— Er harom yo'l bilan uyga narsa olib kirib, bolalari va xotiniga edirsa, buning gunohi erning bo'ynidami? Yoki iste'mol qilmaslik kerakmi? Ikkilanib qoldik.

— Er halol yo'ldan rizq topishga harakat qilishi shart. Ahliga harom luqma edirishdan uzoq va ehtiyot bo'lishi lozim. Agar erkak kishi oilasiga harom luqma edirsa, gunohkor bo'ladi. Ahliga esa hech qanday chorasi bo'lmasa, o'lmay qoladigan darajada eyishga ruxsat bor.

Qolaversa, harom taom egan odamning necha kunlab duosi qabul bo'lmaydi. Rasululloh sollallohu alayhi vasallam: “Ey, Anas! Luqmangizni halol qiling, kishi harom luqma esa, qirq kun duosi ijobat bo'lmaydi”, deganlar (Imom Bayhaqiy rivoyati).

Demak, har bir imonli kishi tanovul qilayotgan luqmasiga qattiq e'tibor qilishi va uni faqat halol yo'l bilan topishi lozim. Rasululloh sollallohu alayhi vasallam: “Kim mol-dunyoni qayerdan topayotganiga parvo qilmasa, Alloh taolo ham u kishini do'zaxning qaysi eshigidan kiritishiga parvo qilmaydi” (Imom Daylamiy rivoyati).

Shu bois, ilgari onalarimiz otalarimizni ishga kuzatayotib: “Biz bu dunyoning ochligiga sabr qila olamiz, lekin do'zaxning o'tiga sabr qilolmaymiz. Allohdan qo'rqing, rizqimizni haloldan toping”, deb eslatib turishardi.

Muhammad Ayyub domla Homidov