24 Октябр, 2026, 13 Жумадул аввал, 1448
24 Октябр, 2026, 13 Жумадул аввал, 1448
Ҳар куни дунё бўйлаб миллионлаб мусулмонлар Каъбага назар ташлар экан, ёпинчиғини безаб турган олтин ҳарфли ёзувлар ортида бир инсоннинг амалий мероси мужассам эканлигини билавермайди.
У киши – Каъба ёпинчиғини безашга умрини бағишлаган машҳур хаттот Абдураҳим Амин Бухорийдир.
Унинг номи, гарчи Саудиядан ташқарида унчалик машҳур бўлмаса-да, Каъбани ёпиб турган матода абадий яшаб келмоқда.
Ота-бобоси асли наманганлик бўлган Абдураҳим Амин Бухорий 1917 йилда Маккада дунёга келган. Болалигиданоқ хаттотликка қизиқиб, ёш бўлишига қарамай юксак маҳорати билан танилди. Подшоҳ Абдулазиз томонидан 1927 йилда ташкил этилган Кисва фабрикасида 15 ёшида иш бошлади ва шу ерда хаттотлик санъатининг нозик жиҳатларини ўрганди. 1930-йилларда бош техник, кейинчалик, 1960-йилларда фабрика раҳбарининг ўринбосари лавозимида меҳнат қилди.
Ҳар йили янгиланадиган кисва қора ипак матодан тайёрланиб, унга Аллоҳнинг каломи олтин ва кумуш иплар билан ёзилади. Абдураҳим Амин Бухорий мана шу шарафли вазифани ўнлаб йиллар давомида бажарди. Унинг “сулус” услубидаги хати Каъбанинг олтин ёзувли камари – “ҳизам” учун асосий намунага айланди. Бугун ҳам у ёзган намуна асосида Кисва тикилади. 658 квадрат метрлик кисва 670 кг ипакдан тайёрланган бўлиб, махсус дастгоҳлар ёрдамида бир-бирига тикилган 47 қисмдан иборат.
1944 йилда подшоҳ Абдулазиз Каъба учун янги эшик ясашни буюрди. Эшикдаги ёзувларни битиш ҳам айнан Абдураҳим Аминга насиб этди ва 1947 йилда Каъбага ўрнатилган янги эшик Ислом санъатининг юксак намунасига айланди. Кейинроқ, 1979 йилда ўрнатилган ҳозирги эшикда ҳам унинг хаттотлик ишлари акс этган.
Абдураҳим Амин Бухорий машҳурликдан йироқ, камтар ва фидокор инсон эди. Саудия Арабистони Қироллик байроғи учун ёзув намунасини ҳам, Мадинадаги Равза пардаси ва кўплаб масжид безакларини ҳам Абдураҳим Амин ишлаган.
Қирол Файсал унинг хизматларини эътироф этиб, Абдураҳим Амин Бухорий исмини Кисвага ёздирди ва бу шарафли инъом ҳануз сақланиб турибди.
Абдураҳим Амин Бухорий 1990-йиллар охирида вафот этган бўлса-да, унинг санъати ҳар йили Каъбага янги Кисва осилиши билан яна қайта аксланади. Унинг қаламидан чиққан ҳар бир ёзув гўзалликка хизмат қилади. Бугун ҳар бир зиёратчи Каъбага қараганда, айнан Бухорий ёзган ёзувларга назар ташлайди – бу эса унинг Аллоҳ каломини гўзал шаклда битишга бағишлаган умрининг далилидир.
Т.Азимов тайёрлади
Жорий йилнинг 26 октябридан бошлаб “Uzbekistan Airways” миллий авиакомпанияси Тошкент ва Исломобод шаҳарлари ўртасида қўшимча мунтазам авиақатновларни йўлга қўяди, деб хабар бермоқда “Дунё” АА.
Ҳозирда “Uzbekistan Airways” авиакомпанияси “Тошкент–Исломобод–Тошкент” йўналишида ҳафтасига икки марта – сешанба ва шанба кунлари парвозларни амалга оширмоқда. 26 октябрдан бошлаб авиақатновлар жадвалига ўзгартириш киритилиб, рейслар душанба, чоршанба ва жума кунлари амалга оширилади.
Қўшимча авиақатновларнинг йўлга қўйилиши Ўзбекистон ва Покистон ўртасидаги йўловчи ташиш имкониятларини кенгайтириш, сайёҳлар, тадбиркорлар ва транзит йўловчилар учун янада қулай шароит яратишга қаратилган.
Янги жадвал йўловчиларга сафарларини режалаштиришда кўпроқ танлов имконини беради. Натижада икки мамлакат ўртасидаги ишбилармонлик, туризм ва маданий алоқаларни янада мустаҳкамлаш учун қўшимча имкониятлар юзага келади.
Янги авиақатновлар Покистондан Ўзбекистонга келувчи сайёҳлар оқимини кўпайтириш, зиёрат туризмини ривожлантириш ҳамда мамлакатимизнинг бой тарихий ва маданий меросини халқаро миқёсда кенг тарғиб этишда муҳим аҳамият касб этади.
Хусусан, Буюк ипак йўлининг муҳим марказлари бўлган Самарқанд, Бухоро ва Хива шаҳарларига саёҳат қилиш истагидаги сайёҳлар учун транспорт имкониятлари кенгаяди.
Шунингдек, Тошкентнинг минтақавий транспорт маркази сифатидаги аҳамияти ортиб, Марказий Осиёнинг бошқа мамлакатларига йўналтирилган сайёҳлик сафарларини ташкил этиш учун ҳам қўшимча имкониятлар пайдо бўлади.
2025 йилда Покистондан Ўзбекистонга ташриф буюрган сайёҳлар сони 20 минг нафардан ошган. Жорий йилнинг дастлабки тўққиз ойида эса ушбу кўрсаткич қарийб 20 минг нафарни ташкил этди. Бу рақамлар икки мамлакат ўртасидаги сайёҳлик алоқаларини янада ривожлантириш учун муҳим салоҳият мавжудлигини кўрсатади.
Тошкент–Исломобод йўналишида авиақатновлар сонининг оширилиши Ўзбекистон ва Покистон ўртасидаги транспорт алоқаларини мустаҳкамлаш, ўзаро сайёҳлар оқимини рағбатлантириш ҳамда савдо-иқтисодий ва маданий-гуманитар ҳамкорликни кенгайтиришга хизмат қилади.
Ҳозирги кунда икки мамлакат ўртасида ҳафтасига жами 8 та мунтазам авиарейс амалга оширилмоқда. Жумладан, Тошкент–Лаҳор йўналишида ҳафтасига 4 та, Исломобод–Тошкент йўналишида 2 та ва Тошкент–Карачи йўналишида 2 та рейс қатнамоқда.
Янги қўшимча авиақатновнинг йўлга қўйилиши билан Ўзбекистон ва Покистон ўртасидаги авиақатновлар сони ҳафтасига 9 тага етади.
Ўзбекистон мусулмонлари идораси матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 