Dog'iston muftiysi Axmed Abdulayev 2021 yil 21 oktyabr' kuni Ulamolar Kengashida Diniy idora raisi, muftiy lavozimiga saylangan Nuriddin domla Holiqnazarov hazratlariga tabrik yo'lladi. Unda jumladan shunday deyiladi:
– Dog'iston Respublikasi muftiyati va shaxsan o'z nomimdan chin dildan Sizni O'zbekiston musulmonlari idorasi raisi lavozimiga saylanganingiz bilan tabriklayman! Sizga mustahkam sog'liq, farovonlik, O'zbekiston musulmonlari manfaati yo'lida yaratuvchanlik faoliyatingizda muvaffaqiyatlar tilayman.
Alloh taolodan jamiyatning ma'rifati va uyg'unlashuviga qaratilgan Sizning barcha sa'y-harakatlaringiz O'zbekiston xalqining ma'naviy yuksalishi, axloqiy takomillashuvi, o'zaro tushunish va totuvlikning mustahkamlanishiga xizmat qilishini so'rab qolaman.
Sizga tinchlik, Haq taoloning rahmati va barakotini tilayman. Omin!
Hurmat bilan,
Axmed Abdulayev,
Dog'iston Respublikasi muftiysi
#xabar #muftiy #misr #matbuot
O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining sun’iy intellekt haqidagi maqolasi Misr Arab Respublikasidagi bir necha yuz minglab kuzatuvchilarga ega see.news (https://see.news/artificial-intelligence-between-technical-evolution-and-sharia-responsibility-a-contemporary-islamic-vision), darelhilal.com (https://darelhilal.com/News/3164420.aspx), aldiplomasy.com (https://www.aldiplomasy.com/en/?p=42807) va safqa.news (https://www.safqa.news/137466) kabi internet nashrlarida arab va ingliz tillarida keng yoritilib, jamoatchilik e’tiborini tortdi.
Maqolada sun’iy intellekt bugungi kunda iqtisod, ta’lim, tibbiyot, xavfsizlik va davlat xizmatlarida ulkan imkoniyatlar yaratayotgani alohida ta’kidlangan. Zamonaviy texnologiyalar aqlli shaharlar qurish, xizmatlar sifatini oshirish va jamiyat rivojiga xizmat qilayotgani qayd etilgan.
Shu bilan birga, Muftiy hazratlari taraqqiyot bilan bir qatorda insoniy qadriyatlar va diniy me’yorlar ustuvor bo‘lishi lozimligini uqtirgan. Sun’iy intellekt inson aqlining mahsuli ekani, texnologiya insonni emas, inson texnologiyani boshqarishi kerakligiga e’tibor qaratilgan.
Maqolada sun’iy intellektni hayotga to‘g‘ri tatbiq etish, uni nazorat qilish va ayniqsa din va fatvo bilan bog‘liq nozik masalalarda ehtiyotkorlik zarurligi ta’kidlangan. Fiqhiy manbalarga ko‘ra, sun’iy intellekt ma’lumot tahlilida yordamchi bo‘lishi mumkin, ammo fatvo berish faqat malakali va mas’ul faqihlar zimmasida ekani ochiq bayon etilgan.
O‘zbekiston musulmonlari idorasi
Matbuot xizmati