Ayni damda O'zbekiston delegatsiyasi Rossiya Federatsiyasining Ural, Privoljskiy hamda janubiy okruglarida bo'lib, bu ulkalarda ta'lim olayotgan va mehnat qilayotgan vatandoshlarimiz holidan xabar olib, ular faoliyat yuritayotgan joylarda yaratib berilayotgan shart-sharoitlar bilan tanishmoqda. Shu bilan birga har bir hududning rasmiy doiradagi mas'ullari bilan muloqotlar o'tkazib, vatandoshlarimizga etarlicha e'tibor qaratish masalalari muhokama etilmoqda.

Bunday uchrashuvlar diniy-ma'rifiy yo'nalishda ham olib borilayotgani nihoyatda samarali kechmoqda. Unda O'zbekiston musulmonlari idorasi raisi o'rinbosari Ibrohimjon domla Inomov bir qancha diniy boshqarma rahbariyatlari bilan uchrashib, o'zaro aloqalarni mustahkamlash va tajribalar almashish, vatandoshlarimizning emin-erkin ibodat qilishlari uchun shart-sharoitlar yaratish bo'yicha muzokaralar olib bormoqdalar.

Bunday muloqot kuni kecha Tyumen viloyati musulmonlari diniy boshqarmasi raisi Zinnat hazrat Sodiqov hamda Ibrohimjon domla Inomov o'rtasida bo'lib o'tdi.

Uchrashuvda ikki diniy tashkilot o'rtasidagi hamkorlikni yanada rivojlantirish masalalari muhokama qilinib, o'zbek diasporasi vakillari bilan olib borilayotgan ma'rifiy ishlarga alohida to'xtalindi.

Shuningdek, shu kuni Ibrohimjon domla Inomov Tyumen sanoat universiteti talabalari, mehnat muhojirlari bilan uchrashib, “O'zaro xalqlar do'stligi", "Milliy qadriyatlarimiz va diniy kadriyatlarimizni unutmaylik!" mavzusidagi madaniy-ma'rifiy tadbirlarda ishtirok etib, manfaatli suhbat qilib berdilar.

O'zbekiston delegatsiyasining amaliy tashrifi davom etmoqda.

O'zbekiston musulmonlari idorasi Matbuot xizmati