#xabar #anjuman #muftiy
Shu yil 4 sentyabr kuni Braziliya poytaxti Rio-de-Janeyro shahrida «Ma’naviy Ipak Yo‘li: millatlar va qit’alarni yaqinlashtirishda ma’naviy qadriyatlarning o‘rni» nomli xalqaro konferensiya boshlandi. Unda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ishtirok etmoqda.
Rossiya Federatsiyasi musulmonlari diniy boshqarmasi, Muhammad bin Zoid nomidagi Gumanitar universitet hamda Braziliya musulmonlari uyushmalari Federatsiyasi tashabbusi bilan tashkil etilgan VI-xalqaro anjumanda Birlashgan Arab Amirliklari, Misr Arab Respublikasi, Hindiston, Indoneziya, Xitoy, Eron, Qozog‘iston, Efiopiya, Janubiy Afrika kabi davlatlarning zabardast ulamolari, davlat va din arboblari qatnashmoqda.
Anjumanda butun dunyoda, xususan, islom olamida tinchlikni saqlash, musulmon ummati jipsligi, xalqlar hamjihatligini ta’minlash, umuminsoniy qadriyatlarga e’tibor qaratish, o‘zaro hurmat, millatlararo totuvlik va dinlararo bag‘rikenglikni mustahkamlash hamda barqaror rivojlanishni ta’minlash maqsadida hamkorlikni kengaytirishga oid muhim masalalar muhokama qilinadi.
O‘zbekiston musulmonlari idorasi
Matbuot xizmati
Xabar berganimizdek, 2–4 fevral kunlari Samarqand shahrida bo‘lib o‘tgan Turkiy davlatlar muftiylar kengashi huzuridagi Fatvo hay’atining navbatdagi yig‘ilishida Turkiya, Ozorbayjon, Qozog‘iston, Qirg‘iziston va O‘zbekiston ulamolari ishtirok etdi.
Ushbu nufuzli tadbir turkiy davlatlar o‘rtasidagi diniy-ilmiy hamkorlikni yanada mustahkamlash, islom fiqhiga oid dolzarb masalalarni zamon talablari asosida muhokama qilishga qaratildi.
Yig‘ilishda islom huquqi va jamiyat hayotiga daxldor masalalar keng qamrovda ko‘rib chiqildi. Muhokamalar jarayonida inson qadr-qimmati, yer va mulk munosabatlarida adolat tamoyillariga amal qilish, ibodat vaqtlarini belgilashda umumiy yondashuvni shakllantirish, qishloq xo‘jaligi sohasida zamonaviy usullar qo‘llanilayotgan sharoitda diniy majburiyatlarni ado etish, shuningdek, yangi texnologiyalardan foydalanishda shar’iy me’yorlarni saqlash masalalari yuzasidan fikr almashildi.
Shuningdek, mehmonlar Samarqandning boy tarixiy va ma’naviy merosi bilan tanishdilar. Asrlar davomida Sharqning yirik ilmiy-madaniy markazlaridan biri bo‘lib kelgan qadim shaharda islom madaniyati, ilm-fan va davlatchilik taraqqiyoti bilan bog‘liq qator tarixiy qadamjolarni ziyorat qilishdi.
Mazkur tadbir nafaqat fiqhiy masalalarni muhokama qilish, balki turkiy davlatlar o‘rtasidagi ma’naviy yaqinlik, o‘zaro ishonch va hamjihatlikni yanada mustahkamlashga xizmat qiladi.
O‘zbekiston musulmonlari idorasi
Matbuot xizmati