Абу Дардо розияллоҳу анҳудан ривоят қилинади:
"У киши Расулуллоҳ соллаллоҳу алайҳи васалламнинг: "Ким илм талаб қилиш йўлига юрса, Аллоҳ унга жаннат йўлини осон қилиб қўяди. Албатта, фаришталар толиби илмни рози қилиш учун қанотларини қўядилар. Албатта, олимга осмондаги зотлар, ердаги зотлар, ҳатто сувдаги балиқлар ҳам истиғфор айтадилар. Олимнинг обиддан фазли худди ойнинг бошқа юлдузлардан фазлига ўхшайди. Албатта, олимлар анбиёларнинг меросхўрларидир. Албатта, анбиёлар динорни ҳам, дирҳамни ҳам мерос қолдирмаганлар. Албатта, улар илмни мерос қолдирганлар. Ким ўшани олса, улуғ насибани олибди", деганларини эшитдим, деган эканлар".
Абу Довуд ва Термизий ривояти
Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ташаббуси билан юртимизда қорилар ва отинойиларнинг Қуръони карим тиловати бўйича билим ҳамда маҳоратини юксалтиришга қаратилган махсус ўқув курслари тизимли равишда ташкил этилмоқда.
Хусусан, юртимизда илк бор Рамазон ойидаги хатми Қуръон тадбирларида иштирок этувчи қорилар учун йўлга қўйилган малака ошириш курслари қизғин давом этмоқда. Шу йилнинг 18 ноябрь куни Диний идоранинг «Қуръон ва тажвидни ўргатиш» бўлими бошлиғи Шайх Али Файзуллоҳ Махдум Тошкент шаҳридаги «Шайх Зайниддин» жоме масжидида ўтаётган машғулотлар жараёни билан яқиндан танишди.
Танишув давомида қориларнинг тиловат маҳорати ва тайёргарлик даражаси кўздан кечирилиб, муборак ой тадбирларини юксак савияда ўтказиш юзасидан муҳим тавсиялар берилди. Маълумот ўрнида, курсларни муваффақиятли тамомлаган қориларга Рамазон ойидаги хатми Қуръонларда иштирок этиш ҳуқуқини берувчи махсус сертификатлар топширилиши режалаштирилган.
Шу билан бирга, Диний идоранинг буйруғи асосида «Қуръон ва тажвидни ўргатиш» ҳамда Хотин-қизлар масалалари бўйича бўлимлари ҳамкорлигида отинойилар учун ҳам ўқув жараёнлари давом эттирилмоқда. Жорий йилнинг 16 ноябридан Имом Бухорий номидаги Тошкент ислом институтида 3 ойлик «Тажвид» амалий машғулотларининг 2-давраси ўз ишини бошлади.
Ушбу дарслар отинойиларнинг диний билим ва илмий савиясини ошириш, тиловатини тажвид қоидалари асосида сайқаллаш ҳамда Қуръон илмини халқимизга, айниқса хотин-қизларга пухта ва гўзал етказишда муҳим аҳамият касб этади.
Ўзбекистон мусулмонлари идораси Матбуот хизмати