Жорий йилнинг 6 май куни Ўзбекистон мусулмонлари идорасининг Қашқадарё вилоятидаги вакили, вилоят бош имом-хатиби Рахматилло домла Усмонов Чироқчи туманидаги "Ҳазрати Умар" жоме масжидида сайёр семинар ўтказди. Тадбирда туман бош имом-хатиблари ҳамда Чироқчи ва Кўкдала тумани имом-хатиблари иштирок этди.

Семинарда 2026 йилнинг биринчи тўрт ойи давомида ҳудудларда олиб борилган маънавий-маърифий ишлар, аҳоли билан мулоқот самарадорлиги ҳамда ёшлар тарбиясига доир масалалар муҳокама қилинди.

Устувор вазифалар белгиланди

Учрашув давомида имом-хатиблар олдида турган долзарб вазифалар аниқлаб берилди. Хусусан, масжид, зиёратгоҳ ва қабристонларнинг ободлиги ва тартибига доимий эътибор қаратиш зарурлиги таъкидланди. Бундан ташқари, яқинлашиб келаётган Қурбон ҳайитига муносиб тайёргарлик кўриш ва байрам тадбирларини юқори савияда ташкил этиш юзасидан амалий кўрсатмалар берилди.

Бош имом-хатиб нутқида маърузалар мазмунан бой, ҳаётий мисолларга асосланган ва таъсирчан бўлиши лозимлигини алоҳида қайд этди. Аҳоли, айниқса ёшлар қалбига етиб борадиган услубда тарғибот ишларини олиб бориш ва замонавий ахборот майдонида фаолликни ошириш муҳим вазифа сифатида белгиланди.

Фаолият таҳлил қилинди

Жойларда аниқланган айрим камчиликлар батафсил таҳлил қилиниб, уларни қисқа муддатда бартараф этиш бўйича топшириқлар берилди. Тарғибот ишларини янада фаоллаштириш ва аҳоли билан яқин мулоқотни йўлга қўйиш бўйича аниқ тавсиялар ишлаб чиқилди.

Семинар якунида барча имом-хатибларга юклатилган вазифаларни сидқидилдан бажариш, жойларда соғлом маънавий муҳитни таъминлаш ва жамоатчилик ишончини мустаҳкамлаш юзасидан кўрсатмалар берилди.

Қашқадарё вилояти вакиллиги
Матбуот хизмати