Ikkinchi o‘n kunligi boshlangan Ramazon oyining sakinati, fayz-barakasi, tarovati yurtimizning har go‘shasida sezilmoqda.
Xususan, masjidlarimiz har qachongidan gavjum bo‘lib, o‘qilayotgan taroveh namozlari, xatmi Qur’onlardan keyin mo‘min-musulmon xalqimiz jamoat bo‘lib qilayotgan duolar sharofatidan bahramand bo‘lyapmiz.
Ota-onaga yaxshilik qilish, isrofdan saqlanish, qo‘shnichilik haqlari, saxiylik kabi taroviholdi suhbatlari, xayr-saxovat tadbirlaridan dillar charag‘on bo‘lmoqda.
Bunday ma’naviy-ma’rifiy tadbirlar O‘zbekiston musulmonlari idorasi raisi, muftiy Shayx Nuriddin Xoliqnazar hazratlari boshchiligidagi muftiy o‘rinbosarlari Zayniddin domla Eshonqulov va Muhammadolim domla Muhammadsiddiqov hamda imom-domlalarimiz tomonidan yurtimizning barcha hududlarida, ko‘p masjidlarda o‘tkazilmoqda.
O‘zbekiston musulmonlari idorasi
Matbuot xizmati
Mir Arab oliy madrasasida O‘zbekiston musulmonlari idorasi Buxoro viloyati vakili, Mir Arab oliy madrasasi rektori Jobir domla Elov boshchiligida O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining “Inson qadri” nomli kitobining taqdimoti bo‘lib o‘tdi.
Taqdimot tadbirida Buxoro viloyati hokimligi vakillari, Din ishlari bo‘yicha qo‘mita viloyat mutaxassislari, diniy ta’lim muassasalari professor-o‘qituvchilari, tuman va shahar imom-xatiblari hamda otinoyilar ishtirok etdi.
Tadbir davomida so‘zga chiqqanlar kitobda inson qadrini ulug‘lash g‘oyasining mazmun-mohiyati, uning jamiyatning ma’naviy-ma’rifiy hayotida tutgan o‘rni hamda tarbiyaviy ahamiyati xususida atroflicha fikr-mulohazalar bildirishdi.
Tadbir yakunida ishtirokchilarga “Inson qadri” kitobi taqdim etildi.
O‘zbekiston musulmonlari idorasi
Buxoro viloyati vakilligi
Matbuot xizmati