01 Октябр, 2026, 20 Рабиъус сони, 1448
01 Октябр, 2026, 20 Рабиъус сони, 1448
Юртимизда ҳар йили 1 октябрь – Ўқитувчи ва мураббийлар куни байрами сифатида кенг нишонланади. Бу айём жамиятимизда муаллимларга кўрсатилаётган чексиз ҳурмат-эҳтиромнинг рамзий ифодаси бўлиб, аслида, устозни улуғлаш аждодларимиздан мерос бўлиб келаётган энг гўзал қадриятлардан биридир.
Муқаддас динимизда илм аҳли ва устозларнинг мақоми ниҳоятда юксак. Қуръони каримнинг Мужодала сураси 11-оятида уларнинг обрў-эътибори нақадар баланд экани шундай баён қилинади: «...Аллоҳ сизлардан имон келтирганларни ва илм берилганларни (баланд) даража (мартаба)ларга кўтарур».
Касб байрами муносабати билан Қорақалпоғистон мусулмонлари қозиёти қозиси ва ҳудуддаги жоме масжидлар имом-хатиблари, шунингдек, Нукус шаҳридаги «Муҳаммад ибн Аҳмад ал-Беруний» ўрта махсус ислом таълим муассасаси мудири ҳамда мударрислари иштирокида хайрли тадбир ташкил этилди.
Тадбир доирасида кўп йиллар давомида диний соҳада самарали меҳнат қилиб, ёшларга илм-маърифат улашган ва бугунги кунда кексалик гаштини сураётган фахрий устозларнинг ҳолидан хабар олинди. Уламолар ва диний соҳа ходимлари муҳтарам устозларни байрам билан самимий муборакбод этдилар.
Аллоҳ таоло динимиз равнақига беминнат хизмат қилган азиз устозларимизга мустаҳкам соғлик, мазмунли умр ва оилавий хотиржамлик ато қилсин!
Қорақалпоғистон мусулмонлари қозиёти
Матбуот хизмати
Ўзбекистон мусулмонлари идорасида Индонезиянинг Жанубий Калимантан вилояти уламолар кенгаши бош раиси Шайх Аҳмад Сяирази бошчилигидаги 60 кишилик нуфузли делегация билан учрашув бўлиб ўтди.
Меҳмонларни Диний идора раиси ўринбосари Муҳаммадолим домла Муҳаммадсиддиқов қабул қилди. Самимий ва дўстона кечган мулоқотда Индонезиянинг етук олимлари, тадқиқотчилар ҳамда йирик тадбиркорлар иштирок этди.
Учрашувда меҳмонларга юртимиздаги диний-маърифий ислоҳотлар, хусусан, Имом Бухорий, Имом Термизий, Имом Мотуридий каби буюк аждодларимиз меросини ўрганиш йўлидаги хайрли ишлар ва таълим муассасаларидаги замонавий шароитлар ҳақида сўзлаб берилди.
Ўз навбатида, Шайх Аҳмад Сяирази Ўзбекистондаги юксак меҳмондостлик учун ташаккур билдириб, диний таълим тизимидаги ютуқларни эътироф этди. У келажакда индонезиялик ёшларни юртимизга ўқишга юбориш, хусусан, ҳадис илми бўйича махсус курсларга жалб этиш ниятида эканини таъкидлади.
Шунингдек, индонезиялик тадқиқотчилар Бухоро ва Самарқанд шаҳарларига сафарларидан олган ёрқин таассуротлари билан ўртоқлашиб, ҳамкорликни янада кенгайтиришга тайёр эканликларини маълум қилди.
Мулоқот якунида хайрли дуолар қилинди.
Ўзбекистон мусулмонлари идораси
Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 