Keling ey ro‘zadorlar, birga iftor etaylik,
Behuda so‘zni tashlab shirin guftor etaylik.
O‘ltirib dasturxon atrofida yoronlar,
Shukroni ne’mat aylab, qullik izhor etaylik.
Sahar turib Xudoga tavba tazarru’ aylab,
Nuri imonimizni sof, beg‘ubor etaylik.
Ro‘zani amr etibdur Islomga Haq taolo,
Ado etib bu farzni talab diydor etaylik.
Sabr ila bu kechirgan ochlik va tashnalikdan,
Ibrat olib muhtojlar ko‘nglin shukkor etaylik.
Mohi sharif kelganda jurmu-xatodin o‘zni,
Saqlab qilib ibodat, tavvob sayyor etaylik.
Ro‘za bilan barobar nafs yo‘lini berkitib,
Gunoh loyiga botmay elni hushyor etaylik.
Ro‘zani ajrini xos Tangri O‘zi berarmish,
Damni g‘animat aylab, toatni yor etaylik.
Bir kechani bu oyda pinhon etibdur Subhon,
Istab ani yoronlar o‘zni bedor etaylik.
Fazilati bu kechani qadri ming oyga tengdir,
Muborak xislatini xo‘p e’tibor etaylik.
Allohning izni birla farishtalar tusharlar,
Alar bilan barobar tasbeh takror etaylik,
Hushnudni ham qatorda sohib asror etaylik.
Zarifa Mahkam qizi oqqa ko‘chirdi.
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Ashraf Aliy Tahonaviy rahmatullohi alayhning bir shogirdi bo‘lib, u zot unga tazkiya va talqinga ijozat bergan edi. Bir kuni u o‘g‘ilchasini yetaklab ustozi ziyoratiga keldi. Salom-alikdan so‘ng o‘g‘lini tanishtirib, uning haqqiga duo qilishlarini so‘radi. Hazrat bolaning haqqiga duo qildilar. Gap orasida ustoz bolaning yoshini ham so‘rab qoldilar. Shogird «Bolam o‘n uch yoshda», dedi. Mamlakatdagi qonun bo‘yicha bolalarga o‘n uch yoshgacha chipta narxining yarmi to‘lanar, o‘n uchga to‘lgan kunidan boshlab ularning chiptasi ham kattalar kabi to‘la bahosiga xarid qilinar edi.
Hazrat bolaga chiptaning qaysi narxda olinganini so‘rab qoldilar. Shogirdi «Jussasi kichkina bo‘lgani uchun yarim narx to‘ladik», deb javob berdi. Shunda ustozning avzoyi birdan o‘zgarib, shunday dedilar: «Inna lillaahi va inna ilayhi roji’un! Sizga tasavvuf va tariqatning changi ham yetib kelmagan ekan. Siz haligacha harom-halolni ajratmabsiz. Bolani safarga olib chiqibsiz-u, lekin unga yo‘lkira to‘lashda harom ishga qo‘l uribsiz. Kattalar maqomiga yetgan bolaga yosh bolalarning chiptasini olib, yo‘l xizmati idorasining haqqini o‘g‘irlabsiz. O‘g‘rilik qiladigan. birovning haqqini tortib oladigan shaxs tasavvuf va tariqatda biror maqomga ega bo‘lmaydi. Shuning uchun sizga bergan ijozatimni bekor qilaman».
O‘sha shogird ibodatda mukammal kishi edi. Lekin ustoz chipta olishda, ya’ni muomalotda haromga yo‘l qo‘ygani tufayli unga bergan vakolatini bekor qildi.
Abdulmannon Andijoniy