Дубай шаҳрида бўлиб ўтган V ёшлар Пара Осиё ўйинларида муваффақиятли иштирок этиб, тарихий натижа қайд этган Ўзбекистон спорт делегацияси Ўзбекистонга қайтиб келди.
Делегация аъзолари "Ҳумо" Тошкент халқаро аэропортида расмийлар томонидан тантанали равишда кутиб олинди.
Пойтахтимиздаги Олимпия шаҳарчасида V ёшлар Пара Осиё ўйинларида юртимиз шарафини муносиб ҳимоя қилган спортчилар ва уларнинг мураббийларини тақдирлашга бағишланган тантанали маросим бўлиб ўтди.
Тантанали тадбир аввалида Олий Мажлис Сенати Раиси Танзила Нарбаева томонидан Ўзбекистон Республикаси Президентининг V ёшлар Пара Осиё ўйинларида иштирок этган Ўзбекистон спорт делегацияси аъзоларига йўллаган табриги ўқиб эшиттирилди.
Шундан сўнг давлатимиз мадҳияси ижро этилди ва расмийлар томонидан спортчилар ва мураббийлар эришилган улкан ғалаба билан самимий табрикланиб, уларнинг жасорати, матонати ва фидойилиги юксак эътироф этилди.
Маълумот ўрнида: Ўзбекистон терма жамоаси ушбу нуфузли мусобақада 99 та олтин, 57 та кумуш ва 41 та бронза медалини қўлга киритиб, 35 та давлат орасида умумжамоа ҳисобида 1-ўринни эгаллади.
Мазкур ғалаба Янги Ўзбекистон ёшларининг салоҳияти, иродаси ва халқаро спорт майдонидаги нуфузини яна бир бор яққол намоён этди.
Дин ишлари бўйича қўмита
Ахборот хизмати
Юртимизда эзгу анъанага айланган ҳашар тадбирлари бугун нафақат ободончилик, балки халқимизнинг жипслиги ва олижаноблигини ифодаловчи умуммиллий ҳаракат сифатида намоён бўлмоқда.
Хотира ва қадрлаш куни ҳамда муборак Қурбон ҳайити байрамлари олдидан Ўзбекистон мусулмонлари идораси Уламолар Кенгашининг қабристонларни обод қилиш ва зиёрат одоблари юзасидан аҳолига қилган мурожаатига ҳамоҳанг тарзда хайрия ҳашарлари ўтказилди.
«Поклик — иймоннинг ярмидир», деган ҳадиси шарифга амал қилган ҳолда, республика бўйлаб 2 160 та масжид, қабристонлар ва 195 та зиёратгоҳ ҳудудида ободонлаштириш ишлари амалга оширилди.
Мазкур хайрли тадбирлар доирасида тизимдаги ташкилотлар томонидан ҳудудларда 257 мингдан ошиқ бир йиллик ва кўп йиллик гул кўчатлари ўтқазилди. 3 млн. квадрат метрдан зиёд майдон тозаланиб, тартибга келтирилди. Дарахтлар парваришига ҳам алоҳида урғу берилиб, 56 752 дона дарахт ва қарийб 138 минг квадрат метр деворлар оқланиб, кўркам ҳолатга келтирилди. Тозалик ишларини сифатли ташкил этиш мақсадида 1 266 та махсус техника жалб этилиб, 23 минг тоннадан ортиқ чиқинди олиб чиқилди.
Ушбу савобли тадбирларда соҳа ходимлари ва кўнгилли юртдошларимиздан иборат 142 000 нафар иштирокчи фаол қатнашиб, муносиб ҳиссаларини қўшди.
Бу каби амаллар ҳудудларнинг кўркам қиёфа касб этиши билан бирга, жамиятимизда ўзаро меҳр-оқибат, бағрикенглик ва ҳамжиҳатлик муҳитининг янада мустаҳкамланишига хизмат қилмоқда.
Ўзбекистон мусулмонлари идораси Матбуот хизмати