Rabi’ul avval oyi – musulmonlar uchun xursandchilik oyi bo‘lib, bu oyda butun olamlarga rahmat payg‘ambar Muhammad sollallohu alayhi vasallam tavallud topganlar. Bu oyni mo‘min-musulmonlar o‘zgacha tayyorgarlik bilan kutib olishadi va Rasuli Akram alayhissalomga bo‘lgan muhabbatning kichik bir ko‘rinishi sifatida mavlidi sharif tadbirlari o‘tkaziladi.
Bugun, 24 noyabr kuni respublikamizning ko‘plab masjidlarida Nabiy sollallohu alayhi va sallamning siyratlari, yuksak axloq-odoblari va oliy fazilatlari haqida mav’izalar qilindi. Shuningdek, jome masjidlarda Imom Ja’far Barzanjiy rahmatullohi alayh tomonidan Nabiy alayhissalom tug‘ilishlari, hayot yo‘llari, axloqlari to‘g‘risida bitilgan “Mavlidi sharif” kitobi o‘qildi va bunga namozxonlar chin ixlos ila some’ bo‘lishdi.
Ana shunday mavlid marosimlaridan biri poytaxtimizdagi “Hazrati Imom” jome masjidida bo‘lib o‘tdi. Unda O‘zbekiston musulmonlari idorasi raisi, muftiy Usmonxon Alimov hazratlari qatnashdilar. Dastlab, muftiy hazrat Payg‘ambar alayhissalomning tavalludlari, yoshlik, yigitlik va payg‘ambarlik davrlari haqida atroflicha ma’ruza qildilar. So‘ngra mavlidi sharif o‘qildi, Rasuli akramga salovotlar aytib, qalbi muhabbatga to‘lgan namozxonlar Muftiy hazrat boshchiligida juma namozini ado etishdi.
Masjidlardagi mavlidi shariflar yakunida yurtimiz tinchligi va olib borilayotgan keng ko‘lamli islohotlarning rivojini so‘rab, duoi xayrlar qilindi.
Shunday ekan, siz-u biz ham U zotga ushbu kirib kelgan rabi’ul avval oyida ko‘plab salovotlar aytib, Payg‘ambarimiz sollallohu alayhi vasallamga muhabbatlarimizni yanada ziyoda qilishimiz, va’da qilingan mukofotlarga sazovor bo‘lishga jiddu jahd qilishimiz lozim.

 O‘zbekiston musulmonlari idorasi
Matbuot xizmati