Sehrgar o‘z sehri orqali turli gunoh va zulmlarni amalga oshiradi. Sehrgar qanchadan-qancha odamlarni Allohdan o‘zgaga qurbonlik qilishga yoki tumor taqishga yo g‘aybdan kelgan xabarlarga ishonishga buyurib, adashtirdi?!

Sehrgar ko‘plab baxtli uylarni vayron qildi, qanchadan-qancha ahil juftliklarni bir-biridan ayirib, baxtiyor oilalardagi yosh bolalarni tirik yetim qildi. Go‘daklar u tufayli hayotning achchiq-chuchugini totdilar?!

Sehrgar odamlarga yana qancha tashvishlar keltirdi?!

Qanchadan-qancha sog‘lom odamlarning kasal bo‘lishiga sabab bo‘ldi?!

Qanchadan-qancha baxtli oilalarni parchalab tashladi?!

Qanchadan-qancha kambag‘allarni qarz olishga majbur qildi?!

“Davolayman” yoki “g‘aybni bilaman” degan yolg‘onlar bilan odamlarning pullarini o‘zlashtirib oldi?!

Sehrgar tinch-osoyishta jamiyatni yomon ko‘radi va uni buzmaguncha tinchimaydi. U o‘zgalarning baxtli hayotidan xursand bo‘lmaydi.

Sehrgarda hech qanday yaxshilik yo‘q. Yoki sehrgarning kambag‘allar, yetimlar, beva, bechoralarga g‘amxo‘rlik, yaxshilik yoki homiylik qilganini ko‘rganmisiz?! Sehrgarning amali jamiyatni buzish va uning a’zolarini shirkga undash, ularning boshiga balo, g‘am-tashvish solishdir.

Davron NURMUHAMMAD