Dinda savolim bor: Qaldirg'ochning inini buzsa bo'ladimi?
— Honadonimizning shiftida qaldirg'ochning to'rtta ini bor. Yaqinda uyni ta'mirlamoqchimiz, lekin shu inlarni buzishga ikkilanib turibmiz. Qaldirg'ochning uyini buzsa, qarg'aydi deb eshitganman. Dinimizda qush va jonivorlarga ozor bermaslik kerakligi aytilgan. Agar biz buzsak, ularga ozor bergan bo'lib qolmaymiz-mi?
— Qaldirg'och ham hamma qushlar kabi qush. Uning mo''tabar jihatlari yo'q. Kimningdir uyiga in qursa baxt, qurmasa badbaxtlik emas. Agar vaziyat shuni taqozo qilgan bo'lsa, iloji bo'lsa, qush yoki jonzotlarga ozor bermay, inini boshqa erga ko'chirib qo'yish mumkin. Mabodo in ichida tuxumlari bo'lsa, ularni ham ehtiyotlab olish maqsadga muvofiqdir. Vallohu a'lam
Yurtimiz bo‘ylab 6000 nafarga yaqin obodonlashtirish xodimlariga bayram hadyalari ulashildi
Mustaqilligimizning 35 yillik bayrami arafasida O‘zbekiston musulmonlari idorasi huzuridagi “Vaqf” xayriya jamoat fondi mahalliy hokimliklar bilan hamkorlikda yurtimiz ozodaligiga beqiyos hissa qo‘shib kelayotgan 2500 nafardan ortiq obodonlashtirish xizmati xodimlariga oziq-ovqat jamlanmalari tarqatdi.
Tadbirlardan ko‘zlangan asosiy maqsad mashaqqatli va sharafli mehnati har doim ham ko‘zga ko‘rinavermaydigan soha xodimlarining mehnatini e’tirof etish, ularning qalbiga bayram shukuhi, xonadonlariga quvonch kiritishdir.
Inson qadrini ulug‘lash va ijtimoiy himoyaga muhtoj qatlamni qo‘llab-quvvatlashga qaratilgan bu kabi xayrli ishlar shu kunlarda yanada keng quloch yozib, mamlakatimizning barcha hududlarida o‘tkazildi.
Shuningdek, homiylar tomonidan Respublikamiz bo‘ylab 3500 nafarga yaqin ana shunday fidoyi xodimlarning ko‘ngli xushnud etildi.
Bu kabi xayr-saxovatga yo‘g‘rilgan bayram tadbirlari o‘lkamizning barcha go‘shalarida davom etmoqda.
O‘zbekiston musulmonlari idorasi Matbuot xizmati
