Bugun erta tongdan Haq taolo kalomini eshitishga mushtoq bo‘lgan qashqadaryolik mo‘ysafid otaxonlar, talaba-yoshlar va keng jamoatchilik vakillari Qarshi shahridagi “Baxtli oila” koshonasiga jam bo‘lishdi.
Ayni damlarda ushbu viloyatda musobaqaning viloyat bosqichiga oq fotiha berildi. Koshonaga yig‘ilgan barcha-barcha Qur’on oshiqlari qorilar qiroatidan bahramand bo‘la boshlashdi. Dastlab eng mashhur ziynat qori Hasanxon qori Abdulmajidxon tilovati bilan boshlandi.
Shu o‘rinda bir mutasavvif shoirning to‘rtligini keltiramiz:
Kimki Qur’on o‘quvchidir, azob bo‘lmas,
Yana Qur’on o‘rgatganga hisob bo‘lmas,
Ma’no bilgan zotga parda-hijob bo‘lmas,
Vasli ayon bo‘lsin desang, Qur’on o‘qi.
Shunday ekan azizlar, mana shu she’rda bitilgan ilohiy va’dalarga erishmoqchi bo‘lsangiz, qorilar musobaqasini biz bilan birga kuzating.
Bizning muslim.uz portali va ijtimoiy tarmoqlarni kuzatib boring.

O‘zbekiston musulmonlari idorasi Matbuot xizmati