#xabar #deklaratsiya #muloqot #forum

Bugun, 10 sentyabr  kuni poytaxtimizdagi International hotel Tashkent mehmonxonasida «Deklaratsiyalar muloqoti» II xalqaro forumi o‘z ishini boshladi. 

 Unda nufuzli xalqaro tashkilotlar vakillari, taniqli ulamolar, soha ekspertlari qatorida Strategik va mintaqalararo tadqiqotlar intituti direktori Eldor Aripov, O‘zbekiston Respublikasi Prezidentining maslahatchisi Ruslanbek Davletov, Oliy Majlis Senati raisining birinchi o‘rinbosari Sodiq Safoyev, Prezident maslahatchisi o‘rinbosari, O‘zbekiston xalqaro islomshunoslik akademiyasi rektori Muzaffar Komilov, Din ishlari bo‘yicha qo‘mita raisi Sodiq Toshboyev va O‘zbekiston musulmonlari idorasi raisi o‘rinbosari Zayniddin domla Eshonqulov ishtirok etmoqda.

 «Deklaratsiyalar muloqoti» xalqaro forumi Prezident Shavkat Mirziyoyev tashabbusi bilan BMT Bosh Assambleyasining 2018 yil qabul qilingan «Ma’rifat va diniy bag‘rikenglik» Maxsus rezolyutsiyasida mustahkamlangan  tamoyil va qoidalarni hayotga tatbiq etish bo‘yicha O‘zbekiston Respublikasi olib borayotgan izchil ishlarning bir qismi bo‘lib, 2020 yilda davlatimiz rahbari tomonidan tasdiqlangan Inson huquqlari bo‘yicha O‘zbekiston Milliy strategiyasi maqsadlariga erishishga xizmat qiladi. 

“Diniy erkinlikni ta’minlash: O‘zbekistondagi islohotlar va xalqaro hamkorlikning o‘rni” deb nomlangan yalpi majlisda “LYNC” NNT (AQSH) vakili Kris Saypl, BAA Fatvo kengashi raisi Shayx Abdulloh bin Bayya, Jahon musulmonlari ligasi Bosh kotibi Shayx Muhammad bin Abdulkarim Al-Iso kabi nufuzli ishtirokchilarning chiqish va videomurojaatlari tinglandi. 

 Xalqaro forum davomida O‘zbekiston musulmonlari idorasi raisi o‘rinbosari Zayniddin domla Eshonqulov so‘zga chiqib, ishtirokchilarga hozirda safarda bo‘lib turgan Muftiy Shayx Nuriddin Xoliqnazar hazratlarining salom va tabriklarini yetkazib, mavzu doirasida ma’ruza qildi. U o‘z so‘zi davomida dunyoning turli joylarida notinchlik bo‘lib turgan vaqtda tinchlik va bag‘rikenglikka bag‘ishlangan forumning o‘tkazilishi va unda dunyoning ko‘plab davlatlaridan turli din vakillari jam bo‘lgani katta voqea ekani, bu yerga yig‘ilgan ma’rifat ahllari tomonidan qabul qilinadigan deklaratsiyani amaliyotga joriy qilish insoniyat farovonligiga xizmat qilishini ta’kidladi.   

 Shuningdek, tadbir doirasida turli mamlakatlar dinshunos olimlari, amaliyotchi mutaxassislariga jamiyatda tinchlik va totuvlikni saqlab turishning muhim sharti sifatida deklatsiyalararo samarali muloqot o‘rnatish sohasidagi eng yaxshi xalqaro amaliyot, ilg‘or xorijiy tajribalar namoyish etilmoqda.

O‘zbekiston musulmonlari idorasi Matbuot xizmati