Shu yil 3-6 noyabr kunlari Toshkent shahridagi “Swissôtel Tashkent” mehmonxonasida diniy soha va jamoat yetakchilarining xabar va kontentlar tayyorlash salohiyatini oshirish bo‘yicha seminar-trening bo‘lib o‘tmoqda. Unda Diniy idora va Din ishlari bo‘yicha qo‘mita rahbariyati, mas’ul xodimlari, Qoraqalpog‘iston Respublikasi, viloyatlar va Toshkent shahar masjidlarida faoliyat yurituvchi imom-xatiblar ishtirok etdi. 

Ushbu tadbir Din ishlari bo‘yicha qo‘mita, O‘zbekiston musulmonlari idorasi va Birlashgan Arab Amirliklarining “HEDAYAH” ekstremizm va zo‘ravonlikka qarshi kurashish bo‘yicha xalqaro markazi bilan hamkorlikda tashkil etildi.  

Ochilish marosimida O‘zbekiston musulmonlari idorasi raisining birinchi o‘rinbosari Homidjon domla Ishmatbekov nutq so‘zladi. Unda bugun zamon shiddatiga hamohang ravishda media sohasi ham tezkor rivojlanib borayotgani, bu esa barcha jabhalar qatori diniy sohaga ham o‘z ta’sirini o‘tkazayotgani aytib o‘tdi. 

Homidjon domla o‘z so‘zi davomida keyingi vaqtda diniy tushunchalarni noto‘g‘ri talqin qilayotgan guruhlarning keng yoyilib borayotgani, ularga qarshi turish uchun soha mutaxassislari doimo o‘z ustida ishlab borishi lozimligi, bu borada “Hedayah” xalqaro markazi bilan yaxshi hamkorlik aloqalari yo‘lga qo‘yilgani, mazkur seminar-treningda raddiyalar berish yo‘nalishida o‘zaro tajriba almashish bilan ahamiyatli ekanini ta’kidladi. 

Shuningdek, tadbirda Din ishlari bo‘yicha qo‘mita bo‘lim boshlig‘i Dilshod Bobojonov va Diniy idora bo‘lim boshlig‘i Shavkat Hamdamov mavzu doirasida o‘z fikr-mulohazalarini bildirdi. 
“Hedayah” xalqaro markazi mas’ul vakili, dastur menejeri Hafedh Dridi so‘nggi yillarda markaz va O‘zbekistondagi diniy sohaga oid ilmiy-tadqiqot muassasalari o‘rtasidagi aloqalar mustahkamlanib borayotgani, bugungi tahlikali davrda dinni noto‘g‘ri talqin qilish oqibatida ko‘plab ziddiyatlar sodir bo‘layotgani, buning sababi ilmsizlik va dinni to‘g‘ri anglamaslikda deb bilishi, yoshlarni bunday tahdidlardan himoya qilishning bir qancha yo‘llari mavjud va ularning avvalida ilm turishini qayd etdi. 

Uch kun davom etadigan seminar-treningda yurtimiz diniy soha xodimlari va “Hedayah” xalqaro markazi vakillari o‘zaro tajriba almashish barobarida media kontent tayyorlash bo‘yicha malaka hosil qiladi.  

O‘zbekiston musulmonlari idorasi 
Matbuot xizmati