Avvalroq “Umra – 2024” yangi mavsumi boshlanib, ilk guruh ziyoratchilari muborak diyorga jo‘nab ketgani haqida xabar bergan edik.
Ushbu ziyoratchilar 3 kun davomida Madina shahridagi zamonaviy “Grand Shahba” mehmonxonasida istiqomat qilish barobarida Rasululloh sollallohu alayhi va sallamning Ravzai shariflari, muborak qadamjolar va Masjidun Nabaviyda ziyorat va ibodat bilan mashg‘ul bo‘ldilar.
Shundan so‘ng o‘zbekistonlik hojilarning dastlabki guruhlari Payg‘ambar shahridagi Zul-Hulayfa masjidida umrani niyat qilib, oppoq ehromda zamonaviy avtobuslarda Makkai mukarramaga yo‘l oldi.
Muqaddas ikki shahar orasidagi 460 kilometrlik masofani zamonaviy avtobuslarda o‘rtacha tezlikda 5-6 soatda bosib o‘tgan, tilidan “labbayka” tushmagan hojilarimiz Ishchi guruhi va hamkor shirkat vakillari tomonidan tantanali ravishda katta ehtirom bilan kutib olindi.
Hamyurtlarimiz muhtasham “Al-Ayam Elite” mehmonxonasiga kirishlari bilanoq iliq qarshi olinib, zam-zam suvlari, xurmo, shirinliklar, gullar va hadyalar ulashilib ikrom qilindi.
Zamonaviy mehmonxonada xonalari tayin bo‘lgan ziyoratchilarimiz mohir oshpazlar pishirgan lazzatli taomlaridan bahramand bo‘lgandan so‘ng guruh rahbarlari hamrohligida tildan talbiyani qo‘ymagancha Masjidul Haramga yo‘l olishdi va Baytullohda tavof, sa’y kabi umra amallarini bajarishga kirishdilar.
Alloh taolo ziyoratchilarimizning safarlarini xayrli va barakali qilsin, umralarini qabul aylasin, Baytulloh yonida duo qilishni barchamizga nasib etsin!
O‘zbekiston musulmonlari idorasi
Matbuot xizmati
Shu yil 12 iyul bosh imom-xatib Musoxon domla Abbosiddinov raisligida O‘zbekiston musulmonlari idorasi Namangan viloyat vakilligida hududdagi imom-xatiblar ishtirokida yig‘ilish o‘tkazildi. Unda Namangan viloyati hokimining o‘rinbosari Xotamov Jamshid ishtirok etdi.
Yig‘ilishda 2025 yilning birinchi yarmida amalga oshirilgan ishlar muhokama etilib, kelgusida amalga oshirilishi lozim bo‘lgan ishlar kelishib olindi.
Yig‘ilishda imomlik sharafli va mas’uliyatli vazifa ekani, bugungi kun imomi zamonga ziyraklik, teran fikr bilan qarashi, o‘z ustida muntazam ishlashi va mo‘min-musulmonlarning ma’naviy-ma’rifiy sohadagi ehtiyojlarini ta’minlash uchun tinimsiz izlanib, xizmat qilishlari zarur ekani alohida qayd etildi.
Shuningdek, imomlar hududlardagi mahallalar bilan muntazam aloqada bo‘lib, hojilar bilan birga yoshlar tarbiyasiga alohida e’tibor qaratish, ilm-ma’rifatga qiziqtirish va yosh avlod kelajagi uchun mustahkam poydevor yaratish, oilalarni tinch-totuv yashashi, farzandlarni bevaqt tirik yetim bo‘lmasligi uchun ajrimlarning oldini olish, keksalarni hurmat qilish, qo‘shnichilik odoblariga rioya qilish, yurt tinchligi va osoyishtaligi uchun barcha birdek mas’ulligi kabilarga alohida e’tibor qaratish ta’kidlandi.
Yig‘ilishda tashkiliy masala ko‘rildi. Norin tumani bosh imom-xatibi va “Haqqulobod” jome masjidi imom-xatibi lavozimida ishlab kelayotgan Kamoliddin domla Hamroqulov vazifasidan ozod etilib, tumandagi “Haqqulobod” jome masjidi imom-noibi lavozimiga o‘tkazildi. Norin tumani bosh imom-xatibi va “Haqqulobod” jome masjidi imom-xatibi lavozimiga Zikrullo domla Umurzoqov tayinlandi.
Shuningdek, Uychi tumanidagi “Xudoyberdi eshon” jome masjidi imom-xatibi Olimxon domla Isaqov, To‘raqo‘rg‘on tumanidagi “Isfahon” jome masjidi imom-xatibi Muhibullo domla Xudoyberdiyev va Yangiqo‘rg‘on tumanidagi “Beshbuloq” jome masjidi imom-xatibi Akmalxon domla Sappanovlarga tuman bosh imom-xatibi lavozimi yuklatildi.
Yig‘ilish yakunida Namangan viloyatida uzoq yillardan beri xizmat qilib kelayotgan, bugungi kunda nafaqa yoshiga yetgan bir guruh imom-xatib va imom-noiblarga vakillik tomonidan tashakkurnoma va qimmatbaho esdalik sovg‘alari topshirildi.
O‘zbekiston musulmonlari idorasi
Namangan viloyati vakilligi
Matbuot xizmati