1. Allohga hamd aytish:

سُبحَانَكَ اللهم وبحمدك وتبارك اسمُكَ وتَعَالى جَدُّكَ ولا إله غيرك

“Subhanakallohumma va bihamdika va tabarokasmuka va ta’ala jadduka va laa ilaha g‘oyruk”

“Allohim! Senga hamd aytgan holda Seni pok deb yod etaman. Isming muborakdir. Ulug‘liging yuksakdir. Sendan o‘zga iloh yo‘qdir!”

Oisha roziyallohu anhodan rivoyat qilinadi: “Rasululloh sollallohu alayhi vasallam namozga kirishganda: “Subhanakallohumma va bihamdika va tabarokasmuka va ta’ala jadduka va laa ilaha g‘oyruk”, der edilar (Imom Termiziy, Imom Abu Dovud rivoyati).

2. Rasululloh sollallohu alayhi vasallamga salavot aytish:

اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ كَمَا صَلَّيْتَ عَلَى إِبْرَاهِيمَ وَعَلَى آلِ إِبْرَاهِيمَ إِنَّكَ حَمِيدٌ مَجِيدٌ اللَّهُمَّ بَارِكْ عَلَى مُحَمَّدٍ وَعَلَى آلِ مُحَمَّدٍ كَمَا بَارَكْتَ عَلَى إِبْرَاهِيمَ وَعَلَى آلِ إِبْرَاهِيمَ إِنَّكَ حَمِيدٌ مَجِيدٌ

“Allohumma solli a’la Muhammadin va a’la aali Muhammadin, kama sollayta a’la Ibrohiyma va a’la aali Ibrohiym. Innaka hamiydummajiyd. Allohumma barik a’la Muhammadin va a’la aali Muhammadin, kama barokta a’la Ibrohiyma va a’la aali Ibrohiym. Innaka hamiydum majiyd”

“Yo Alloh, Ibrohim va uning oilasini rahmat etganing kabi, Muhammad va ul zotning oilasini ham rahmat et, Sen hamdu maqtovga loyiq ulug‘ Zotsan. Yo Alloh, Ibrohim va uning oilasini muborak etganing kabi Muhammad va ul zotning oilasini ham muborak et. Sen hamdu maqtovga loyiq ulug‘ Zotsan”.

Sahobalar roziyallohu anhum Rasululloh sollallohu alayhi vasallamdan “Yo Rasululloh sizga salavot aytish qanday bo‘ladi?” deb so‘raganlarida U zot alayhissalom: “Allohumma solli ala Muhammadin va a’la oli Muhammadin, kama sollayta a’la Ibrohiyma va a’la oli Ibrohiym. Innaka hamiydummajiyd. Allohumma barik a’la Muhammadin va a’la oli Muhammadin, kama barokta a’la Ibrohiyma va a’la oli Ibrohiym. Innaka hamiydum majiyd”, deb aytinglar, deganlar (Imom Buxoriy rivoyati).

3. Duo qilish:

اللَّهُمَّ اغْفِرْ لِحَيِّنَا وَمَيِّتِنَا وَشَاهِدِنَا وَغَائِبِنَا وَصَغِيرِنَا وَكَبِيرِنَا وَذَكَرِنَا وَأُنْثَانَا اللَّهُمَّ مَنْ أَحْيَيْتَهُ مِنَّا فَأَحْيِهِ عَلَى الإِسْلاَمِ وَمَنْ تَوَفَّيْتَهُ مِنَّا فَتَوَفَّهُ عَلَى الإِيمَانِ

“Allohummag‘fir lihayyinaa va mayyitinaa va shaahidinaa va g‘oibinaa va sog‘iyrinaa va kabiyrinaa va zakarinaa va unsanaa. Allohumma man ahyaytahu minnaa fa ahyihi a’lal Islam va man tavaffaytahu minnaa fatavaffahu a’lal iyman”

“Allohim! Tirigimizni va o‘ligimizni, hozirimizni va g‘oyibimizni, kichigimizni va kattamizni, erkagimizni va ayolimizni mag‘firat qilgin. Allohim! Bizdan kimni yashatsang, Islomda yashatgin. Bizdan kimni vafot ettirsang, iymonda vafot ettirgin”.

Abu Ibrohim Ashhaliy otasidan rivoyat qiladi: «Rasululloh sollallohu alayhi vasallam mayyitga janoza namoz o‘qisalar: “Allohummag‘fir lihayyinaa va mayyitinaa va shaahidinaa va g‘oibinaa va sog‘iyrinaa va kabiyrinaa va zakarinaa va unsanaa”, der edilar».

Yahyo aytadi: «Menga Abu Salama ibn Abdurrahmon Abu Hurayradan, u esa Nabiy sollallohu alayhi vasallamdan shunga o‘xshashni rivoyat qilib aytib bergan. Unda “Allohumma man ahyaytahu minnaa fa ahyihi a’lal Islam va man tavaffaytahu minnaa fatavaffahu a’lal iyman”ni ziyoda qilgan» (Imom Termiziy rivoyati).

Shuningdek, Rasululloh sollallohu alayhi vasallam janoza namozidan keyin bunday duo qilardilar:

“Allohumma anta robbuha vaanta xolaqtaha va anta hadaytaha lil islami vaanta qobazta ruhaha vaanta a’lamu bisirriha va ’alaniyatiha va qod ji’naka shufa’a a lahu fag‘fir lahu”

“Yo Alloh, Sen uning Robbisan, uni Sen yaratding va uni hidoyatga Sen yetishtirding. Musulmon qilding va uning ruhini Sen olding. Uning yashirin, oshkor holini Sen bilasan. Biz unga shafoatchi bo‘ldik. Sen uni kechir”.

Agar mayyit balog‘atga yetmagan bola yoki majnun bo‘lsa, yuqoridagi, kattalarga aytiladigan duoning o‘rniga ushbu duo aytiladi:

اللَّهُمَّ اجْعَلْهُ لَنَا فَرَطًا وَاجْعَلْهُ ذُخْرًا وَشَافِعًا مُشَفَّعًا

“Allohummaj’alhu lanaa faraton vaj’alhu zuxron va shaafi’an mushaffa’an”

“Allohim! Uni bizning borishimizga farat (havzi kavsar suvini tayyorlab kutib oluvchi), zaxira qilgin. Shafoatchi va shafoati qabul qilinuvchilardan qilgin!”.

Davron NURMUHAMMAD