#xabar #musobaqa
Бугун, 9 февраль куни Ўзбекистон халқаро исломшунослик академияси ва Шайхонтоҳур спорт мактаби спорт залларида диний соҳа ходимлари ўртасида спортнинг волейбол ва шахмат турлари бўйича “Ўзбекистон мусулмонлари идораси кубоги” мусобақаларининг республика босқичига расман старт берилди.
Мазкур босқичда Ўзбекистон мусулмонлари идорасининг ҳудудий вакилликлари томонидан ўтказилган саралаш мусобақаларида ғолиб бўлган жамоа ва иштирокчилар, уларнинг мураббийлари ва ҳакамлар, шунингдек, Ўзбекистон мусулмонлари идораси раҳбарияти, Ўзбекистон Республикаси Спорт вазирлиги, Ўзбекистон волейбол ва шахмат федерациялари вакиллари ҳамда вилоят бош имом-хатиблари иштирок этмоқда.
Очилиш маросимида Ўзбекистон мусулмонлари идораси раисининг биринчи ўринбосари Ҳомиджон домла Ишматбеков ва Диний идора раиси ўринбосари Зайниддин домла Эшонқулов сўзга чиқиб, ушбу мусобақа республика бўйлаб диний соҳа вакилларини бир майдонга жамлаш, соғлом турмуш тарзини тарғиб этиш, жисмоний фаолликни ошириш ҳамда ўзаро ҳамжиҳатликни мустаҳкамлашда муҳим аҳамиятга эга экани, динимиз спорт билан шуғулланишга чақиришини алоҳида таъкидлади. Шунингдек, беллашувлар манфаатли ва баракали ўтишини сўраб хайрли дуолар қилинди.
Маълумот ўрнида айтиш жоизки, мусобақалар Ўзбекистон волейбол ва шахмат федерациялари тасдиқлаган тартиб-қоидалар асосида нимчорак финал, чорак финал, ярим финал ҳамда финал босқичлари кўринишида ўтказилмоқда. Финал учрашувлари эса 10 февраль куни бўлиб ўтади.
Эслатиб ўтамиз, мусобақада Ўзбекистон мусулмонлари идорасининг Қорақалпоғистон Республикаси, барча вилоятлар ва Тошкент шаҳар вакилликлари жамоалари ўзаро беллашмоқда.
Мусобақа янгиликлари ва тафсилотларини каналимиз орқали кузатиб боринг.
Ўзбекистон мусулмонлари идораси
Матбуот хизмати
#xabar #musobaqa #kubog
Пойтахтимиздаги Жар спорт мажмуасида спортнинг волейбол ва шахмат турлари бўйича “Ўзбекистон мусулмонлари идораси кубоги” мусобақаси Республика босқичининг финал ўйинлари бошланди.
Очилиш маросимида Ўзбекистон мусулмонлари идораси, Дин ишлари бўйича қўмита, Ўзбекистон Республикаси спорт вазирлиги раҳбарияти, Ўзбекистон волейбол ва шахмат федерацияси масъул ходимлари, ҳакамлар, вилоят бош имом-хатиблари, ОАВ вакиллари, мухлислар иштирок этди.
Мусобақа аввалида Ўзбекистон Республикаси Давлат мадҳияси янгради.
Тадбирда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари иштирокчиларни финал баҳсларига чиққанлари билан муборакбод этиб, давлатимиз Раҳбари ташаббуси билан спортга берилаётган эътибор, эришилаётган натижалар, ўтказилаётган мана шундай мусобақалар диний соҳа ходимлари ўртасидаги ҳамжиҳатликни янада мустаҳкамлаши, дўстлик ва меҳр-оқибат туйғуларини янада оширишга хизмат қилишини алоҳида таъкидладилар.
Шундан сўнг Самарқанд ва Навоий жамоаларининг учинчи ўрин учун беллашувига старт берилди. Ундан кейин Қорақалпоғистон Республикаси ва Қашқадарё вилояти жамоалари ўртасида финал баҳслари бошланади.
Бизни кузатишда давом этинг.
Ўзбекистон мусулмонлари идораси
Матбуот хизмати