2016 yil 29 noyabr kuni Rossiyaning Yekaterenburg shahridagi muftiyotda O‘zbekiston musulmonlari idorasi delegatsiyasi ishtirokida o‘zaro muloqot bo‘ldi. Unda Sverdlovsk viloyati muftiysi Abdul-Quddus Asharin, Ural tog‘-kon universiteti dinshunoslik  kafedrasi mudiri Starostin Aleksey va ommaviy axborot vositalari vakillari ishtirok etdi.

Tadbirda O‘zbekiston musulmonlari idorasi raisi o‘rinbosari, delagatsiya rahbari Ibrohim Inomov so‘zga chiqib, Sverdlovsk viloyati hokimligi va muftiyotiga tashkil etilgan samimiy uchrashuv va suhbatlar uchun O‘zbekiston musulmonlari idorasi rahbariyati nomidan minnatdorlik bildirdi. O‘z navbatida Abdul-Quddus Asharin ham O‘zbekiston hukumatiga va diniy idora rahbariyatiga tashakkur bildirib, o‘z so‘zida bunday dedi:

– Terrorchi guruhlarga qarshi kurashda O‘zbekiston tajribasini o‘rganish va amalda tatbiq etish juda muhim ahamiyatga ega. Biz ulardan kerakli saboq va malaka o‘rgandik va o‘rganmoqdamiz. Kelgusida O‘zbekiston musulmonlari idorasi bilan yanada keng va samarali hamkorlik aloqalarini davom ettirishga umid bildiramiz.

Tadbir so‘ngida Sverdlovsk viloyati muftiyoti tomonidan O‘zbekiston musulmonlari idorasi va Din ishlari bo‘yicha qo‘mita rahbariyatiga shahodatnomalar taqdim etildi.

O‘zbekiston musulmonlari idorasi

Masjidlar bo‘limi