Yurtimizda har yili 1 oktyabr – O‘qituvchi va murabbiylar kuni bayrami sifatida keng nishonlanadi. Bu ayyom jamiyatimizda muallimlarga ko‘rsatilayotgan cheksiz hurmat-ehtiromning ramziy ifodasi bo‘lib, aslida, ustozni ulug‘lash ajdodlarimizdan meros bo‘lib kelayotgan eng go‘zal qadriyatlardan biridir.
Muqaddas dinimizda ilm ahli va ustozlarning maqomi nihoyatda yuksak. Qur’oni karimning Mujodala surasi 11-oyatida ularning obro‘-e’tibori naqadar baland ekani shunday bayon qilinadi: «...Alloh sizlardan imon keltirganlarni va ilm berilganlarni (baland) daraja (martaba)larga ko‘tarur».
Kasb bayrami munosabati bilan Qoraqalpog‘iston musulmonlari qoziyoti qozisi va hududdagi jome masjidlar imom-xatiblari, shuningdek, Nukus shahridagi «Muhammad ibn Ahmad al-Beruniy» o‘rta maxsus islom ta’lim muassasasi mudiri hamda mudarrislari ishtirokida xayrli tadbir tashkil etildi.
Tadbir doirasida ko‘p yillar davomida diniy sohada samarali mehnat qilib, yoshlarga ilm-ma’rifat ulashgan va bugungi kunda keksalik gashtini surayotgan faxriy ustozlarning holidan xabar olindi. Ulamolar va diniy soha xodimlari muhtaram ustozlarni bayram bilan samimiy muborakbod etdilar.
Alloh taolo dinimiz ravnaqiga beminnat xizmat qilgan aziz ustozlarimizga mustahkam sog‘lik, mazmunli umr va oilaviy xotirjamlik ato qilsin!
Qoraqalpog‘iston musulmonlari qoziyoti
Matbuot xizmati
O‘zbekiston musulmonlari idorasida Indoneziyaning Janubiy Kalimantan viloyati ulamolar kengashi bosh raisi Shayx Ahmad Syairazi boshchiligidagi 60 kishilik nufuzli delegatsiya bilan uchrashuv bo‘lib o‘tdi.
Mehmonlarni Diniy idora raisi o‘rinbosari Muhammadolim domla Muhammadsiddiqov qabul qildi. Samimiy va do‘stona kechgan muloqotda Indoneziyaning yetuk olimlari, tadqiqotchilar hamda yirik tadbirkorlar ishtirok etdi.
Uchrashuvda mehmonlarga yurtimizdagi diniy-ma’rifiy islohotlar, xususan, Imom Buxoriy, Imom Termiziy, Imom Moturidiy kabi buyuk ajdodlarimiz merosini o‘rganish yo‘lidagi xayrli ishlar va ta’lim muassasalaridagi zamonaviy sharoitlar haqida so‘zlab berildi.
O‘z navbatida, Shayx Ahmad Syairazi O‘zbekistondagi yuksak mehmondostlik uchun tashakkur bildirib, diniy ta’lim tizimidagi yutuqlarni e’tirof etdi. U kelajakda indoneziyalik yoshlarni yurtimizga o‘qishga yuborish, xususan, hadis ilmi bo‘yicha maxsus kurslarga jalb etish niyatida ekanini ta’kidladi.
Shuningdek, indoneziyalik tadqiqotchilar Buxoro va Samarqand shaharlariga safarlaridan olgan yorqin taassurotlari bilan o‘rtoqlashib, hamkorlikni yanada kengaytirishga tayyor ekanliklarini ma’lum qildi.
Muloqot yakunida xayrli duolar qilindi.
O‘zbekiston musulmonlari idorasi
Matbuot xizmati