Bir qizaloq taqinchoq do‘koniga kirib sotuvchiga qarab chiroyli zirak ko‘rsatishini so‘radi. Sotuvchi qizaloqqa hayratlangancha qarab turaverdi. Shunda qizaloq bir zirakni ko‘rsatib: “Mana buni chiroyli qilib o‘rab berolasizmi?!”, dedi. Sotuvchi: “Puling bormi?” deb so‘radi.
Qizaloq cho‘ntagidagi bir nechta tangani chiqarib,:“Bor pulim shu, yetadimi?” deb so‘radi. So‘ngra u: “Bilasizmi, men opamga shu zirakni sovg‘a qilmoqchiman. Chunki u onamiz olamdan o‘tganidan keyin bizga g‘amxo‘rlik qilib kelmoqda. Men opamni xursand qilishni juda xohlardim. Menda bori shu”, dedi pulga ishora qilib.
Bir necha soniyadan so‘ng sotuvchi zirakni chiroyli qutiga solib, qizchaning qo‘liga berdi. U xursand bo‘lganicha uyiga shoshib ketdi.
Bir fursatdan so‘ng do‘konga bir o‘rta yoshli qiz kirib, do‘konchiga o‘sha qizaloq olgan zirakni ko‘rsatib: “Buni sizdan olganmidi?” deb so‘radi. Sotuvchi taqinchoqga qarab: “Ha” deb javob berdi. Qiz taqinchoqni narxi qanchaligini so‘radi. Sotuvchi: “Bu xaridor va mening kelishuvim” deb javob qildi. U: “Singlimda bir necha tanga bor edi. Bu esa judayam qimmatligini bilaman. Bunga pulimiz yetmaydi” deb zirakni qaytarib bermoqchi bo‘ldi.
Shunda sotuvchi: “Singlingiz bor budini berdi. Bu narxni hech kim bera olmaydi”, deya taqinchoqni qizga qaytarib berdi.
Akbarshoh Rasulov tarjimasi
Shu yilning 9–11 noyabr kunlari Toshkent shahrida respublikamiz bo‘ylab faoliyat olib borayotgan salohiyatli va fidoyi yosh diniy soha xodimlari uchun “Tengdosh-tengdoshga” tamoyili asosida ilmiy-amaliy o‘quv mashg‘ulotlari o‘tkazilmoqda.
Ushbu loyihaning asosiy maqsadi — yosh kadrlarning o‘z tengdoshlari bilan ma’rifiy-profilaktik ishlarni tashkil etish ko‘nikmalarini mustahkamlash, ularning diniy va ijtimoiy-ma’naviy bilimlarini yanada boyitishdan iborat.
Bugun mazkur amaliyot dasturi doirasida ishtirokchilar poytaxtimizdagi muhim diniy-ma’rifiy muassasalarda bo‘lib, o‘z tajribalarini oshirdilar:
Xususan, dastlab O‘zbekiston musulmonlari idorasi va Fatvo markazida bo‘lgan yosh mutaxassislar bugungi kundagi dolzarb masalalar yuzasidan fatvolar ishlab chiqish va ularga ilmiy yechim topish jarayonlari bilan bevosita yaqindan tanishdi.
Shuningdek, ishtirokchilar Toshkent islom institutiga tashrif buyurib, oliygohdagi yoshlar bilan ishlash tizimi, ma’naviy-ma’rifiy ishlar samaradorligi hamda talabalarning dual ta’lim shaklidagi faoliyati haqida batafsil ma’lumot oldi.
Tashriflar davomida soha mutasaddilari tomonidan muassasalar faoliyati, ulardagi yangiliklar va zamonaviy ish uslublari haqida atroflicha tushuncha berildi.
Qizg‘in savol-javob va ochiq muloqot ruhida o‘tgan bugungi mashg‘ulotlar yosh kadrlar uchun haqiqiy tajriba maktabi vazifasini o‘tadi.
Mazkur amaliy o‘quvlar 11 noyabrga qadar davom etadi.
O‘zbekiston musulmonlari idorasi
Matbuot xizmati