OZ-OZ O'RGANIB DONO BO'LUR...

*   *   *

ZahiruddinMuhammad Bobur xazinalari

*   *   *

MUBAYYaN VA NASRIY BAYoNI

*   *   *

IYMON-E_''TIQOD  KITOBI

*   *   *

NAZM

Ishorat iymon sharoyitig'a

Bilki, iymon sharoyiti bordur,

Ahli iymon aro muqarrardur.

Birisi – g'aybqa ketur iymon,

Bo'ldi iymon ya'si bedarmon.

G'ayb olamini xossayi Haq bil,

So'z budur, shar' ichra mundoq bil.

Yana Haqdin kerak umid ila biym,

Muni deb yurma: bor Hudoyi karim.

Yana bilgil halol haqni halol,

Bil haromni ham haromu vubol.

Tengrining  dushmanig'a  dushman  bo'l,

Tengrining sevganini sevgan bo'l.

NASRIY BAYoN

Iymon shartlarining bayoni

Bilginki,  iymonning  shartlari  bordir,  (bu  shartlar)  ahli  iymon  o'rtasida  muqarrar  qilingandir.  Birinchi, g'aybga  iymon  keltir. Iymon ya'si, ya'ni umidsizligi bedarmon darddir. G'ayb olamini Haq  ta'oloning  xos  ishlaridan,  sirlaridan  deb  bil.  (Muhim)  so'z ana shudir, shari'atda (e'tiqod) ana shunday deb bil.

Yana Allohdan umid bilan qo'rquv (xavf va rajo) bo'lishi lozim, Allohim karamli, deb yur(ib g'aflat va halokatga qol)ma.

Yana halol haqni halol deb bil, haromni harom va vabol – gunoh deb e'tiqod qil. Allohning dushmaniga dushman bo'l, Allohning sevganini sevgan bo'l – do'stiga do'st bo'l.

IZOH. Havf va rajo (qo'rquv va umid) iymon qushining ikki qanotidir. Yuqorida aytilganidek, bu ikkisi barobar bo'lishi shartdir. Allohning rahmatidan umid uzish mumkin emasligiga dalil ushbu oyati karimadir:

Zumar surasi,  53-oyat ma'nosi: “Aytingki: «(Alloh bundoq der:) «Ey Mening o'z o'zlariga qarshi (gunoh qilib) haddan oshgan bandalarim! Allohning rahmatidan umid uzmanglar!..»

“Muni deb yurma: bor Hudoyi karim” satri ushbu oyati karimaga ishorat qiladi Luqmon surasi, 33-oyat ma'nosi: «(Ey insonlar!) O'ta aldamchi (shayton va uning do'stlari) ham sizlarni Alloh(ning afvi, karami va marhamati keng, gunohlar qilib yayrab qolaveringlar degan firib) bilan aldab qo'ymasin (gunohga botirib, ibodatdan chalg'itmasin)!».

Nasriy bayon va sharh muallifi:

            Mirzo KYeNJABYeK.