Ikkinchi yildirki, karonavirus xastaligi butun dunyoga tashvish solib turibdi. Ayni kunlarda ham bu kasallik yanada avj olgan. Jahonning aksariyat davlatlari qattiq karantin holatiga qaytmoqda. Jumladan, qo'shni mamlakatlarda ham ushbu holat kuzatilyapti.
Yurtimizda esa hukumatimiz tomonidan xalqimiz sog'lig'ini asrash yo'lida jiddiy sa'y-harakatlar amalga oshirilmoqda. Aholi navbati bilan karonavirusga qarshi emlanyapti. Lekin kasallanish holatlari to'xtagani yo'q. Shunday bo'lishiga qaramay, masjidlarimizda muborak ramazon oyining taroveh namozlari o'qilmoqda, xatmi Qur'on o'tkazilmoqda. Albatta, bu yurtdoshlarimiz uchun katta imkoniyat va baxtdir. Biz ham taroveh namozlarida tibbiy niqob taqib, oraliq masofani saqlashimiz, qo'l berib ko'rishmasligimiz kerak.
Bugun karantin holatiga kirgan davlatlarda odamlar ko'chaga ham chiqolmay qiynalishmoqda. Ta'lim muassasalari, turli tashkilot va idoralar faoliyati onlayn rejimiga o'tgan. Shu davlatlarda yashayotgan musulmonlar esa taroveh namozlari, xatmi Qur'onlarni sog'inishmoqda. Shu ma'noda, biz shunday baxtga musharraf qilgani uchun Alloh taologa shukurlar aytishimiz kerak. Namozlarimizda esa yurtimiz tinchligi, karonavirus kasalligi tezroq xalqimiz boshidan arishini Yaratgandan so'rab duoi iltijolar qilsak, har jihatdan maqsadga muvofiq bo'ladi.
Masjidlarimiz namozxonlarga to'lib, o'zgacha tarovat kasb etmoqda. Muazzinu qorilarning diltortar tilovatlari esa, mo'min-musulmonlarning qalbiga inib, tavba-tazarru hamda shukronalik hislarini uyg'otmoqda. Bir so'z bilan aytganda, muazzam Ramazon oyi kishilarni som'e va xushu bilan ibodat qilishga undamoqda. Zotan, Payg'ambarimiz sallolohu alayhi vasallam: “Kim ramazon kechalarida turib, ibodat qilish sunnatligiga ishonib, savob umid etib ibodat qilsa, oldingi gunohlari kechiriladi” (Abu Hurayradan rivoyat qilingan), deganlar. Alloh taolo hammamizni ana shunday saodatga musharraf etsin.
O'zbekiston Musulmonlari idorasi
Matbuot xizmati
O‘zbekiston Respublikasi Din ishlari bo‘yicha qo‘mita, Sergeli tuman hokimligi hamda Ma’rifiy targ‘ibot markazi hamkorligida Sergeli tumanidagi 104-maktabda "Xo‘ja Alambardor" jome masjidi imom-xatibi Ustoz Rahimberdi domla Rahmonov ishtirokida "Qipchoq" va "Saxovat" MFYda istiqomat qiluvchi ota-onalar va aholi vakillari bilan ma’rifiy tadbir bo‘lib o‘tdi.
Tadbir davomida jaholatning jamiyat rivojiga yetkazadigan salbiy oqibatlari, ilm-ma’rifatning esa inson hayoti va jamiyat taraqqiyotidagi o‘rni haqida atroflicha so‘z yuritildi. Islom dinining asl insonparvarlik tamoyillari, ilm va adolatga chaqiruvchi mohiyati haqida batafsil tushuntirishlar berildi.
Shuningdek, ota-onaga hurmat va ularga xizmat qilishning fazilati, farzand tarbiyasidagi ma’rifat va Vatanga sadoqat ruhini shakllantirishning ahamiyati alohida ta’kidlandi.
Tadbir so‘ngida aholi tomonidan berilgan savollarga javoblar berildi.
t.me/marifiymarkaz