Oylar sultoni Ramazonning har bir kunida saxovat, xayriya tadbirlari Toshkent shahrida ham uyushqoqlik bilan o‘tkazilyapti.

Ramazonning 20-kuni (20 mart) Toshkent shahar bosh imom-xatibi Abduqahhor domla Yunusov poytaxtimizning Yunusobod tumaniga tashrif buyurdilar.

Tuman bosh imom-xatibi, imom-domlalar bilan 3 ta kam ta’minlangan, boquvchisini yo‘qotgan, o‘zgalar ko‘magiga muhtoj oilalar holidan xabar olindi. Ularga ro‘zg‘or uchun zarur oziq-ovqat mahsulotlari ehson qilindi.

Shunday oilalardan ikkitasida yoshi ulug‘ otaxon va keksa onaxon istiqomat qiladi. Otaxon va onaxon ko‘zlarida yosh ila yurtimiz tinchligi mustahkam, xalqimiz turmushi yanada farovon bo‘lishi so‘rab duolar qildilar.

Alloh taolo Qur’oni karimda: «Alloh yo‘lida mollarini ehson qiluvchilar (savobining) misoli go‘yo bir donga o‘xshaydiki, u har bir boshog‘ida yuztadan doni bo‘lgan yettita boshoqni  undirib chiqaradi. Alloh xohlagan kishilarga (savobini) yanada ko‘paytirib beradi. Alloh (karami) keng va bilimdon Zotdir» (Baqara surasi 261-oyat), deb marhamat qilgan.

Alloh  taolo bu misol bilan bitta xayrli ish uchun   700 va undan ortiq savob ato etishini bildirmoqda.

Parvardigor ehsonlarni qabul qilsin!

O‘zbekiston musulmonlari idorasi
Toshkent shahar vakilligi
Matbuot xizmati