Har bir insonning o'z sha'ni, obro'-e'tibori bor. Har bir o'zini hurmat qilgan kishi boshqa birovning ham hurmatini bilishi lozim. Afzal kishi shundayki, uning tili va qo'lidan boshqa mo'min-musulmonlar ozor ko'rmaydi. Bu haqda Abdulloh ibn Amr roziyallohu anhudan rivoyat qilingan hadisda Rasululloh sollallohu alayhi vasallam bunday dedilar: “Musulmon – qo'li va tili bilan boshqa musulmonlarga ozor bermagan odamdir, muhojir – Alloh taolo taqiqlagan narsalardan o'zini tiya bilgan odamdir!” dedilar.

Ba'zan esa bo'lar-bo'lmasga so'kadigan odamlarga duch kelamiz. So'kinish insonning tarbiyasizligidan, badxulq inson ekanligidan darak beradi.  Islom dinida birovni so'kish qoralanadi. Islom shariatida so'kinish harom bo'lgan amaldir. Abdulloh ibn Mas'ud roziyallohu anhudan rivoyat qilingan hadisda Payg'ambarimiz sollallohu alayhi vasallam: “Musulmon kishini so'kish fosiqlikdir, u bilan urushish esa kufrdir”, deganlar (Imom Buxoriy, Imom Termiziy, Imom Nasaiy rivoyati).

Islom dinida gunoh ishlarni qiladigan kishi fosiq deyiladi. Fosiq kishi gunoh ishlariga pushaymon bo'lib, tavba qilishi lozimdir.

Ayrim kishilar birovning ota-onasini so'kish bilan o'zlarining ota-onalarini la'natlaydilar. Bu haqda Rasululloh sollallohu alayhi vasallam: “Katta gunohlarning kattasi insonning o'z ota-onasini la'natlamog'idir”, dedilar. Shunda: “Yo Allohning Rasuli! Qanday qilib odam o'z ota-onasini la'natlaydi”, deb so'raldi. U zot sollallohu alayhi vasallam: “Bir odam birovning otasini so'ksa, u ham buning otasini so'kadi, onasini so'ksa, onasini so'kadi”, dedilar (Imomi Buxoriy rivoyati).

Hulosa qilib aytamizki, so'kinishlik badxulqlik belgisi va gunoh amaldir. Alloh taolo barchamizni gunoh ishdan qaytib, yaxshi xulq egasi bo'lishlik baxtiga muyassar aylasin!

R. Akbarov,

O'zbekiston musulmonlari idorasining

Qashqadaryo viloyatidagi vakillik xodimi.