2017 yil 5 aprel kuni O‘zbekiston Respublikasi Vazirlar Mahkamasi huzuridagi Toshkent islom universitetida O‘zbekiston musulmonlar idorasi raisi o‘rinbosari Aydarbek Tulepovning “Internetdagi tahdidlardan himoya” nomli kitobining to‘ldirilgan qayta nashrining taqdimoti bo‘lib o‘tdi.

Tadbir O‘zbekiston musulmonlar idorasi bilan hamkorlikda o‘tkazildi. Unda O‘zbekiston musulmonlar idorasi raisi o‘rinbosari Ibrohim Inomov, Shayxontohur tumani bosh imom-xatibi Odilxon qori Yunusxon o‘g‘li, “Movarounnahr” nashriyoti xodimi Ilhom Ma’rupov hamda universitet professor-o‘qituvchi va talabalari ishtirok etdi.

Mazkur taqdimotni o‘tkazishda yoshlarni ma’naviy tahdidlardan ogohlik ruhida tarbiyalash va ularni axborot xurujlaridan himoya qilish borasida professor-o‘qituvchilarga uslubiy yordam berish asosiy maqsad qilib belgilangan. Binobarin, bugungi globallashuv jarayonida axborot xurujlari har jihatdan inson ongi va qalbini egallashga qaratilganligi bilan xarakterlidir. Ayniqsa, global tarmoq hisoblangan internet orqali bo‘layotgan tahdidlarning xavfi va tahdidi ortib bormoqda. Bu tahdidlardan yoshlarni himoyalashda milliy mafkurani singdirish, vatanparvarlik ruhida tarbiyalash va bu borada ma’naviy-ma’rifiy ishlarni faol olib borish lozimligini taqozo etadi. O‘tkazilgan taqdimot tadbiri ham shu jihatga qaratilganligi bilan muhim va dolzarbdir.  

Taqdimot tadbirida so‘z olganlar “Internetdagi tahdidlardan himoya” kitobining to‘ldirilgan qayta nashri yuzasidan fikr-mulohaza bildirar ekan, asarning mazmun-mohiyati, uning bugungi globallashuv jarayonlarida turli informatsion tahdidlardan himoyalanishdagi o‘rni va ahamiyati hamda yosh avlod ongu shuurini yot g‘oya va qarashlardan asrash, himoyalashda muhim qo‘llanma ekaniligini ta’kidlab o‘tdilar.

Tadbir so‘ngida mazkur kitobdan tadbir ishtirokchilariga hamda universitet Axborot-resurs markaziga taqdim etildi. O‘tkazilgan taqdimot tadbiri diniy-ma’rifiy, shu bilan birga ilmiy qiymati yuqori ekanligi bilan ahamiyatlidir.

Davron NURMUHAMMAD

tayyorladi