Navoiy viloyati safari davomida O'zbekiston musulmonlari idorasi raisi birinchi o'rinbosari Homidjon Ishmatbekov Qiziltepa tumaniga tashrif buyurib, asr namozini “Toshmasjid” jomesida jamoat bilan ado etdi, so'ng masjid qavmiga “Zikrning fazilati”, “Oila muqaddas dargoh”, “Shukronalik” mavzularida ilmiy-ma'rifiy suhbat qilib berdi.

Suhbat asnosida dinimizda targ'ib qilingan, savobli va Parvardigorga sevimli amallardan biri – Alloh taoloni ko'p zikr qilish, uni hamdu sanolar bilan eslab yod etish ekani ta'kidlandi. Zero, Alloh taoloni eslab yod etish bandaga dunyo va oxiratda ko'plab foydalar keltiradi.

Birinchidan, banda Alloh taoloni zikr qilish bilan Robbisining ilohiy buyrug'ini bajargan bo'ladi. Alloh taolo Qur'oni karimda shunday deydi: “Ey, imon keltirganlar! Allohni ko'p zikr qilingiz va ertayu kech Unga tasbeh aytingiz!” (Ahzob surasi 41-42-oyatlar).

Ikkinchidan, Alloh taolo mag'firat va ulug' ajr va'da qilgan erkak va ayollardagi bir nechta sifatlardan bir sifatga ega bo'ladi.

Payg'ambarimiz alayhissalom zikr qiluvchi kishi va zikr qilmaydigan kishini quyidagicha tasvirlaydilar: “Robbisini zikr qiluvchi va Robbisini zikr qilmaydigan kishining misoli xuddi tirik va o'lik kabidir” (Muttafaqun alayh).

Alloh taoloning roziligini topish va oxiratda yutuqqa erishish musobaqasida g'olib bo'luvchilar Alloh taoloning zikrini ko'p qiluvchi mo'min va mo'minalardir. Zero, Payg'ambarimiz alayhissalom shunday marhamat qilganlar: “Mufarridlar peshqadam bo'ldilar”. “Ey, Allohning Rasuli! Mufarridlar kimlar?”, deyishdi. U Zot alayhissalom: “Alloh taoloni ko'p zikr qiluvchi erkak va ayollar”, – deb javob berdilar.

Alloh taolo barchamizni ko'p zikr qiluvchi bandalaridan qilib, ikki dunyo saodatiga musharraf aylasin!

Ma'rifiy suhbat davomida masjid qavmi savollariga javob oldi. Yakunda xayrli duolar qilindi.

O'zbekiston musulmonlari idorasi matbuot xizmati