Bugun, 12 oktyab' kuni bir guruh ulamolar Toshkent shahri Sergeli tumanidagi “Qo'shqo'rg'on” jome masjidining yangi binosi qurilishini ko'zdan kechirib, uning qurilishiga tabarrukona g'isht qo'yib berishdi.

Marosimda O'zbekiston musulmonlari idorasi raisi birinchi o'rinbosari Homidjon domla Ishmatbekov, Masjidlar bo'limi mudiri Muhammadnazar domla Qayumov, O'MI Toshkent shahar bosh imom-xatibi o'rinbosari Abduqahhor domla Yunusov va boshqalar qatnashdi.

Ma'lumot uchun, masjid ilk bor 1914 yilda qurilgan. Mustabit tuzimi davrida masjid faoliyati to'xtab qolgan. U 1989 yilga kelib qayta ochilgan.

2021 yil mart oyida jome yangi binosini qayta qurish ishlari boshlandi. Honaqosi 5 ming kishiga mo'ljallab barpo etilmoqda. Eskisiga 600 kishi sig'ar edi. Hozirda masjid xonaqosi poydevori qo'yilib, g'isht terish ishlari jadal olib borilmoqda. Minorasining balandligi 35 metr bo'lishi reja qilinmoqda.

Shuningdek, 50 sotoxni o'z ichiga olgan majmuada ayollar namozxonasi, ma'muriyat xonasi, qarovulxona va boshqa xizmat binolari o'rin olgan.

Ayni paytda yangi tahoratxonaning binosi bitkazilib, tom qismini yopish ishlari ketmoqda. Masjid yangi binosi qurilishini 2022 yilda bitkazish reja qilingan.

Tadbir so'ngida homiylar, usta-quruvchilar va bu xayrli ishga hissa qo'shayotgan barcha azizlarning haqiga xayrli duolar qilindi.

O'zbekiston musulmonlari idorasi matbuot xizmati