сотувчи: “Пулинг борми?” деб сўради.
Қизалоқ чўнтагидаги бир нечта тангани чиқариб,:“Бор пулим шу, етадими?” деб сўради. Сўнгра у: “Биласизми, мен опамга шу зиракни совға қилмоқчиман. Чунки у онамиз оламдан ўтганидан кейин бизга ғамхўрлик қилиб келмоқда. Мен опамни хурсанд қилишни жуда хоҳлардим. Менда бори шу”, деди пулга ишора қилиб.
Бир неча сониядан сўнг сотувчи зиракни чиройли қутига солиб, қизчанинг қўлига берди. У хурсанд бўлганича уйига шошиб кетди.
Бир фурсатдан сўнг дўконга бир ўрта ёшли қиз кириб, дўкончига ўша қизалоқ олган зиракни кўрсатиб: “Буни сиздан олганмиди?” деб сўради. Сотувчи тақинчоқга қараб: “Ҳа” деб жавоб берди. Қиз тақинчоқни нархи қанчалигини сўради. Сотувчи: “Бу харидор ва менинг келишувим” деб жавоб қилди. У: “Синглимда бир неча танга бор эди. Бу эса жудаям қимматлигини биламан. Бунга пулимиз етмайди” деб зиракни қайтариб бермоқчи бўлди.
Шунда сотувчи: “Синглингиз бор будини берди. Бу нархни ҳеч ким бера олмайди”, дея тақинчоқни қизга қайтариб берди.
Акбаршоҳ Расулов таржимаси
Шу йилнинг 9–11 ноябрь кунлари Тошкент шаҳрида республикамиз бўйлаб фаолият олиб бораётган салоҳиятли ва фидойи ёш диний соҳа ходимлари учун “Тенгдош-тенгдошга” тамойили асосида илмий-амалий ўқув машғулотлари ўтказилмоқда.
Ушбу лойиҳанинг асосий мақсади — ёш кадрларнинг ўз тенгдошлари билан маърифий-профилактик ишларни ташкил этиш кўникмаларини мустаҳкамлаш, уларнинг диний ва ижтимоий-маънавий билимларини янада бойитишдан иборат.
Бугун мазкур амалиёт дастури доирасида иштирокчилар пойтахтимиздаги муҳим диний-маърифий муассасаларда бўлиб, ўз тажрибаларини оширдилар:
Хусусан, дастлаб Ўзбекистон мусулмонлари идораси ва Фатво марказида бўлган ёш мутахассислар бугунги кундаги долзарб масалалар юзасидан фатволар ишлаб чиқиш ва уларга илмий ечим топиш жараёнлари билан бевосита яқиндан танишди.
Шунингдек, иштирокчилар Тошкент ислом институтига ташриф буюриб, олийгоҳдаги ёшлар билан ишлаш тизими, маънавий-маърифий ишлар самарадорлиги ҳамда талабаларнинг дуал таълим шаклидаги фаолияти ҳақида батафсил маълумот олди.
Ташрифлар давомида соҳа мутасаддилари томонидан муассасалар фаолияти, улардаги янгиликлар ва замонавий иш услублари ҳақида атрофлича тушунча берилди.
Қизғин савол-жавоб ва очиқ мулоқот руҳида ўтган бугунги машғулотлар ёш кадрлар учун ҳақиқий тажриба мактаби вазифасини ўтади.
Мазкур амалий ўқувлар 11 ноябрга қадар давом этади.
Ўзбекистон мусулмонлари идораси
Матбуот хизмати