O‘zbekiston Respublikasi Prezidenti Shavkat Mirziyoyev AQSH prezidenti Donald Trampga Nyu-Yorkda sodir bo‘lgan terakt yuzasidan hamdardlik bildirdi. So‘nggi xabarlarga ko‘ra, hodisa oqibatida 8 kishi halok bo‘lgan va 15 nafar shaxs jarohatlangan.

Hamdardlik maktubi matni quyidagicha:

“Hurmatli Prezident Janoblari!

Nyu-Yorkda begunoh kishilarning o‘limiga sabab bo‘lgan terrorchilik harakati yuzasidan ta’ziyamni qabul qiling.

Bunday shavqatsiz jinoyatni hech qanaqasiga oqlab bo‘lmaydi. Biz ekstremizm va terrorizmning har qanday shakli va namoyonini qoralaymiz.

Bu fojea shunday g‘ayriinsoniy muammolarga qarshi kurashishda xalqaro hamjamiyatni birlashishi zaruratini yana bir bor tasdiqlaydi.

O‘zbekiston, o‘z navbatida, mazkur terrorchilik harakatni tergov qilishga yordam berish uchun bor kuch va vositalardan foydalanishga shay.

Biz Amerika qo‘shma shtatlari xalqiga hamdardlik bildiramiz.

O‘z ta’ziya so‘zlarim va yaralanganlarga tezkorlik bilan tiklanish istaklarimni yetkazishingizni so‘rayman” deyiladi maktubda.

Ma’lumot uchun, 1 noyabr kuni Nyu-Yorkning Manxetten shahrida kichik yuk mashinasi veloyo‘lak orqali katta tezlikda harakatlanib, yo‘lida uchragan velosipedchilarni urib yuborgan. Keyinchalik mashina maktab avtobusiga borib urilib to‘xtagan. Politsiya avtomobil haydovchisini yaralagan va qo‘lga olishga muvaffaq bo‘lgan.

Haydovchi 29 yoshli o‘zbekistonlik Sayfullo Soipov ekanligi aniqlangan. U ISHID guruhi a’zosi ekanligi gumon qilinayotgani aytilmoqda. Sayfullo Soipov Qo‘shma Shtatlarga 2010 yilda ko‘chib kelgan.