Bugun, 23 iyun kuni Muftiy Nuriddin domla hazratlari Makka shahrida bo‘lib turgan ziyoratchilar bilan suhbat o‘tkazib, haj qilish ne’mati haqida mav’iza qilib berdilar.

Muloqot avvalida Qur’oni karim oyatlari tilovat qilinib, haj safari muvaffaqiyatli o‘tishini tilab, duolar qilindi.

Muftiy hazratlari so‘zlarida Makka va Madina shaharlarini ziyorat qilish ulkan saodat ekani, bu ulug‘ shaharlarda Rasul alayhissalom yurganlari, Islom tarixidagi muhim voqealar sodir bo‘lgani, haj ulug‘ ibodatligi, bunday sharafga yetkazayotgani uchun Alloh taologa shukrona keltirish, har bir ziyoratchi hojilik maqomiga yetishish yo‘lida yuksak ixlos, go‘zal odob bilan harakat qilishi zarurligini alohida qayd etdilar.

Yig‘ilish yakunida Toshkent shahar bosh imom-xatibi Rahmatulloh domla Sayfuddinov ziyoratchilarning qiziqtirgan savollariga javob berdi.

O‘zbekiston musulmonlari idorasi Matbuot xizmati