1. Nabiy sollallohu alayhi vasallamning ismlari Muhammad va Ahmaddir. 

2. Eng birinchi Nabiy sollallohu alayhi vasallamning tug‘ilishlarini Hazrati Ibrohim alayhissalom duo qildilar. 

3. Nabiy sollallohu alayhi vasallamning tug‘ilishlari sakkiz yoki o‘n yoki o‘n ikkinchi Robi’ul avval, 22-aprel, 571-milodiy sana dushanba kuni subhi sodiq vaqtida bo‘ldi.

4. Nabiy sollallohu alayhi vasallamning qavmlari Bani Hoshim, qabilalari Quraysh, nasllari Arabdir. 

5. Nabiy sollallohu alayhi vasallam otalarining ismi Abdulloh va onalarining ismi Ominadir. 

6. Nabiy sollallohu alayhi vasallam bobolarining ismi Abdulmuttolib, buvilarining ismi Fotima binti Amrdir. 

7. Nabiy sollallohu alayhi vasallamning ona tomonidan bobolarining ismi Vahb va ona tomonidan buvilarining ismi Barrodir. 

8. Nabiy sollallohu alayhi vasallam otalarining vafoti yigirma besh yoshlarida bo‘ldi. U kishining qabrlari Madinai Munavvaradadir. Muhtaram otalarining vafotlari chog‘ida Nabiy sollallohu alayhi vasallam onalarining qornida edilar. 

9. Nabiy sollallohu alayhi vasallamni tug‘ilganlaridan keyin to‘rt kungacha onalari emizdilar. Keyin bir necha kun Abu Lahabning cho‘risi Suvayba, keyin Hazrati Halima roziyallohu anho emizdilar. Hazrati Halima roziyallohu anhoning huzurida jami to‘rt yil turdilar. Keyin onalariga qayta topshirildilar. 

10. Nabiy sollallohu alayhi vasallam olti yosh bo‘lganlarida onalari o‘ttiz yoshlarida vafot etdilar. Onalarining qabri Madinai Munavvaradan Makkai Mukarramaga qarab yurganda sakson mil uzoqlikda Abvo degan joydadir. 

11. Nabiy sollallohu alayhi vasallam sakkiz yosh bo‘lganlarida bobolari Abdulmuttolib to‘qson sakkiz va bir so‘zga ko‘ra bir yuz o‘n yoshda vafot etdi. 

Abdulqayyum Komil
tarjimasi