Xalqimiz orasida mehr-oqibat, saxovat va inson qadrini ulug‘lash kabi ezgu qadriyatlar azaldan mustahkam o‘rin egallab keladi. Ana shu oliyjanob fazilatlarni hayotga tatbiq etish maqsadida joriy yilning 23 iyun kuni Samarqand viloyati Toyloq tumanida keng qamrovli sayyor uchrashuvlar o‘tkazildi.
 

Tadbirda Samarqand viloyati bosh imom-xatibi o‘rinbosari Xayrullo domla Sattarov, shahar va tuman bosh imom-xatiblari, «Haj–2026» ziyoratchilari, mahalla faollari hamda nuroniylar ishtirok etdilar.

Xonadonlarga tashrif va moddiy ko‘mak

Diniy soha xodimlari tumanda yashovchi kam ta’minlangan, boquvchisini yo‘qotgan va ijtimoiy himoyaga muhtoj oilalar xonadoniga tashrif buyurdilar. Bemorlarning holidan xabar olinib, ularga moddiy va ma’naviy yordam ko‘rsatildi, haqlariga shifo tilab duolar qilindi.

Ma’lumot uchun: Islom ta’limotida bemor ko‘rish va muhtojlar qalbiga quvonch ulashish eng savobli amallardan sanaladi.

Saxovatpesha insonlar ko‘magida yangi uylar

Sayyor yig‘ilish davomida din ulamolari Nayman mahallasida saxovatpesha homiylar ko‘magida qad rostlayotgan yangi xonadon qurilishi bilan tanishdilar.

• Birinchi xonadon: Boquvchisini yo‘qotgan oila uchun barpo etilmoqda.

• Ikkinchi xonadon: Yaqinda sodir bo‘lgan yong‘in oqibatida uy-joyidan ajralgan yana bir oilaga qurib berilyapti.

Ulamolar ushbu xayrli ishlarning barakasini tilab duolar qildilar va oilalarga hadyalar topshirdilar.

Ma’naviy-ma’rifiy suhbatlar

Tadbir davomida adashgan va yot g‘oyalar ta’siriga tushib qolgan ayrim fuqarolar bilan yakka tartibda suhbatlar o‘tkazildi. Ularga oila muqaddasligi, farzand tarbiyasi, halol mehnat, vatanga muhabbat va jamiyat oldidagi mas’uliyat hayotiy misollar bilan tushuntirildi. Bu samimiy muloqotlar ularning qalbida kelajakka ishonch uyg‘otishga xizmat qildi.

Masjidlardagi tarbiyaviy ma’ruzalar

Peshin namozidan so‘ng tumandagi barcha jome masjidlarida tarbiyaviy ma’ruzalar tashkil etildi. Imom-xatiblar jamiyatda sog‘lom muhitni qaror toptirish, bag‘rikenglik va o‘zaro hurmat mavzularida ma’ruza qildilar.

Yakunda yurtimiz tinchligi, xalqimiz farovonligi hamda yoshlarimizning kamoloti uchun xayrli duolar qilindi.

Samarqand viloyati vakilligi

Matbuot xizmati