Shu yil 12 dekabr kuni Urganch shahar “Imom Faxriddin ar-Roziy” o‘rta maxsus islom bilim yurtida Payg‘ambarimiz Muhammad Mustafo (sollallohu alayhi va sallam) tug‘ilgan oy, Mavludi sharif munosabati bilan “Biz uchun Rasululloh (s.a.v.)da buyuk o‘rnak bor” mavzuidagi tadbir o‘tkazildi. Tadbir bilim yurti mudiri D.Abduqodirov boshchiligida tashkil qilinib, unda O‘MI Xorazm viloyat vakili X.Abdullayev, Toshkent islom instituti mudarrislari Soatmurot Primov, Abdurasul Toshpolatovlar ishtirok etishdi.
Tadbirni bilim yurti mudarrisi D.Esonov olib bordi. Tadbir Qur’oni karim tilovati bilan boshlandi. Tadbirni bilim yurti mudiri D.Abduqodirov ochib berib, “Rasululloh (s.a.v.) hayotlarini o‘rganish va uning ahamiyati” mavzuida gapirib o‘tdi. Tadbir davomida talabalari orasida Hadis aytish bo‘yicha, Rasululloh (s.a.v.) hayotlaridagi muhim voqea hodisalarni hamda sahobalar ismlarini sanab berish kabi bellashuvlar tashkil qilindi. Shuningdek, tadbir ishtirokchilari orasida ham siyrat bo‘yicha viktorina savollari o‘ynaldi.
Bellashuvlardan so‘ng, talabalar tomonidan Imom Barzanjiy (r.a.) qalamiga mansub “Mavlud” asari o‘qilib, duolar qilindi. Shu bilan birga tadbir davomida X.Abdullayev, S.Primov, A.Toshpolatovlar Mavludi sharif va uning ahamiyati, Rasululloh (s.a.v.)ning biz uchun go‘zal o‘rnak ekanlari to‘g‘risida ma’ruzalar qilishdi.
Tadbir so‘nggida bellashuvda g‘olib bo‘lgan hamda tadbirda faol qatnashgan talabalarga esdalik sovg‘alari berildi.

Olimjon ADILOV,
bilim yurti mudiri o‘rinbosari
Farg‘ona viloyatida faoliyat olib borayotgan imom-xatiblar ishtirokida O‘zbekiston musulmonlari idorasi raisi, muftiy Shayx Nuriddin Xoliqnazar hazratlari qalamiga mansub “Inson qadri” nomli asarning taqdimot marosimi bo‘lib o‘tdi.
Tadbirda Farg‘ona viloyati bosh imom-xatibi Ubaydulloh domla Abdullayev, viloyat bosh imom-xatibi o‘rinbosari Alisher domla Naimov, shahar va tumanlar bosh imom-xatiblari, shuningdek, masjidlarda faoliyat olib borayotgan imom-domlalar ishtirok etdilar.
Taqdimot davomida asarning mazmun-mohiyati, unda ko‘tarilgan dolzarb mavzular hamda kitobning bugungi jamiyat hayotidagi ahamiyati haqida atroflicha fikr yuritildi. So‘zga chiqqanlar kitobda inson qadrini ulug‘lash, uning huquq va burchlarini anglash, mehr-oqibat, bag‘rikenglik va hamjihatlik kabi insoniy fazilatlar chuqur va ta’sirchan tarzda yoritilganini ta’kidladilar.
Shuningdek, ishtirokchilar “Inson qadri” asari imom-xatiblar uchun ma’naviy-ma’rifiy faoliyatda muhim qo‘llanma bo‘lib xizmat qilishi, aholi bilan muloqotda, jamoatchilik orasida sog‘lom ma’naviy muhitni shakllantirishda keng foydalanish mumkin bo‘lgan manba ekanini qayd etdilar.
Farg‘ona viloyati vakilligi Matbuot xizmati