Shu yil 5 noyabr kuni O‘zbekiston musulmonlari idorasi raisi o‘rinbosarlari Zayniddin domla Eshonqulov va Obid Qodirov, Idora bo‘lim boshliqlari Islomiddin domla Zuhriddinov va Muzaffar domla Kamolovlar Buxoro viloyatida bo‘lib, “Yangi O‘zbekistonning tinchlik va ma’naviyat targ‘ibotchilari” tashabbusi doirasida amalga oshirilayotgan targ‘ibot ishlarida ishtirok etishdi.
Dastlab soha mas’ullari Mir Arab oliy va o‘rta maxsus ta’lim muassasalari va Jo‘ybori Kalon ayol-qizlar o‘rta maxsus islom yurtida talaba-yoshlar va professor-o‘qituvchilar bilan uchrashuv o‘tkazdi. Ularga Buxoro viloyati bosh imom-xatibi, Mir Arab oliy madrasasi rektori Jobir domla Elov, ta’lim muassasalari rahbarlari hamrohlik qildilar.
Yig‘ilishda diniy ta’limni takomillashtirish, yoshlarni sof e’tiqod va yuksak ma’naviyat ruhida tarbiyalash, ilmiy-tadqiqot ishlarini qo‘llab-quvvatlash va malaka ko‘nikmalarini rivojlantirish masalalari muhokama qilindi.
Shuningdek, talabalar bilan ochiq muloqotda ularning fikr va takliflari tinglandi. Zayniddin domla Eshonqulov yoshlarni ilmga intilish, vatanparvarlik va axloqiy poklikka chorladi.
Safar davomida soha mas’ullari viloyatda faoliyat yuritayotgan masjid imom-xatiblari va otinoyilar ishtirokida yig‘ilish bo‘lib o‘tdi. Unda masjidlarda diniy-ma’rifiy faoliyatni rivojlantirish, jamoatchilik bilan samarali muloqotni tashkil etish, yoshlarni sof e’tiqod va ma’naviy poklik ruhida tarbiyalash hamda imom-xatiblar va otinoyilar malakasini yanada yuksaltirish masalalari muhokama qilindi.
Shuningdek, G‘ijduvon tumanida o‘tkaziladigan “Yangi O‘zbekistonning tinchlik va ma’naviyat targ‘ibotchilari” tashabbusi doirasidagi “Sayyor qabul” bo‘yicha amaliy ko‘rsatmalar berilib, ishchi guruh tomonidan topshiriq va tavsiyalar berildi.
O‘zbekiston musulmonlari idorasi
Buxoro viloyati vakilligi
Matbuot xizmati
“14 yanvar – Vatan himoyachilari kuni” munosabati bilan O‘zbekiston Respublikasi Mudofaa vazirligi, Chaqiruvga qadar boshlang‘ich tayyorgarlik va yoshlar bilan ishlash departamenti boshlig‘i, polkovnik Baxrom Zulfiqorov, Tarbiyaviy va mafkuraviy ishlar bosh boshqarmasi bosh mutaxassisi Urol Mamataliyev va IIV Profilaktika katta inspektori, katta leytenant Sherzod Qudratov ishtirokida Toshkent islom instituti talabalariga “Milliy armiyamiz – mustaqillik posboni” mavzusida davra suhbati o‘tkazildi.
Tadbirning asosiy maqsadi yoshlarni vatanparvarlik ruhida tarbiyalash, mustaqillik va tinchlikni asrash, Vatan tuyg‘usi, uni himoyalash, mardlik, jasorat va sadoqat kabi insoniy tuyg‘ular borasidagi mas’uliyatni oshirishdir.
Qurolli Kuchlarimiz tashkil etilganining 34 yilligi arafasida o‘tkazilgan mazkur tadbirda mehmonlar o‘z hayot yo‘llari, erishgan yutuqlari, shuningdek, O‘zbekiston Respublikasi Qurolli Kuchlarini tashkil etilishi, bugungi kunda harbiy xizmatni o‘tash uchun yaratilgan shart-sharoitlar, vatan himoyasi uchun bel bog‘lagan harbiylarning mashaqqatli hamda sharafli faoliyatlari, ularning qat’iyatliligi, mehnatsevarligi, yurtga, millat va qadriyatlarga sodiqliklari haqida juda jo‘shqin, ko‘tarinki ruhda talaba yoshlarga so‘zlab berdilar.
Islomda Vatan tuyg‘usi oliy qadriyatlardan biri hisoblanib, yurt sarhadlarini qo‘riqlash, dushmanlardan mudofaa qilish, askarlik va osoyishtalikni ta’minlash yo‘lida xizmat qiladiganlarga ulkan ajr va savoblar va’da qilingan.
Tadbirda Yoshlar masalalari va ma’naviy-ma’rifiy ishlar bo‘yicha prorektor Yo.Buxarbayev, Yoshlar bilan ishlash, ma’naviyat va ma’rifat bo‘limi xodimlari va talabalar ishtirok etdi.