Parkent tumani “Sirli” jome masjidida marhum muftiy Usmonxon Alimov, Toshkent viloyatining sobiq bosh imom-xatibi Hayrulloh domla Turmatov, Parkent tumanida yashab, dinimizga xizmat qilib o'tgan imom domlalarni xotirlash maqsadida ehson dasturxoni yozildi.
Qur'oni karim tilovati bilan boshlangan xotira tadbirida marhum imomlarimizning xayrli ishlari, dinimiz ravnaqi yo'lida qilgan xizmatlari eslanib, ularning haqlariga xayrli duolar qilindi.
Yig'ilishda hududdagi masjidlar qurilishida faol, tashabbuskor va jonkuyar bo'lgan imomlar O'zbekiston musulmonlari idorasi Toshkent viloyati vakilligi tomonidan tashakkurnomalar bilan taqdirlandi.
Tadbirda ishtirok etgan O'zbekiston musulmonlari idorasi Masjidlar bo'limi mudiri Muhammadnazar domla Qayumov, Toshkent viloyati bosh imom-xatibi o'rinbosari Mirodil domla Mirjalilov, Toshkent tumani bosh imom-xatibi G'ulomiddin domla Ergashev, Zangiota tumani “Abu Bakr Siddiq” jome masjidi imom-xatibi Nurali domla Mavlonov o'z ma'ruzalari hamda duolari bilan yig'ilishni chiroyli yakunlab berdilar.
Tadbir so'ngida Qur'oni karim xatmi marhum domlalar ruhlariga bag'ishlandi.










Mamlakatimiz rahbariyati tashabbusi bilan xorijda mehnat qilayotgan yurtdoshlarimiz holidan xabar olish, ular bilan ma’naviy-ma’rifiy suhbatlar o‘tkazish maqsadida bir guruh taniqli ulamolar va imom-xatiblar xizmat safariga yo‘l olgan edi.
Ayni paytda Janubiy Koreya Respublikasida bo‘lib turgan Shahrisabz shahridagi “Hazrati Imom” masjidi imom-xatibi Akmal qori Nizomov vatandoshlarimiz bilan uchrashuvlar o‘tkazmoqda. Jumladan, Mokpo shahrida mehnat faoliyatini olib borayotgan o‘zbekistonlik fuqarolar bilan samimiy muloqotlar tashkil etildi.
Uchrashuvlardan ko‘zlangan asosiy maqsad — vatandoshlarimizga muborak Ramazon oyini ko‘tarinki ruhda, ibodat va ezgu amallarga boy tarzda o‘tkazishlariga ko‘maklashish, ularning diniy savodxonligini yanada oshirishdan iborat.
Suhbatlar davomida ro‘za tutishning fazilatlari, tarovih namozining ahamiyati, sabr-qanoat, ahillik va o‘zaro hurmat masalalari atroflicha yoritildi. Shuningdek, ishtirokchilarni qiziqtirgan savollarga batafsil javoblar berilib, amaliy tavsiyalar taqdim etildi.
Bunday ma’naviy-ma’rifiy uchrashuvlar xorijdagi yurtdoshlarimizni qo‘llab-quvvatlash, ularning yuksak ma’naviy ruhini mustahkamlash va Vatan bilan bog‘liqlik hissini yanada kuchaytirishga xizmat qilmoqda.
O‘zbekiston musulmonlari idorasi
Matbuot xizmati