Ramazon jo‘nab ketishga tayyorgarlik ko‘rmoqda. U kunlarini yig‘ishtirishni boshladi. Allohim! Bu oyning muattar hididan nafas oldirganing uchun O‘zingga beadad hamd bo‘lsin! Allohim! Ushbu oyga yetkazganingdek, undagi ibodatlarni ham qabul et. Qabulidan mahrum etma! (Doktor Ahmad Iso Ma’saraviy).
Allohim! Bizga bergan va berayotgan barcha: oshkoru maxfiy, zohiru botin, umumiyu xos ne’matlaring uchun O‘zingga hamd, shukru sanolarimiz bo‘lsin!
Allohim! Yana uzoq yillar qalbimiz xotirjam bo‘lgan holda muborak Ramazon oyiga, uning fazilatlariga yetkaz!
"Qasamki, agar (bergan ne’matlarimga) shukr qilsangiz, albatta, (ularni yanada) ziyoda qilurman"(Ibrohim surasi, 7-oyat) deb marhamat qilgan Alloh taolo beadad hamdu sanolar bo‘lsin!
Davron NURMUHAMMAD
Shu yil 4 may kuni Mir Arab o‘rta-maxsus islom ta’lim muassasasida talabalarning Qur’oni karimga bo‘lgan muhabbatini oshirish va hofizi kalomlarni qo‘llab-quvvatlash maqsadida an’anaviy Qur’on musobaqasining yakuniy bosqichi bo‘lib o‘tdi.
«Imom Osim ibn Abu Najud izdoshlari – Qur’oni Karim oshiqlaridir» shiori ostida tashkil etilgan ushbu tadbir yuqori saviyada o‘tkazildi.
Musobaqa ishtirokchilari ikki yo‘nalish — Qur’oni karimni to‘liq yod olganlar hamda 29-30-juzlarni mukammal o‘zlashtirganlar bo‘yicha o‘z mahoratlarini namoyish etdi. Talabalarning qiroat va tajvid mahoratini tajribali ustozlar Diyorbek Ahmedov va Anvar Karimovlar baholab bordi.
Tadbirda Mir Arab o‘rta-maxsus islom ta’lim muassasasi mudiri Jaloliddin Saburov, oliy madrasa katta ustozi Ismoiljon Hamroqulov va boshqa soha vakillari ishtirok etib, qorilarning ilm yo‘lidagi zafarlariga xayrli duolar qildi.
Qizg‘in kechgan musobaqa natijasiga ko‘ra, to‘liq hifz yo‘nalishida oliy madrasa talabasi Islom Ilhomov hamda o‘rta-maxsus ta’lim muassasasi talabasi Muhammad Abrorxon Yunusxonov birinchi o‘rinni qo‘lga kiritdi. 29-30-poralar bo‘yicha Javlonbek Turdiqulov eng yuqori natijani qayd etdi.
Musobaqa yakunida g‘oliblarga qimmatbaho sovg‘a va pul mukofotlari topshirildi.
Shuningdek, tadbir doirasida Qur’oni karimni ilk bor to‘liq yodlab tugatgan 20 nafarga yaqin talaba alohida e’tirof etilib, taqdirlandi.
Bu kabi musobaqalar kelajakda yurtimizdan yetuk ulamolar va qorilar yetishib chiqishiga xizmat qiladi.
O‘zbekiston musulmonlari idorasi
Matbuot xizmati