Бирор кимнинг зиёратига бормоқчи бўлсангиз, зиёратга муносиб вақт танланг ҳамда кўп ўтириб қолманг. Енгил ўтириб қайтиш пайида бўлинг. Чунки мезбоннинг шахсий ишлари, вазифалари бўлиши мумкин, сизга айтишдан ҳижолат бўлиб турган бўлиши мумкин. Ана шундай ҳолатда унинг олдида узоқ қолиб кетишингиз унга оғирлик бўлади.
Шайх Алий Тантовий раҳимаҳуллоҳ айтади: “Эрта тонгдан уйғониб ишга отланадиган одам қолганларни ҳам ўзига ўхшатади. Битта одам бир куни тонгги олтида эшигимни тақиллатди, нима бўлди экан деб ўрнимдан туриб қарасам, мени кўргани келган эканлар. Менга қараб: “Безовта қилмадимми, кеттик бирга кетамиз!” дейди! Худди одам уйқудан уйғонгач, тўшагидан сакраб туриб тўғри кўчага чиқиб кетадигандек. Бу барака топкур ўйламайдики, одам деган ўрнидан тургач мундоқ ювинади, нонушта қилади, кийинади. Мен уйғонгач шуларни қилмасам қийналаман.
Яна баъзи одамлар ўзи кеч ухлагани учун бошқаларни ҳам шундай деб ўйлайди. Шунақалардан биттаси бир куни тунги соат ўнда эшигимни тақиллатибди. Уйқимни ташлаб у билан туннинг яримигача ўтириб чиқдим. Куни бўйи ишлаб чарчаган уй бекасини ҳам уйғотиб олдим, жаноби олийларига кофе, чой дамлаб бериш учун, эҳтимол оғирлик қилмаса кечки овқат ҳам қилиб берар дедим.
Яна баъзилар мен ишга ёки бирор учрашувга кетган пайтим тўсатдан келиб қолади-да, у билан ўтиришим учун ортимга қайтаради.
Ҳой биродарлар! Бунақада вақтнинг қадрини қачон биламиз? Қачон тушуниб етамиз битта одамнинг бир соат вақтини ўғирласак, чўнтагидан бир динор ўғирлагандек бўлишимизни?
Қачон Қуръоний одоблар билан хулқланамиз?! Ахир Аллоҳ таоло Қуръони каримда: “Ўз уйларингиздан бошқа уйларга то изн сўрамагунингизча кирманг” (Нур сураси, 27-оят), деган-ку.
Кейинги оятда эса: “Агар сизга қайтинг, дейилса, бас, қайтинг, ўша сиз учун покдир. Аллоҳ нима амал қилаётганингизни ўта билувчидир” (Нур сураси, 28-оят) деб марҳамат қилган”.
Доктор Ҳассон Шамси Пошонинг "Метин қоялар" китобидан
Ғиёсиддин Ҳабибуллоҳ, Неъматуллоҳ Исомов таржимаси.
Амман шаҳрида Ўзбекистон Республикаси Президентининг диний-маърифий масалалар бўйича маслаҳатчиси Музаффар Комилов, Дин ишлари бўйича қўмита раиси Содиқжон Тошбоев ҳамда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Иордания Ҳошимийлар Подшоҳлиги Вақф, ислом ишлари ва муқаддас қадамжолар вазири Муҳаммад Аҳмад Муслим ал-Халояла жаноблари билан ўзаро ҳамкорликни янги босқичга олиб чиқиш юзасидан мулоқот ўтказдилар.
Учрашувда икки давлат етакчиларининг эзгу ташаббуслари натижасида диний-маърифий соҳадаги ҳамкорлик тобора кенгайиб, Ўзбекистон ва Иордания вақф муассасалари, диний-маърифий ташкилотлари, илмий-тадқиқот марказлари ҳамда диний таълим даргоҳлари ўртасидаги алоқалар мустаҳкамланиб бораётгани қайд этилди. Бу борада ўзаро ҳамкорликни ривожлантириш бўйича имзоланган меморандумлар ҳуқуқий асос бўлаётгани таъкидланди.
Музокаралар чоғида ўзбекистонлик мутахассисларнинг вақф ва ислом молияси йўналишларида замонавий билим ва кўникмаларга эга бўлишини таъминлаш, ушбу соҳалардаги илғор тажрибани пухта ўрганиш мақсадида малака ошириш дастурларини йўлга қўйиш, шунингдек, қўшма лойиҳаларни амалга ошириш масалалари атрофлича муҳокама қилинди.
Мулоқот давомида Вақф вазири Аммон шаҳридаги миллий кутубхоналар ва етакчи олий ўқув юртларида «Янги Ўзбекистон китоб бурчаклари» очилганини Иордания илмий жамоатчилиги учун катта маънавий туҳфа сифатида баҳолади. Унинг қайд этишича, ушбу зиё масканлари орқали Ўзбекистон етакчисининг араб тилига ўгирилган асарлари ҳамда юртимиздаги янгиланишларга бағишланган тўпламларнинг кенг китобхонларга етказилиши икки халқ ўртасидаги дўстлик ва маърифий яқинликни янада кучайтиради.
Шу нуқтаи назардан, Иорданиянинг таниқли уламолари, зиёлилари, давлат ва дин арбобларини бир жойга жамлаган «Янги Ўзбекистон феномени»нинг 10 йиллигига бағишланган халқаро анжуман-тақдимот ўзбек диёридаги бугунги тараққиёт ва ислоҳотлар моҳиятини араб дунёсига теранроқ англатишда муҳим аҳамият касб этаётгани алоҳида урғуланди.
Ўзбекистон мусулмонлари идораси Матбуот хизмати