Turkiyaning eng nufuzli ommaviy axborot vositalaridan biri – “Sabah” gazetasida ko'hna va zamonaviy O'zbekiston mavzusiga bag'ishlangan maqola bosilib chiqdi, deb xabar bermoqda “Dunyo” AA. Unda mamlakatimiz xalqi turkiy ellardan biri ekanligi, qadim zamonda hozirgi O'zbekiston Movarounnahr va Turon hududlari tarkibiga kirgani, bugungi kunda boy tarixi va muhim ahamiyati bois dunyo miqyosida bot-bot tilga olinayotgani alohida ta'kidlangan.

Maqolada mamlakatimizning jo'g'rofiy joylashuviga oid ma'lumotlar ham turkiyalik o'quvchilar e'tiboriga havola etilgan.

“Samarqand va Buxoro kabi tarixiy shaharlari, mashhur O'zbekiston Buyuk Ipak yo'lida joylashganligi bilan Markaziy Osiyoda barchaning e'tiborini tortib kelgan” deb yozadi nashr.

Shuningdek, maqolada mamlakatimizning boy madaniy-ma'rifiy merosi va o'ziga xos urf-odat va an'analari, ularning ayrimlari YuNYeSKOning moddiy va nomoddiy merosi ro'yxatidan joy olgani alohida ta'kidlangan. “Qariyb 3500 yillik o'tmishga ega, bugungi kunda ham o'zining tarixiy jilosini saqlab qolgan O'zbekiston – “butun dunyo ahli, ayniqsa, turklar ko'rishi kerak bo'lgan muhim o'lkalardan biridir”, deb yozadi “Sabah” gazetasi.

O'zbekiston musulmonlari idorasi matbuot xizmati