Bugun AOKAda o'tkazilgan brifingda «Vaqf» xayriya jamoat fondi axborot xizmati rahbari Saidabror Umarov fond tomonidan 2018-2021 yillarda mamlakatimizdagi diniy ta'lim muassasalarini moddiy qo'llab-quvvatlash yo'nalishida amalga oshirilgan ishlar va xayriya tadbirlari haqida ma'lumot berdi:

Vaqf fondi 2018 yil 16 aprelda Prezident farmoni asosida tashkil etilgan vaqtda, diniy ta'lim muassasalarining binolarini qurish, ta'mirlash, rekonstruktsiya qilish, obodonlashtirish, moddiy-texnik bazasini mustahkamlash hamda diniy ta'lim muassasalari, ilmiy-tadqiqot markazlari faoliyatini moliyalashtirish, ularning professor-o'qituvchilari, tadqiqotchilari, mutaxassislari va o'quvchi-talabalarini moddiy va ijtimoiy qo'llab-quvvatlash fondning asosiy vazifalaridan qilib belgilangan edi.

O'tgan uch yildan ziyod vaqt mobaynida Fond tomonidan mazkur vazifalarni bajarish uchun salmoqli ishlar amalga oshirildi.

Jumladan, O'zbekiston musulmonlari idorasi tasarrufidagi 3 ta oliy: Imom Buxoriy nomidagi Toshkent islom instituti, Mir Arab oliy madrasasi va Hadis ilmi maktabi hamda 10 ta o'rta maxsus Islom bilim yurtlari faoliyatini moliyalashtirish, ularning professor-o'qituvchilari, tadqiqotchilari, mutaxassislari va o'quvchi-talabalarini moddiy va ijtimoiy qo'llab-quvvatlash uchun

– 2018 yilda          723 533 386 so'm;

– 2019 yilda          2 222 700 000 so'm;

– 2020 yilda          1 410 634 244 so'm;

– 2021 yilda          2 272 795 617 so'm.

Shuningdek, pandemiya davrida hukumatimiz tomonidan fondga ajratilgan xayriya mablag'lari hisobidan 3 133 000 000 so'm diniy ta'lim muassasalariga xayriya sifatida yo'naltirildi.

Umumiy hisobda fond o'z faoliyatini boshlagandan bugunga qadar jami 9 762 663 247 so'm diniy ta'lim sohasiga xayriya sifatida yo'naltirilgan.

Ta'kidlash joizki, fond tomonidan ushbu xayrli ishlarni amalga oshirishda xorijiy hamkorlar Saudiya Arabistoni, Germaniya va Turkiya qirolligi kabi davlatlarning ham salmoqli hissalari bor.

“Vaqf” fondi ona-Vatanimizda ilm-fan va diniy ta'lim rivojlanishiga hissa qo'shishda davom etadi va bu xayrli ishda barcha hamyurtlarimizni hamkorlikka chorlab qoladi.