Bugun gapirish va eshitish qobiliyatlari cheklangan shaxslar uchun Diniy idora tomonidan navbatdagi xayriya tadbiri tashkil etildi. Mana shunday kishilarimizni Toshkent viloyati Zangiota tumani “Zangiota” ziyoratgohiga tashriflari amalga oshirildi. Ushbu tadbirda 300 nafarga yaqin imkoniyati cheklangan shaxslar va ularning oila a’zolari qamrab olindi.
Ziyoratchilar bugun ertalabdan Toshkent shahridan jamlanib, Zangiota ziyoratgohi sari yo‘l olishdi. Ziyoratchilar uchun alohida transport vositalari, gid va surdo tarjimoni xizmatlari jalb etildi.
Imom-xatiblarimiz tomonidan ziyoratchilarga Zangiota majmuasi tarixi haqida ma’lumotlar berildi. Jumladan, o‘z davrida hikmatga to‘la so‘zlari ila kishilarni eng to‘g‘ri yo‘lga boshlab, o‘zidan keyin o‘chmas iz qoldirib ketgan zotlar ushbu zaminda juda ko‘plab o‘tgani, ularning ortidan ergashgan insonlar hidoyat topishgani haqida ma’lumotlar berishdi.
Mana shunday zotlardan biri Sulaymon Boqirg‘oniyning shogirdi va izdoshi Zangi ota Himmatiy hazratlarining kamtarona hayoti, ko‘p kishilarning hidoyat topishida, axloqiy kamolga yetishida buyuk xizmatlari haqida gapirish va eshitish qobiliyatlari cheklangan shaxslarga imom-domlalar tomonidan surdo tarjimoni orqali tushuntirildi.
Ziyoratchilar uchun tushlik vaqtida ehson dasturxoni yozildi va yakunda Qur’on karim oyatlaridan tilovat qilinib, o‘tganlarning ruhi poklariga baxshida qilindi.
Gapirish va eshitish qobiliyatlari cheklangan shaxslar tashkil etilgan mana shunday tabarruk joylarga fayzli ziyorat va ma’rifiy suhbat uchun minnatdorlik bildirishdi.

O‘zbekiston musulmonlari idorasi Matbuot xizmati