Butunjahon turizm tashkiloti Bosh kotibi Zurab Pololikashvili O'zbekistonning turizmni bolalikdan boshlashga doir tashabbusini yuqori baholab, ushbu tashabbusni butun dunyo mamlakatlari maktablarida alohida fan sifatida kiritish va sohaga oid darslik yaratishga turtki bo'lishini ta'kidladi.
Pololikashvili bu haqida Bosh vazir o'rinbosari, Turizmni rivojlantirish davlat qo'mitasi raisi Aziz Abduhakimovning Ispaniyaga tashrifi doirasida o'tgan uchrashuvda ma'lum qilgan. Aziz Abduhakimov BTT Bosh kotibiga bugungi kunda O'zbekiston aholisi, ayniqsa, yoshlar o'rtasida turizm madaniyatini shakllantirish yo'lida amalga oshirilayotgan ishlar haqida ma'lumot berdi. “O'zbekistonda yoshlar orasida sohaga qiziqish uyg'otish maqsadida mamlakat bo'ylab umumta'lim maktablarida joylashga mo'ljallangan turistik xarita yaratildi. Shu bilan birga, bolalikdan sayohat madaniyatini shakllantirishga yordam beruvchi "Yosh sayyoh" qo'llanmalari ishlab chiqildi. Maktablarda o'quv dasturiga "Turizm soati" kiritilmoqda”, - dedi Bosh vazir o'rinbosari. Turizmni rivojlantirish davlat qo'mitasi matbuot xizmati xabariga ko'ra, O'zbekiston Prezidenti tashabbusi bilan Hukumat tomonidan amalga oshirilayotgan bu kabi amaliy ishlar UNWTO Bosh kotibida katta qiziqish uyg'otdi.
"Turizmni rivojlantirishni bolalardan boshlash bo'yicha O'zbekiston tajribasi UNWTO hamkorligida butun dunyo mamlakatlarining boshlang'ich maktablari uchun alohida fan joriy qilish va darslik yaratishga turtki bo'ladi. Bu fanni Osiyoda ilk bor O'zbekiston maktablarida sinovdan o'tkazishni taklif qilaman", - dedi Pololikashvili.

O'zbekiston musulmonlari idorasi matbuot xizmati