Kuni kecha matbuotda O‘zbekiston Respublikasi Prezidentining «Diniy-ma’rifiy soha faoliyatini tubdan takomillashtirish chora tadbirlari to‘g‘risida»gi farmoni e’lon qilindi.

Yaxshi gapning qanoti bo‘ladi, deganlaridek, mazkur tarixiy hujjatni yurtdoshlarimiz o‘zgacha xush kayfiyat, ko‘tarinki ruh bilan kutib oldilar. Farmonda ko‘p asrlik milliy va diniy qadriyatlarimizni avaylab asrash, dunyo ilm-fani va madaniyati rivojida ulkan hissa qo‘shgan ajdodlarimizning bebaho merosini o‘rganish, shu asosda yoshlarni komil inson etib tarbiyalash, jamiyatda barqaror ijtimoiy-ma’naviy muhitni ta’minlashning muhim shartlaridan biri ekanligi alohida ta’kidlangan.

Ta’bir joiz bo‘lsa, Farmon aynan ana shu maqsadlarga xizmat qilishga da’vat etadi. Mamlakatimizda diniy bag‘rikenglik, vijdon erkinligi naqadar muqaddas ekanligini yana bir karra ifodalaydi.

Ma’lumki, keyingi yillarda muqaddas dinimizga xizmat qilish yo‘lida, umuman, diniy-ma’rifiy sohada misli qo‘rilmagan islohotlar amalga oshirilmoqda. Islom sivilizatsiyasi markazi, Islom akademiyasi, Mir-Arab oliy madrasasi, Imom-Buxoriy va Imom-Termiziy xalqaro ilmiy-tadqiqot markazlarining boy madaniy merosi keng ommalashtirilmoqda. Qur’on musobaqalarining o‘tkazilishi, asl inoyat bo‘lgan go‘zal tilovatlarning mamlakatlarimiz ommaviy axborot vositalarida baralla yoritilishi, yangi masjid va namozxonalarning ochilishi haqida ko‘p va xo‘b gapirish mumkin.

Farmonda diniy-ma’rifiy soha faoliyatini tubdan takomillashtirishning ustuvor yo‘nalishlari aniq va ravshan belgilab berilgan. Bu oldimizga yangidan-yangi dolzarb vazifalarni qo‘ymokda va mas’uliyatimizni oshirmoqda. Endi avvalgidek, ya’ni eskicha qolip bilan ishlab bo‘lmaydi. Har birimiz joylarda ijtimoiy-ma’naviy muhit barqarorligini ta’minlash ishiga o‘zimizning munosib hissamizni qo‘shishimiz lozim. Farmon matni bilan tanishar ekanmiz, yana bir karra biz, diniy soha vakillarini ish joyi asli odamlar orasida, degan qat’iy fikrni mustahkamlab oldik.

Haqiqatan ham, hamisha odamlar orasida bo‘lish, ularga yaxshilikni targ‘ib qilish, yomonlikdan qaytarish ham farz, ham qarz ekanligini bir daqiqa ham unutishga xaqqimiz yo‘q. Chunki odamlar biz din vakillariga ko‘proq ishonadilar. Ayni vaqtda esa, biz bundan to‘g‘ri va oqilona foydalanishimizni davrning o‘zi taqozo etmokda.

Farmonning har bir jumlasi, har bir satri haqida uzoq va maroqli mushohada yuritish mumkin. Ushbu hujjat bilan diniy ijtimoiy jarayonlarni o‘rganish, axborot-tahlil markazi, O‘zbekiston xalqlararo Islom akademiyasi, uning tarkibida mintaqaviy filiallarga ega bo‘lgan malaka oshirish markazlari, Hadis ilmi maktabi, «Vaqf» hayriya jamoat fondi tashkil etilayotganligi, «Ziyo» media markazi ishi samaradorligini oshirish chora-tadbirlari, «Imom-Buxoriy” davlat mukofotining ta’sis etilishi va boshqalar har bir mo‘min-musulmon zamondoshimiz qalbida faxr va iftihor tuyg‘ularini jo‘sh urdirishi shubhasiz, belgilangan chora tadbirlar doirasida diniy-ma’rifiy tashkilotlarning moddiy-texnik ta’minotini mustahkamlash, soha vakillari mehnatini munosib rag‘batlantirish, ijtimoiy himoyasini kuchaytirish kabi masalalar ham qamrab olingani tahsinga sazovor.

Bu Farmonning qadr-qimmati ko‘pni ko‘rgan, keksa diniy ulamolarimizning suhbatlariga kuloq tutib, yani o‘tmishda ular qanday qiyinchiliklarga va taqiblarga duch kelganliklarini mushohada qilganimizda yana o‘n karra ortadi, desak mubolag‘a bo‘lmas. Shularni o‘ylab, bugungi dorilamon kunlarga yetib kelganligimizga shukronalar qilamiz. Bir paytlar xo‘rlangan diniy soha xodimlari, imom-xatiblar bugun jamiyatimizning eng ilg‘or vakillariga aylanganligi uchun Yaratganga hamdu sanolar aytamiz.

Xulosa o‘rnida aytish mumkinki, Farmon satrlarida muqaddas dinimizning asl insonparvarlik mohiyati, ezgulik, tinchlik va insoniylik kabi fazilatlari azaliy qadriyatlarimiz ifodasi ekanligi to‘laqonli aks etib turibdi. U Vatanimiz ravnaqi, xalqimiz baxt-saodati yo‘lida tinmay samarali mehnat qilishga undaydi. Diniy-ma’rifiy sohadagi faoliyatimizni yangi sifat bosqichiga ko‘tarishga xizmat qiladi.

E’tibor bergan bo‘lsangiz kerak, keksalarimiz duoga qo‘l ochganlarida dini Islomga quvvat bersin, deb niyat qiladilar.

Islom ma’rifatini, uning olijanob qadriyatlari, ezgu insoniy tamoyillarini teran tushungan, nafaqat xalqimizga, butun bashariyatga yaxshilik istab yashayotgan, muqaddas dinimizga xolis xizmat qilayotgan Yurtboshimizdan Alloh rozi bo‘lsin!

M.MIRJALILOV

Qibray tumani bosh imom-xatibi