Olimlar davrasi ko'p ibratli. U erda fikr, ma'rifat, bilim, ajoyib g'oyalar qaynaydi. Moddiy manfaat, pul va boylik ularning xayoliga ham kelmaydi.
Shu yilning fevral' oyi. Halqaro islom akademiyasida atoqli manbashunos olim Ubaydulla Uvatov tavalludining 80 yilligiga bag'ishlangan ma'rifiy anjuman avjida. Ustoz olimning eng yaqin do'sti, safdoshi Ahadjon Hasanovga so'z berilganida, davra birdan yanada jonlandi. Ma'lum bo'lishicha, u kishi Uvatov domla bilan 62 yillik sinashta, hamfikr do'st ekan. Yoshlik davrining beg'ubor, zavqli onlari, futbolga ishqibozlik, ilk xorijiy safar, ilm yo'lidagi izlanishlarga oid ham hayotiy, ham samimiy, iliq xotiralar anjumanga o'zgacha fayz bag'ishlagan edi.
O'zA xabariga ko'ra, Ahadjon akaning tarix faniga qiziqishi maktab davridan boshlangan. Keyinchalik oliy ta'lim dargohida olgan bilimlari Sharq mamlakatlari tarixiga oid yangi izlanishlarga turtki berdi.
1962 yilda Ubaydulla Uvatov bilan birga Misrga xizmat safari kelgusidagi tadqiqotlar uchun yangi sahifalar ochgani shubhasiz.
Mutaxassislarning fikricha, islom tarixi, manbashunosligi, ajdodlarimizning ilmiy-ma'naviy merosini o'rganish, buyuk o'tmishimizning shonli davrlarini turli manbalar, qo'lyozma asarlar asosida xolis tadqiq etish borasida HH asrning so'nggi choragida O'zbekistonda yirik ilmiy maktab yaratildi. Ushbu ilmiy maktabning rivojlanishida zamonamizning taniqli olimi, tarix fanlari doktori, professor Ahadjon Hasanovning xizmatlari beqiyosdir.
A.Hasanov ilmiy, pedagogik faoliyat bilan birga, mamlakatimizda diniy-ma'rifiy soha rivojiga munosib hissa qo'shgan olimlardan. Jumladan, O'zbekiston Respublikasi Prezidenti Administratsiyasi, Toshkent davlat sharqshunoslik instituti, Toshkent islom universiteti (hozirda O'zbekiston xalqaro islom akademiyasi)da pedagog-ustoz va rahbarlik lavozimlarida faoliyat olib bordi.
2011 yili ustoz A.Hasanovning mehnatlari hukumatimiz tomonidan munosib baholanib, “O'zbekistonda xizmat ko'rsatgan yoshlar murabbiysi” faxriy unvoniga sazovor bo'lgan.
Tarix fanlari doktori Ahadjon Hasanov ko'p yillik mehnati natijasida 1975 yilda “Misr mamluklarining ijtimoiy-siyosiy tizimi" mavzusida nomzodlik, 1994 yilda "Qadimiy Arabiston tarixi va uni o'rganish muammolari" mavzusida doktorlik dissertatsiyalarini himoya qildi.
Igna bilan quduq qazishdek mashaqqatli mehnat natijasida 20 dan ortiq ilmiy monografiya, risola, darslik va o'quv qo'llanmalari, 200 ga yaqin maqolalar yozdi. Olim "Makka va Madina tarixi", "Qadimgi Arabiston", "Qadimgi Arabiston va ilk islom", "Ilk islom jamiyati: diniylikdan dunyoviylikka o'tish", "Islom tarixi" va boshqa ko'plab ilmiy kitoblar, darslik, qo'llanma, monografiyalar muallifidir.
Ahadjon Hasanov talabalarga saboq berish bilan birga, O'zbekiston musulmonlari idorasi ulamolar kengashi a'zosi, O'zbekiston xalqaro islom akademiyasi kengashi a'zosi, islomshunoslik fanlari bo'yicha ilmiy kengash raisining o'rinbosari sanaladi.
Vatanimiz mustaqilligining 29 yilligi arafasida Prezidentimiz farmoniga ko'ra, ustoz "Mehnat shuhrati"ordeniga munosib topildi.
– Mehnatimning bunday e'tirofi men uchun kutilmagan bo'ldi, –dedi Halqaro islom akademiyasi "Islom tarixi va manbashunosligi – IRCICA" kafedrasi professori Ahadjon Hasanov. – Yurtimizda ma'naviy-ma'rifiy jabhalarda kechayotgan ijobiy o'zgarishlar yangi izlanishlar sari undaydi.
Ha, sakson yoshda ham hamon ilm izlayotgan olimning faoliyati chindan ham ibratdir.

O'zbekiston musulmonlari idorasi matbuot xizmati