Yaqinda Britaniya muzeyidan mamlakatimizga 6 naqshinkor tarixiy koshin qaytarildi. Ular mazkur muzeyning Yaqin Sharq departamenti katta kuratori J.Simpson tomonidan O'zbekistonning Buyuk Britaniyadagi elchixonasiga Vatanimizga qaytarish uchun topshirilgan. Koshinlarning umumiy og'irligi 25 kg bo'lib, 3 qutiga joylashtirilgan.

Ma'lumot uchun, koshinlar 2020 yilda O'zbekiston Respublikasi hududidan noqonuniy olib chiqib ketilgan hamda Londonning Hitrou aeroportida qo'lga olingan.

Britaniya mutaxassislar fikriga ko'ra, XIII-XIV asrlarga oid ushbu tarixiy yodgorliklar Samarqanddagi Shohi Zinda majmuasiga tegishli ekani ehtimol qilingan. Shuningdek, tomonlar kelishuviga ko'ra, koshinlar 17 maydan 1 avgustga qadar Britaniya muzeyida namoyish etilgan.

Shu munosabat bilan O'zbekiston Respublikasi Bosh vaziri o'rinbosari, Turizm va sport vaziri Aziz Abduhakimov Britaniya muzeyi direktori Hartvig Fisherga ko'rsatilgan amaliy yordam uchun minnatdorchilik yo'llab, har ikki davlat o'rtasidagi madaniy-gumanitar sohalardagi o'zaro manfaatli hamkorlik bundan keyin ham davom etishiga ishonch bildirdi.

O'zbekiston musulmonlari idorasi matbuot xizmati