Кеча, 13 ноябрь куни Наманган шаҳар ва туманлар бош имом-хатиблари, вилоятда фаолият кўрсатаётган масжидлар имом-хатиблари ҳамда расмий отинойилар иштирокида Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг «Эй бандаларим...» Бир қудсий ҳадис шарҳи, «Фиқҳ ва ақидага оид ихтилофли масалалар ечими», «Ёшларга насиҳатим», ҳамда Норин тумани Ғойиб Бува жоме масжиди имом-ноиби Икром Муҳаммад Умарнинг «Барака сирлари» номли китоблари тақдимоти ўтказилди.
Китоб тақдимотида вилоят бош имом-хатиби Мусохон домла Аббосиддинов томонидан ушбу асарлар айни дамда жуда долзарб эканлиги, бу китоблардаги мавзулар динимизнинг асослари, ҳукмлар, одоблари ҳақида ҳадислардан олинадиган ҳикмат ва фойдалар ҳақида кенг маълумотлар берилганлигини таъкидлаб ўтилди.
Шунингдек, ушбу китоблар мутолаасида, кенг оммага жонли, таъсирчан етказишда вилоятдаги барча диний соҳа ходимлар фаол бўлишлари, динимизни тўғри тушунишликда халқимизга фойдали бўлишини таъкидлаб ўтилди. Айниқса, душанба ва пайшанба кунларидаги масжидларда олиб борилаётган мавъизаларда мутолаасини доимий мониторинг қилиб борилаётганига ҳам тўхталиб ўтилди.
Диний соҳа ходимларининг касб-маҳоратларини оширишликда янги чоп этилган китоблар барча йиғилганлар учун янада фойдали эканлигини сўзга чиққан ҳамкасблар ҳам эътироф этишди.
Ўзбекистон мусулмонлари идораси Наманган вилояти вакиллиги Матбуот хизмати
Кеча, 14 ноябрь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Финландия мусулмонлари жамияти имоми Рамил ҳазрат Беляев бошчилигидаги делегацияни қабул қилдилар.
Фин юртининг дин пешволари айни кунларда мамлакатимизда кенг нишонланаётган 16 ноябрь – "Халқаро бағрикенглик куни" муносабати билан ўтказилаётган тадбирларда фаол иштирок этмоқдалар.
Мулоқотда Ўзбекистон ва Финландия ўртасидаги ҳамкорлик йилдан-йилга ривожланиб бораётгани, ўтган ойда Финляндия Президентининг мамлакатимизга расмий ташрифи икки давлат ўртасидаги дўстона алоқаларни янги босқичга кўтаргани, айниқса, ижтимоий-иқтисодий, таълим, илм-фан, маданият, туризм соҳаларида ҳамкорлик ривожланиб бораётгани, хусусан, ўтган йили Ўзбекистон мусулмонлари идораси делегацияcининг Финландияга сафари жуда ҳам самарали кечганига урғу берилди.
Финландия делегацияси мамлакатимизда амалга оширилаётган диний-маърифий ислоҳотлар, миллатлараро тотувлик ва бағрикенглик борасидаги ишларни юқори баҳолаб, икки томонлама ҳамкорликни янада ривожлантиришдан манфаатдор эканини билдирди.
Учрашув самимий руҳда ўтиб, томонлар эсдалик совғалари алмашдилар.
Ўзбекистон мусулмонлари идораси
Матбуот хизмати